MOISESMAN cushca leypica, juramentota ruranaca huaquinbica ali cashcatami ricuchijurca. Shinapash Jesuspa punllacunapica, judiocunaca imata nishpapash casi siempremi juramentota rurana costumbreta charirca. Shina rurashpami paicuna cabalta nijushcata crichun munan carca. Chaimandami Jesusca ishcai viajeta judiocunapa costumbreta tacurishpa cashna nirca: “Ashtahuangarin imata rurangapajpash, usharina cajpillami: ‘Ari’ nina canguichi. Na usharina cajpica: ‘Na’ ninami canguichi” nishpa (Mat. 5:33-37; 23:16-22).

Shuj diccionario teologicoca ninmi, Talmud nishca libropica, judiocuna imatapash nishpa siempre juramentota ruran cashcataca cutin cutinmi ricuchin nishpa. Talmud nishca libroca maijan juramentocunata pactachinapacha cashcata, shinallata maijangunata na pactachinalla cashcatapashmi ali ali yachachijun.

Cai costumbretaca Jesuspash, shujcunapashmi nalicachin carca. Por ejemplo, historiador judío Flavio Josefoca judiocunapa shuj religionmandaca cashnami nirca: “Paicunaca na cutin cutin juramentungapaj munanllu, juramentunaca llullanatapash yali nalimi can ninmi. Ashtahuanbash ninmi, imatapash na juramentushpa nijpi pipash na crijpica, ña llaquichi tucushcami can nishpa. Eclesiástico o Sabiduría de Jesús Ben Sirá nishca judiocunapa libropipashmi cashna nin: “Cutin cutin juramentota ruraj gentecunaca, ashtahuan nalimi can” nishpa (23:11). Shinaca yangata imamandapash juramentota ruranatami Jesusca nalicachirca. Ñucanchicuna na llullashpa parlajpica, shujcuna ñucanchicunata crichun juramentota ruranaca na minishtiringachu.