1. a) Ali yachajushcacuna cachunga ¿imata ayudanga? b) Ali yachajushcacuna canaca ¿imapata ayudan?

 ALI YACHAICA Jehová Diosmandami shamun. Chaimi Jehová Diosca tucuicunaman ali yachaita cun. Santiago 1:5​pica ninmi: “Canguna purapi ali yachaita maijambash na charishpaca, Taita Diostami mañana canguichi. Paica carangapachami. Pimambash na mitsashpa, ashtacata caramunga” nishpa. Jehová Dios cushca disciplinata chasquinami ali yachajushcacuna cachun ayudanga. Shinami nali ruraicunata na rurashpa Jehová Dioshuan ashtahuan ali amigocuna tucushun (Prov. 2:10-12). Ashtahuanbash ‘Taita Diospa juyaita na cungashpami causaita causagrinata shuyashun’ (Jud. 21).

 2. Dios cushca disciplinata alicachichunga ¿imata ayudanga?

² Juchayucuna caimanda, imashina viñashcamanda o shuj cosascunamandami disciplinata chasquinaca huaquinbica shinlli ricurin. Shinapash disciplinata chasquina ñucanchipallata ali cashcata ricushpami ashtahuan alicachinchi. Jehová Dios ñucanchita juyashpa disciplinashcatami cuenta japinchi. Proverbios 3:11, 12​pica ninmi: ‘Ñuca huahualla, Mandaj Dios [disciplinajpica, NM] ama yangapi churanguichu. Mandaj Diosca pai juyashcacunatami [disciplinan, NM]’ nishpa. Jehová Diosca ñucanchicuna ali  causachunmi munan. Chaitaca nunca na cunganachu capanchi (Hebreos 12:5-11, liingui). a Ñucanchicuna imashina cajta ali rijsishpami Jehová Diosca ñucanchita disciplinan. Cai temapica disciplinanamanda chuscu yuyaicunatami yachajupashun: 1) jarcarina, 2) taitamamacuna disciplinanamanda, 3) congregacionbi disciplinanamanda 4) disciplinata na chasquishpaca ñucanchillata nali causana cashcata.

 3. Huahuacuna jarcarinata yachajuchunga ¿imashinata taitamamacunaca ayudana can? Shuj ejemplomanda parlapai.

³ Ñucanchicunaca ñucanchi ruraicunapi, pensarishcacunapimi jarcarina capanchi. Shinapash jarcarina ushaihuanga na nacirinchichu. Jarcarinataca asha ashami yachajushpa catinchi. Chaita intindingapaca shuj ejemplota ricupashun. Shuj huahuami bicicletata manejanata yachajungapaj munan. Manejangapaj munajujpimi taitaca ama urmachun bicicletata charishpa ayudan. Ña yachajujujta ricushpami taitaca asha asha pailla richun saquin. Bicicletata ña ali manejajta ricushpami taitaca paitalla saquin. Shinallatami taitamamacunaca na shaijushpa, na ñapash culirashpa huahuacunataca ‘shinlli tacurishpa [Jehová Dios, NM] munashcashna viñachina’ can. Shinami huahuacuna ali yachajushcacuna cachun, jarcarinata yachajuchunbash ayudan (Efes. 6:4).

4, 5. a) Jarcarinaca ¿imapata ayudan? b) Pandarishpapash ¿imamandata ñaupaman catina capanchi?

⁴ Jehovamanda ña jatunbi yachajushca cashpapash pipash ayudachunmi minishtin. Huaquin cosascunapi jarcarinata yachashpapash, espiritualmente shinlli cashcataca na ricuchinllu. Jesuspa ejemplota catingapaj esforzarishpa ‘mushujta churajunshna causanami’ espiritualmente shinlli cachun ayudanga (Efes. 4:23, 24). Jarcarinata yachajunaca cai mundopi ‘nali munaicunata ruranata, paita na manllashpa causanatapash cungachunmi yachachijun. Chaita yachajushpaca, cai causaipi aliguta yarishpa, imatapash cashcatapacha rurashpa, Diosta yariajlla causachunmi’ ayudan (Tito 2:12).

⁵ Shinapash tucuicunallatami juchayucuna canchi (Ecl. 7:20). ¿Imapipash pandarishpaca imashina jarcarinata na yachashcatachu ricuchinchi? Na. Proverbios 24:16​pica ninmi: “Imatapash cashcatapacha ruraj runaca, canchiscaman urmashpapash, cutin jatarinllami” nishpa. Cutin jatarichunga ¿imata ayudanga? Jehová Diosmi paipa espiritu santohuan ayudanga (2 Corintios 4:7, liingui). Jarcarinaca Diospa espíritu granota fucuchinshna fucuchishca ali cualidadmi can.

 6. Bibliata alicachishpa yachajungapaca ¿imatata rurana capanchi? (Callari fotocunata ricupangui).

 ⁶ Diosta mañana, Bibliata yachajuna, yachajushcapi pensarinami jarcarinata yachajuchun ayudanga. Shinapash Bibliata yachajuna shinlli ricurijpi o yachajunata na gushtashpaca ¿imatata rurai ushapangui? Na desanimarinachu capangui. Jehová Diosca Bibliata tucui shunguhuan alicachishpa yachajuchunmi quiquindaca ayudangalla (1 Ped. 2:2). Bibliamanda ashtahuan yachajuchun ama imapash jarcachunga pundapica Jehová Diostami mañana capangui. Chai jipaca imashina Jehovata mañashcashnami quiquinba causaipi pactachina capangui. Asha ashami Bibliataca yachajui callarina capangui. Shinami jipamanga Bibliata yachajuna fácil ricurijpi cushijushpa yachajupangui. Ashtahuanbash Jehovapa valishca yuyaicunapi pensaringapami alicachishpa tiempoguta llujchina capangui (1 Tim. 4:15).

 7. Jarcarinata yachajunaca ¿imashinata espiritual metacunata pactachichun ayudan?

⁷ Jarcarinata yachajunaca espiritual metacunata pactachichunbashmi ayudanga. Shuj ejemplota ricupashunchi. Shuj taitaca ñana pundashna cushilla villachijushcatami cuenta japin. Chaimi precursor regular shina sirvina metata churarirca. Chaita pactachingapaca Jehovata mañarca, precursor shina sirvinamanda parlaj publicaciongunatapashmi lii callarirca. Shina ruranami Jehovahuan ashtahuan ali amigo tucuchun ayudarca. Chai huauquica precursor auxiliar shinami huaquinbica sirvin carca. Ashtahuanbash precursor regular cangapami ninanda esforzarirca. Chaimi jipamanga precursor regular shina sirvi callarirca.

8, 9. Jehová Dios munashcashna huahuacunata viñachichunga taitamamacunataca ¿imata ayudanga?

⁸ Testigo taitamamacunaca “shinlli tacurishpami aliguta yarichishpa, [Jehová Dios, NM] munashcashna” huahuacunata viñachina responsabilidadta charin (Efes. 6:4). Cai nali punllacunapi causajuimandaca chaita pactachinaca taitamamacunapaca shinllipachami can (2 Tim. 3:1-5). Huahuacunaca ima ali cajta ima nali cajta yachashpaca na nacirinllu. Chaitaca asha ashami yachajushpa catin. Chaimandami disciplinata cunaca minishtirishcapacha can. Shinami ña viñarishpaca ali gente caita ushanga (Rom. 2:14, 15).

⁹ Taitamamacuna juyaihuan disciplinajpica huahuacunaca seguro alimi sintirin. Huahuacunaca tucuita paicuna munashcashna na rurai ushashcata, nalita rurashpaca llaquicunata charishcatami paicunaca cuenta japinga. Chaimi taitamamacunaca huahuacunata ali viñachingapaca Jehovapa ayudata mascana can. Huahuacunata imashina viñachinamandaca cada llactapimi  shuj shuj costumbrecunata charin. Chai costumbrecunaca tiempohuanga cambianllami. Shinapash taitamamacuna Jehová Diospa mandashcacunata catishpa huahuacunata viñachishpaca, cai mundopa yuyaicunata catinataca na minishtingachu.

10. Noepa ejemplomandaca taitamamacunaca ¿imatata yachajui ushan?

¹⁰ Noé runagupa causaimanda ricupashunchi. Noetaca Jehová Diosca shuj arcata rurachunmi mandarca. Paica chai arcata imashina ruranataca na yacharcachu. Chaimi Jehová Diospi confiashpa pai ‘mandashcashnallata tucuita rurana’ carca (Gén. 6:22). Noé shina rurashcamandaca ¿imata pasarca? Noé chai arcata ruraimandami paipash, paipa familiapash salvarirca. Ashtahuanbash Jehovapa mandashcacunapi confiaimandami Noeca shuj ali taita carca. Jatun Manllanai Tamia nara chayamujpica gentecunaca nalicunatallami rurashpa causan carca. Shina gentecunapurapi causajushpapash, Noeca alipachami Jehovamandaca paipa huahuacunaman yachachirca. Shuj alipacha ejemplotami paipa huahuacunamanga curca (Gén. 6:5).

11. Jehová Diosta uyanaca ¿imashinata taitamamacuna huahuacunata viñachichun ayudanga?

¹¹ Quiquin taita cashpaca Jehová Dios ‘mandashcashnallata tucuita rurachunga’ ¿imata ayudanga? Jehovata uyanami ayudanga. Chaipaca Bibliata, paipa organizacionda utilizashpa Jehová cushca consejocunata catishpami, huahuacunataca viñachina capangui. Shina viñachijpica huahuacunaca agradicingami. Shuj huauquica nircami: “Ñuca taitamamacuna imashina viñachishcataca ninandami agradicini. Juyaihuan viñachishcamandami espiritualmente ñaupaman catita usharcani” nishpa. Taitamamacuna Jehovamanda yachachishpa viñachingapaj esforzarijpipash huaquin huahuacunaca Jehovata saquishcami. Shinapash Diospa Shimita huahuacunaman yachachingapaj esforzarishca cashpaca, taitamamacunaca concienciapi tranquilomi sintiri ushan. Huahuacuna Jehovaman cutin tigranataca na cunganachu capanchi.

12, 13. a) Churita o ushita expulsajpica taitamamacunaca ¿imatata rurana can? b) Taitamamacuna Jehovata cazushcamandaca ¿imashinata shuj familiaca beneficiarirca?

¹² Huahuacunata congregacionmanda expulsajpimi, taitamamacunapaca Jehovata tucuipi cazunaca shinlli ricurin. Shuj panigumanda parlapashunchi. Chai panigupa ushica congregacionmanda expulsajpimi huasimandapash llujshishpa rirca. Chai paniguca ninmi: “Ñuca ushihuan, ñuca nietahuan igual yalingapami publicaciongunapi ricushpa imapash pretextocunata mascan carcani” nishpa. Chaimi paipa cusaca ushita cuidana responsabilidadta ñana charishcata, Jehovata tucuipi cazuna cashcata juyaihuan intindichirca.

¹³ Huaquin huatacuna jipaca, cutinmi paipa ushica congregacionman tigrarca. Chai paniguca ninmi: “Cunanga ñuca ushiguca casi cada punllami telefonopi cayashpa, mensajetapash cachamuhuan. Jehovata tucuipi cazushcamandami ashtahuan ñucanchitaca respetan. Ñuca ushiguhuanga ashtahuan alimi llevarinchi” nishpa. Quiquinba ushi o churi expulsashca cajpica quiquinbillata confianapa randica ¿imashinata Jehovapi tucui shunguhuan confiashcata ricuchi ushapangui? (Prov. 3:5, 6). Na cunganachu capangui. Disciplinaca Jehová Dios ali yachaita charishcata, juyashcatami ricuchin. Jehová Diosca tucuicunata salvangapami paipa Churita ñucanchimanda huañuchun cachamurca. Paica shujllapash tucuchi tucuchunga na munanllu  (2 Pedro 3:9, liingui). b Churita o ushita expulsajpica taitamamacunapaca ninan llaquimi can. Shina cajpipash taitamamacunaca Jehová Diosta tucuipi cazushpa, paipi confiashpami catina can. Shinallata Jehová Dios cushca disciplinataca taitamamacunaca respetashpami catina can.

14. ‘Aliguta cazushpa, aliguta yarishpa pactachij mayordomopa’ yachachishcacunata cazunaca ¿imashinata ayudan?

¹⁴ Jehová Diosca nishcami, ñucata sirvijcunataca cuidasha, ayudasha, yachachishami nishpa. Chaimi Jehová Diosca congregacionda ñaupaman pushachun paipa Churita agllashca. Shinallata micunaguta caranshna espiritualmente ayudachunmi Jesusca ‘aliguta cazushpa, aliguta yarishpa pactachij mayordomota’ churashca (Luc. 12:42). Chai ‘mayordomomi’ yachachishpa, disciplinata cushpa ayudan. Shinaca discursocunata uyana o ñucanchi publicaciongunata liinaca ¿nachu quiquinba yuyaicunata, ruraicunata cambiachun ayudashca? Cambiachun ayudashca cajpica cushillami sintirina capangui. Shina rurashpami Jehová Diospa disciplinata chasquishcata ricuchijupangui (Prov. 2:1-5).

15, 16. a) Ancianocunapa rurashcacunamanda beneficiaringapaca ¿imatata rurana capanchi? b) Ancianocuna cushijushpa congregacionda ñaupaman pushachunga ¿imatata rurana capanchi?

¹⁵ Jesusca huauquipanicunata cuidachunmi ancianocunatapash churashca. Ancianocunaca, Jehová carashca cuenda cashcatami Bibliapica ricuchin (Efes. 4:8, NM, 11-13). Ancianocunapa rurashcacunamanda beneficiaringapaca ¿imatata rurana capanchi? Paicunapa charishca feta, ejemplotapashmi catina capanchi. Paicuna Bibliahuan cushca consejocunatapashmi cazuna capanchi (Hebreos 13:7, 17, liingui). Ancianocuna ñucanchita juyajta, Jehovahuan ali amigo cachun munashcataca na cunganachu capanchi. Chaimi tandanajuiman faltajpi o ñana cushilla villachijujta ricushpaca ancianocunaca uchalla ñucanchitaca ayudan. Ancianocunaca ñucanchita ali uyashpa, animashpa, Bibliahuan consejashpami ñucanchitaca ayudan. Jehová Diosca ñucanchita juyaimandami ancianocunata churashca.

¹⁶ Huauquipanicunata consejanaca huaquinbica ancianocunapaca na fácil ricurinllu. Por ejemplo, Davidca jatun juchapi urmashcatami pacangapaj munarca. Chaimi Natán profetapaca Davidta consejanaca shinlli cashcanga (2 Sam. 12:1-14). Apóstol Pedroca judiocunatallami alicachishpa tratan carca. Chaimi apóstol Pablopaca na manllashpa apóstol Pedrotaca consejana tucurca (Gál. 2:11-14). Shinaca ancianocuna cushijushpa congregacionda ñaupaman pushachunga ¿imatata rurana capangui? Paicuna consejajpica na jariyashpami aliguman chasquina capangui. Shinallata agradicishcatapashmi ricuchina capangui. Ancianocuna shina rurashpaca Jehovapa juyaita ricuchishcatami yarina capangui. Shina ruranaca quiquinballatami ali can. Ancianocuna congregacionda cushilla ñaupaman pushachunbashmi ayudapangui.

17. Ancianocunaca ¿imashinata shuj panigutaca ayudarca?

¹⁷ Shuj paniguca punda nali ruraicunata yarishpami llaquilla sintirin carca. Chaimi Jehovata juyaitaca na ushan carca. Chai paniguca ninmi: “Ancianocunahuan parlana cashcataca alimi yacharcani. Paicunaca nalicachishpa  uyanapa randica, animaitarami animahuarca. Ancianocunaca ocupado cashpapashmi cada tandanajui jipa alillachu cangui nishpa tapuhuan carca. Punda nali ruraicunata rurashcamandami Jehová Dios ñucata juyashcata crinaca shinlli carca. Shinapash Jehová Diosca cutin cutinmi turiñañacunahuan, ancianocunahuan ñucata juyashcata ricuchihuashca. Jehová Diostaca paimanda ama caruyangapaj ayudahuai nishpami mañani” nishpa.

18, 19. Ñucanchicunapaca ¿imata ashtahuanbachaca llaqui canman? Shuj ejemplota parlapai.

¹⁸ Disciplinajpica llaquirinchimi. Shinapash disciplinata na chasquinami ashtahuanbachaca llaqui canman (Heb. 12:11, NM). Chaita intindingapaca Caín jarimanda, rey Sedequiasmandapash ricupashunchi. Pundapica Caín jarimanda yachajupashunchi. Paica paipa huauquita na ricunayachimandami huañuchingapaj munarca. Chaita ricushpami Jehová Diosca cashna nirca: “¿Imashpata ninanda fiñarishpa, cambaj ñavipash shujpacha tucungui? Alita rurashpaca, ¿nacha jatunyachi tucunguiman? Nalita rurajpimi, juchaca pungupi chapanshna, canda mandangapaj shuyajun. Chai juchataca, canmi mishana cangui” nishpa (Gén. 4:6, 7). Shina nijpipash Cainga Jehovata na cazushpami paipa huauquitaca huañuchirca. Shina rurashcamandaca paipa tucui causaipimi ashtaca llaquicunata charirca (Gén. 4:11, 12). Jehová cushca disciplinata Caín chasquishpaca chai llaquicunataca na charinmanllu carca.

¹⁹ Rey Sedequiasca nali reymi carca. Paica manllaitapashmi manllan carca. Jerusalenda madajuj punllacunapica gentecunaca llaquipimi causanajurca. Nali ruraicunata saquichunmi profeta Jeremiasca cutin cutin Sedequiastaca advertirca. Chaita na cazuimandami Sedequiasca ashtaca llaquicunata charirca (Jer. 52:8-11). Imashinami ricupanchi, Jehová Diosca yangamanda sufrichunga na munanllu (Isaías 48:17, 18, liingui).

20. Diospa disciplinata chasquijcunahuanga ¿imata pasanga? Cutin na chasquingapaj munajcunahuanga ¿imata pasanga?

²⁰ Cunan punllacunapipash ashtaca gentecunami Jehová Dios cushca disciplinataca na chasquingapaj munan. Shina gentecunaca ñallami ashtaca llaquicunata charinga (Prov. 1:24-31). Chai gentecunashna ama llaqui apangapaca Jehovapa disciplinata chasquishpami ali yachaita charishcata ricuchina capanchi. Disciplinajpi imata ruranata yachachunmi Proverbios 4:13​pica cashna nin: ‘Chaririashpa ama saquinguichu, chaimari canba causai canga’ nishpa.