1, 2. a) Huahuacuna bautizaringapaj munanchi nijpica ¿imacunatallata ashtaca Testigo taitamamacunaca tapurin? b) Bautizarigrijujcunataca ¿imamandata Jehovaman ñachu mingarishcanguichi nishpa tapun? (Callari fotota ricupangui).

 MARÍA shuti cuitsaguca bautizarigrijunmi. Chaimi bautizarigrinajujcunahuan igual shayajun. Chaipimi discursota cuj huauquica paicunataca ishcai tapuicunata ruran. Chai tapuicunata ari nishpa tigrachijtami Mariapa taitamamacunaca uyanajun. Chai jipallami Mariaca bautizarin.

² Mariapa taitamamacunaca paipa ushigu Jehovaman mingarishpa bautizarijta ricushpaca ninandami cushijun. Shinapash Mariapa mamaca paipa ushigu bautizarichun huaquin punllacuna faltajpillatami, ashata preocuparishpa cashna tapurijurca: “¿Ñuca ushigu bautizaringapaca yapa jovenrachu can? ¿Bautizarina shuj jatun responsabilidad cajtaca alichu intindin? ¿Nachu ashata shuyanara can?” nishpa. Ashtaca Testigo taitamamacunami paicunapa huahuacuna bautizaringapaj  munanchi nijpica chashnallata tapurin (Ecl. 5:5). Shina tapurinaca normalmi can. Jesusta ali catijcunapaca Jehovaman mingarina, bautizarinapash shuj jatun responsabilidadmi can (“ ¿Jehová Diosman ñachu mingaripashcangui?” nishca recuadrotapash ricupangui).

3, 4. a) Bautizarina minishtirishca cashcataca ¿imashinata apóstol Pedroca intindichirca? b) ¿Imamandata apóstol Pedroca bautizarinataca, Noé arcata rurashcahuan chimbapurarca?

³ Noé arcata rurashcamanda parlashpaca apóstol Pedroca nircami: “Chai almacunaca, Noé villajui punllacunapi Diosta na cazujcunami cashca. Huambuna huasita [o arcata] Noé rurashpa tucuchingacamanmi Taita Diosca, paicunata llaquishpa shuyajushca. Chai huambuj huasita [o arcata] yacu huambuchijpimi, pusaj puracunalla chaipica salvarishca. Chaimi bautizarinataca ricuchijun. Shinami cunanbipash, Jesucristo causarishcamanda salvarinchi. (Bautizarinaca, cuerpomanda mapataca na anchuchinllu. Ashtahuangarin, shuj ali concienciata charichun ayudahuai nishpa, Taita Diosta mañashcashnami can)” nishpa (1 Ped. 3:20, 21, NM). Noé runaguca arcata rurashpami paipa causaipi Jehovapa munaitalla pactachishpa causajushcata ricuchirca. Noeca shinlli feta charimandami Jehovapa mandashcata pactachirca. Chaimi paipash, paipa familiapash Jatun Manllanai Tamiamanda salvarirca. Shinaca ¿imatata apóstol Pedroca yachachingapaj munarca?

⁴ Arcata ricushpaca gentecunaca Noé Taita Diospi feta charishcatami ricurca. Shinallata pipash bautizarijujta ricushpaca Jesusta ali catij cashcata, Jesús causarishcapi feta charishpa Jehovaman mingarishcatami gentecunaca ricun. Noé cuendami Jesusta  ali catijcunaca Jehová Diospa mandashcacunata cazushpa, Diospa Shimimanda villachishpa, yachachishpa causan. Jehová Diosca Jatun Manllanai Tamiamandami Noetaca salvarca. Shinallatami Jehová Diosca, Diablopa nali mundota tucuchina punllapica, bautizarishca tucui shunguhuan sirvinajujcunatami salvanga (Mar. 13:10; Apoc. 7:9, 10). Chaimandami Jehovaman mingarina, bautizarinapash minishtirishcapacha can. Imacunamandapash na uchalla bautizarishpaca para siempre causana esperanzataca na charishunllu.

 5. Cai temapica ¿ima tapuicunatata yachajupashun?

⁵ Bautizarina shuj jatun responsabilidad caimandami cashna tapurina capanchi: ¿Imatata Bibliaca bautizarinamandaca yachachin? Bautizaringapaca ¿imacunatallata pactachina capanchi? Ñucanchi huahuacunaman o shuj gentecunaman Bibliamanda yachachijushpaca ¿imamandata bautizarina minishtirishca cajtaca yaipi charina capanchi?

6, 7. a) Juan bautizashca gentecunaca ¿imatata ricuchirca? b) Jesús bautizarishpaca ¿imatata ricuchirca?

⁶ Bibliapica, bautizarinamanda primera vez parlashpaca Bautizaj Juan bautizashcamandami parlan (Mat. 3:1-6). Ashtaca gentecunaca Moisesman cushca Leyta na cazushcamanda arripintirishcata ricuchingapami Juanbaman rishpa bautizarin carca. Juanga, Taita Diospa Churita bautizana privilegiotami charirca. Chai bautizanaca shujcunahuan igual cashcataca na ricuchijurcachu (Mat. 3:13-17). ¿Imamandata shina nipanchi? Jesusca jucha illaj caimandaca imamandapash arripintirinataca na charircachu (1 Ped. 2:22). Taita Diospa munaita pactachingapaj listo cashcata ricuchingapami Jesusca bautizarirca (Heb. 10:7).

⁷ Jesús villachijuj tiempopica, paipa catijcunapashmi gentecunata bautizarca (Juan 3:22; 4:1, 2). Shina bautizarishpaca ¿imatata ricuchijurca? Moisesman cushca Leyta na cazuimanda arripintirishcatami ricuchijurca. Shinapash Jesús huañushpa causarishca jipaca, Jesusta catingapaj bautizarijcunaca ñana chaitallata ricuchinajurcachu.

 8. a) Jesús causarishca jipaca ¿imatata paipa catijcunata mandarca? b) Jesusta ali catijcuna cangapaca ¿imamandata bautizarina can?

⁸ Huata 33​pi Jesús causarishpaca 500 yali gentecunamanmi ricurirca. Paicunapurapica jaricuna, huarmicuna, tal vez uchilla huahuacunapashmi carianga. Chaipimi Jesusca cashna nishcanga: “Ñucapaj yachajujcuna tucuchun, cai pachapa gentecunapajman rishpa, villana canguichi. Paicunataca Taitapaj, Churipaj, Diospaj jucha illaj espiritupaj shutipimi bautizana canguichi. Canguna pactachinajuchun ñuca tucui imatalla yachachishcataca, paicunapash tucuillata pactachishpa causanajuchunmi, yachachina canguichi” nishpa (Mat. 28:19, 20; 1 Cor. 15:6). Jesusta ashtaca ali catijcunami chai mandashcataca uyashcanga. Jesusca caitapashmi nirca, “yugota aparinshna” pipash paita catingapaj munashpaca bautizarinami can nishpa (Mat. 11:29, 30). Diospa ñaupapi ali ricuringapaca Jesusmanda, Taita Diospa munai pactarinata ali intindishpami bautizarin carca. Shina rurajpimi Jehová Diosca chasquin carca. Punda siglopi gentecunaca Jesuspa discípulo tucungapaca bautizarina ima cashcata ali intindishpami uchalla bautizarin carca. Chaitami Bibliapica ricuchin (Hech. 2:41; 9:18; 16:14, 15, 32, 33).

9, 10. Etíope runagumanda, apóstol Pablomanda yachajushpaca ¿imatata bautizarinamandaca intindipanchi?

⁹ (Hechos 8:35, 36, liingui). Etiopía llactamanda runaguhuan ima pasashcata ricupashunchi. Paica judiomi tucushcarca. Chai runaguca Taita Diosta adorashpami Jerusalenmanda tigramujurca. Chaimi Felipe runagutaca shuj ángel cashna nirca, ‘Jesusmanda ali villaicunata’ Etiopía llactamanda runaguman villachigri nishpa. Chai jipaca ¿imata pasarca? Chai runaguca Jesuspi feta charina minishtirishca cajtami cuenta japirca. Paica Jehová Diospa mandashcacunata pactachingapaj munaimandami uchalla bautizaringapaj munarca.

¹⁰ Cunanga Saulo shuti runamanda ricupashunchi. Paica Jesusta ali catijcunata llaquichishpa causaj judiomi carca. Judiocunaca Diospa agllashcacunami carca. Jehovata na cazuimandami paicunaca chai privilegiotapash chingachirca. Sauloca judiocunapa tucuilla costumbrecunatami pactachishpa causan carca. Shuj punllami Jesusca, Saulomanga jahua cielomanda parlashpa imata ruranata villarca. Sauloca Jesusta ali catij Ananías runagu ayudachunmi saquirca. Chaimi Sauloca ‘bautizai tucurca’ (Hech. 9:17, 18; Gál. 1:14). Saulotaca jipamanga apóstol Pablo nishpami rijsin carca. Sauloca Jesusmanda, Taita Diospa munai pactarina cashcata ali intindishparami bautizarirca (Hechos 22:12-16, liingui).

11. a) Bibliamanda yachajujcunaca ¿imashpata bautizaringapaj munan? b) Jehovaman mingarishpa bautizarijta ricushpaca ¿imashinata sintiripanchi?

¹¹ Cunanbipash Bibliamanda yachajujcunaca jovenguna cashpa, mayorllacuna cashpapash, feta charishpa, Bibliapa yachachishcacunata tucui shunguhuan alicachishpami Jehovaman mingarishpa bautizaringapaj munan. Tucuilla Jatun Tandanajuicunapimi, bautizaringapaj munajcunapa shuj alipacha discurso tian. Testigo de Jehovacunaca Bibliamanda yachajujcuna bautizarijpica ninandami cushijupanchi. Testigo taitamamacunapashmi paicunapa huahuacuna bautizarijpica ninanda cushijun. Huata 2017​pica, 284 mil yali gentecunami Jehovaman mingarishcata ricuchingapaj bautizarirca. Paicunaca Jesusta ali catij cangapaj bautizarina minishtirishca cajta ali intindishcatami ricuchishca. Shinapash bautizaringapaca ¿imacunatallata pactachina carca?

12. Bibliamanda yachajujcunaca nara bautizarishpallata ¿imacunatallata pactachina can?

¹² Bibliamanda yachajujcunaca nara bautizarishpallatami Taita Dios pi cajta, paipa munai ima cajta, ñucanchita salvangapaj imata rurashcatapash ali intindina can (1 Tim. 2:3-6). Chaita ali intindinami shinlli feta charichun ayudanga. Chaimi nalicunata saquishpa Jehovapa mandashcacunata pactachishpa causai ushanga (Hech. 3:19). Nalicunata rurashpa causajujpica Jehová Diosca paiman mingarishcataca na chasquingachu (1 Cor. 6:9, 10). Bibliamanda yachajujcunaca, Diospa mandashcacunata pactachijushpapash tucuilla tandanajuicunamanmi  rina can. Shinallata villachinata, yachachinatapash na saquinachu can. Chaicunatami Jesuspa ali catijcunaca pactachina can (Hech. 1:8). Caicunata pactachijushpaca shuj mañaita rurashpami Jehovaman mingarishpa, tucuicunapa ñaupajpi bautizarina can.

13. Bibliamanda yachachijushpaca ¿imamandata Jesusta ali catingapaj bautizarina cashcata yarina capanchi?

¹³ Ñucanchi huahuacunata o Bibliamanda yachajujcunata bautizarichun ayudajushpaca, Jesusta ali catingapaj bautizarina cashcatami yarina capanchi. Jehovaman mingarina, bautizarina imamanda minishtirishca cashcatapashmi paicunahuan parlashun. Tucuicunallatami Bibliamanda yachajujcuna espiritualmente ñaupaman catishpa bautizarichun munapanchi.

14. Pipash bautizarichunga ¿imashpata na obligana capanchi?

¹⁴ Bibliamanda yachajujcuna bautizarichunga nipi na obliganachu can. Taitamamacunapash paicunapa huahuacuna bautizarichunga na obliganachu can. Ni Jehová Diospash na obliganllu (1 Juan 4:8). Chaipa randica Bibliamanda yachachishpami, Taita Dioshuan ali amigo cana importante cashcata ricuchina capanchi. Paicunaca Bibliapa yachachishcacunata tucui shunguhuan alicachimanda, Jehovapa mandashcacunata pactachingapaj munaimandami bautizarina can (2 Cor. 5:14, 15).

15, 16. a) ¿Bautizaringapaca shuj edadta charinachu minishtirin? Intindichipai. b) Bibliamanda yachajujcuna shuj religionbi bautizarishca cashpapash ¿imamandata Testigo shina bautizarina can?

¹⁵ ¿Bautizaringapaca shuj edadta charinachu minishtirin? Na, na minishtirinllu. Huaquingunaca ñapashmi espiritualmente  ñaupaman catin. Cutin shujcunaca asha ashami espiritualmente ñaupaman catin. Ashtacacunami, joven cashpallata bautizarishca. Shina cashpapash paicunapa tucui causaipimi Jehovata sirvinajun. Cutin shujcunaca ña mayorgucuna cashpami Bibliamanda yachajui callarishca. Huaquingunacarin 100 yali huatacunata charishpami Jehová Diosta rijsishca. Chaimi paicunaca bautizarina minishtirishca cajta intindishca.

¹⁶ Jesusta ali catingapaca shuj religiongunapi bautizarishca cashpapash, testigo de Jehová shinami bautizarina can. Jehová Diosca paipa munaita ali yachajushpa bautizarijcunatallami chasquin. Casi 80 huatata charij huarmigumanda ricupashunchi. Paica tauca religiongunapimi bautizarishca carca. Chaimi Bibliamanda yachachij panigutaca cashna tapurca, cutinllu bautizarina cani nishpa. Shina tapuchijpimi chai paniguca Bibliamanda huaquin textocunata ricuchirca. Chaimi chai huarmiguca bautizarinamanda Biblia imata yachachijta ali intindishpa jipamanga bautizarirca (Hechos 19:3-5, liingui).

17. Bautizarina punllaca ¿imapita pensarina can?

¹⁷ Pipash bautizarijpica ninandami cushijunchi. Shinapash bautizarina punllaca Jehová Diospa munaita pactachishpa causangapaj imata rurana cashcatami pensarina can. Bibliapica ninmi: ‘Ama paicunapa munaihuanlla causachunmi, Cristoca tucuicunamanda huañurca. Ashtahuangarin Cristopalla causachunmi, paicunamandaca huañushpa causarirca’ nishpa. Chaitami Jesusta ali catijcunaca pactachina can (2 Cor. 5:15; Mat. 16:24, NM).

18. Cati temapica ¿ima tapuicunatata yachajupashun?

¹⁸ Cai temapica, Jesusta ali catina shuj jatun responsabilidad cajtami ricupashcanchi. Chaita ali intindimandami Mariapa mamaca callari parrafocunapi parlashca tapuicunapi pensarirca. Quiquinbash huahuacunata charishpaca cashnachari tapuripashcangui: “¿Ñuca churiguca bautizaringapaj listochu can? ¿Jehová Diosta alipacha rijsimandachu Jehovaman mingarigrijun? ¿Bautizarishca jipa juchapi urmashpaca? Ashtahuan estudiashpa, shuj ali trabajota charishparachu ¿bautizarina can?” nishpa. Cai tapuicunataca cati temapimi yachajupashun. Shinallata taitamamacuna, huahuacuna bautizarichun imashina ayudanatapashmi ricupashun.