1, 2. ¿Imatata 1 Timoteo 6:20​pi nishca shinaca Timoteoca rurana carca?

PIPASH shuj valishca cosasta charishpaca pimanbash ali cuidachunmi mingan. Por ejemplo, huaquingunaca ashtaca culquitaca ama shuhuachun o ama chingachunmi bancopi alichin. Shina cuendami pipash imapash valishca cosascunata ñucanchiman mingashpaca ñucanchipi confiashcata ricuchin.

² (1 Timoteo 6:20, liingui). Jehová Diosca Timoteomanga ‘ali villaita villachichunmi’ mingarca (2 Tim. 4:2, 5). Apóstol Pabloca Jehová Dios mingashcataca pactachinapachami cangui nishpami Timoteomanga cutin cutin yarichirca. Jehová Diosca Timoteopi confiaimandami ali villaigucunataca pai villachichun mingashpa saquirca. Ñucanchicunamanbash Jehová Diosca ¿imatata mingashca? ¿Imamandata chai mingashcataca cuidanapacha capanchi?

3, 4. Bibliapa yachachishcacunaca ¿imamandata valishca can?

³ Jehová Diosca ñucanchita juyaimandami paimanda yachajuchunga Bibliata cushca. Jehovapa yachachishcacunaca ninan valishcapachami can. Chaicunata yachajuimandami ñucanchica Jehovapa amigopash caita ushapanchi. Shinallata ciertopacha cushillapash causaita ushapanchi. Jehovapa yachachishcacunata ñucanchi yachajushpa, pactachishpaca panda yachachishcacunataca ña ladomanmi saqui ushashun. Shinallata huainayana, nali ruraicunatapashmi saquishun (1 Cor. 6:9-11).

⁴ Bibliapi yachachishcataca humilde gentecunaman, ‘causaita causagringapaj munajcunamanmi’ Jehová Diosca intindichun ayudan (Hech. 13:48, NM ). Humilde gentecunami aliguta cazushpa  aliguta yarishpa sirvij esclavopa yachachishcataca aliguman chasquishca (Mat. 11:25; 24:45). Jehová Dios ayudajpillami Bibliamandaca yachajui ushapashcanchi. Ñucanchi munaillaca na Jehová Diosmandaca yachajupashcanchichu. Jehovapa yachachishcacunami tucuita yali valishca can (Prov. 3:13, 15).

5. ¿Imata rurachunda Jehová Diosca mingashca?

⁵ Jehová Diosca paimanda, paipa munaimandapash shujcunaman yachachichunmi mandashca (Mat. 24:14). Jehovamanda yachajushpaca ashtaca gentecunami Jehovapa amigocuna caita ushanga. Para siempre causaigutapashmi chasquita ushanga (1 Tim. 4:16). Jehovamanda mashnata villachinajushpapash tucuicunallatami Jehovapa mingashcataca pactachinajupanchi (1 Tim. 2:3, 4). Jehová Diospa ayudajcuna canaca shuj jatun bendicionmi can (1 Cor. 3:9).

6. Huaquin Jesusta ali catijcunahuanga ¿imata tucurca?

⁶ Timoteopa tiempopica huaquin Jesusta catijcunaca Jehovapa mingashcataca cungaitapachami cungashcarca. Por ejemplo, Demas shuti jarica cai mundopa cosascunatara munaimandami apóstol Pablotaca villachingapaca ñana cumbashpa rirca (2 Tim. 4:10). Figelo y Hermógenes jaricunaca apóstol Pablotashna llaquichinga yashpami paicunaca manllaimanda villachinataca saquirca (2 Tim. 1:15). Himeneo, Alejandro, Fileto jaricunapash Jehovapa yachachishcacunata saquishpami Jehovamanda llullacunata yachachijcuna tucurca (1 Tim. 1:19, 20; 2 Tim. 2:16-18). Cai jaricunaca shuj tiempotaca Jesusta ali catijcunami carca. Shinapash tiempohuanga Jehovapa yachachishcacunata ñana sirvichishpami Jehovamandapash caruyarca.

7. Jehovapa mingashcata saquichunga Diabloca ¿imacunahuanllata pandachingapaj munan?

⁷ Jehová Diospa mingashcacunata saquichunga ¿imacunahuanllata Diabloca pandachingapaj munan? Telepi, peliculacunapi, internetpi, periodicocunapi, shuj shuj librocunapipash imacunatapash ricuchishpami canllamanda gentecunashna pensachun Diabloca munan. Shinami Jehová Diospa mingashcataca saquichita ushan. Shinallata familiacuna, cumbacunapash caita o chaita rurai nijpi manllaimanda paicunapa munaitara rurai ushapanchiman. Villachinatapashmi saquita ushapanchiman. Shinallata Diabloca Jehovamanda ‘llullashpa yachachijcunata’ uyachunbashmi munan. Chai llullacunata uyashpaca Jehovapa mingashcataca napacha pactachi ushapanchimanllu (1 Tim. 6:20, 21).

8. Danielmandaca ¿imatata yachajupanchi?

⁸ Huaquinbica na cuenta japijtami Jehová Diosmandaca caruyaita ushapanchiman. Cunanga Danielmanda * yachajupashunchi. Paica  10 huatacunata charishpami videojuegocunata pugllai callarirca. Paica ninmi: “Callaripica chai pugllaica nalishnallaca na carcachu. Jipamanga chai pugllaica macanajuicunahuan, ayacunahuan nalipacha pugllaimi carca. Pugllanata gushtaimandaca pugllashpami catircani” ninmi. Danielca 15 horascunatami pugllashpa yalin carca. Paica ninmi: “Chai videojuegocunahuan pugllana nali cashcataca yacharcanimi. Yapatami pugllashpa tiempota yalin carcani. Jehovata sirvinata saquijushcata cuenta japishpapash pugllana munaimi vinsihuan carca. Shinallata Bibliapi consejocunaca ñucataca na ayudaita ushahuangachu yashpami pensari callarircani” ninmi. Cashna pugllaicunami Jehovapa mingashcata saquichita ushan. Shinaca Jehovapa mingashcata ama saquingapaj ninanda esforzaripashunchi.

9. Apóstol Pabloca ¿ima chimbapuraitata 1 Timoteo 1:18, 19​pica Timoteomanga nirca?

⁹ (1 Timoteo 1:18, 19, liingui). “Ali macanajuj soldadoshna” cana cangui nishpami apóstol Pabloca Timoteotaca nirca. Apóstol Pabloca ¿ima macanajuimandata parlajurca? Jehovata sirvinamandami parlajurca. Shinaca Jehovata sirvijcunaca ¿imashinata alipacha macanajuj soldadoshna caita ushapanchi? Jehovata sirvijcunaca ¿imashinata causaipica cana capanchi? Apóstol Pablopa chimbapuraimandaca 5 alipacha yuyaicunatami yachajuita ushapanchi. ¿Maijangunata can?

10. Jehovata tucui shunguhuan juyashpaca ¿imatata rurapashun?

¹⁰ Jehovata tucui shunguhuan sirvingapaj esforzarina. Shuj soldadoca gentecunata juyaimandami paipa tucui fuerzahuan difindingapaj macanajun. Chai juyaimi ima mingashcata alipacha cuidachun ayudan. Apóstol Pabloca Timoteotaca tucui shunguhuan Jehovata sirvina cangui nishpami yachachirca. Jehovata sirvinaca huañui causaicamanmi cana can nishpami nirca (1 Tim. 4:7). Ciertopacha tucui shunguhuan Jehovata juyashpaca Jehovata sirvinataca nimahora na saquishunllu (1 Tim. 4:8-10; 6:6).

11. ¿Imamandata alita rurangapaj esforzarina capanchi?

¹¹ Alita rurangapaj esforzarina. Shuj soldadoca imata mandashcata cazungapaj, alita rurangapami ninanda esforzarin. Apóstol Pablopa consejota cazunami nali munaicunata ama charichun, Jesusta ali catij tucuchun, Jehovata ali sirvij huauquipanicunahuan tandanajuchubash Timoteotaca ayudarca (2 Tim. 2:22). Shinaca Timoteoca alita rurangapami esforzarirca. Ñucanchicunapash nali munaicunata saquingapaj ninanda esforzaripashunchi (Rom. 7:21-25). Alita rurangapaj esforzarishpaca nalicunata saquingapaca ashtahuan facilmi canga. Shinallami punda nali causaita saquita ushashun (Efes. 4:22, 24). Huaquinbicarin shaijushca caimandami tandanajuimanbash na ringapaj munapanchi. Shinapash tandanajuipi cangapaj, huauquipanicunahuan cangapaj munaimandami ninanda esforzarina capanchi (Heb. 10:24, 25).

12. Bibliamanda alipacha yachachij tucungapaca ¿imatata rurana capanchi?

¹² Shuj soldadoca armacunata ali utilizangapaj munashpaca cutin cutinmi yachajushpa catina can. Shina cuendami Testigocunaca Bibliata ali utilizangapaca cutin cutin yachajushpa catina capanchi (2 Tim. 2:15). Bibliata ali utilizanata yachajuchunga Tandanajuicunami ayudanga. Shinaca shujcunaman Bibliamanda ali yachachi ushangapaca, ñucanchirami Bibliamanda ali yachajungapaj shuj horariota charina capanchi. Shinallami Jehovata tucui shunguhuan sirvishpa catichun ayudanga. Bibliata liitallaca na liinachu canchi. Chaipa randica liishcapimi cutin cutin pensarina capanchi. Bibliata liijushpa na intindishpaca ali intindingapami publicaciongunapi  mascana capanchi. Ali intindishpami shuj gentecunamanbash ali yachachita ushapashun (1 Tim. 4:13-15). Ali prepararishca cashpaca gentegucunaman shuj textotalla liinapa randica Bibliata ali utilizashpami ali yachachita ushapashun. Ñucanchira Bibliata alipacha intindishpaca alipacha yachachijcunami tucuita ushapashun (2 Tim. 3:16, 17).

13. Hebreos 5:14​pi nishca shinaca ¿imamandata ali yachajushca cana capanchi?

¹³ ‘Aliguta yachajushca cashpami alita, nalitapash yachai ushashun’. Shuj soldadoca imapash llaquicunapi ama urmangapaca ñamandami cuidarina can. Ñucanchicunapashmi imapash nali cosascunapi ama urmangapaca ñamanda cuidarina capanchi (Prov. 22:3; Hebreos 5:14, liingui). Imapash pugllaicunataca ali alimi agllana capanchi. Shinallata teleta o peliculacunata ricugrijushpaca ali alimi agllana capanchi. Huaquinbica telepi o peliculacunapi ñapashmi huainayanajuj programacuna ricurita ushan. Cashna nali programacunata shuj Testigo ricujushpaca na cuenta japijtami Jehovamanda asha asha caruyaita ushanman. Huainayana programacunata ricuchunga Jehová Diosca nimamanda na munanllu. Chaicunaca Jehovapa ñaupajpica nalipachami can. Shuj Testigo huainayashpa nalicunata rurashpa causajushpaca paillata, paipa familiatapashmi dañota rurajun (Efes. 5:5, 6).

14. Danieltaca ¿imapita ali yachajushca canaca ayudarca?

¹⁴ Párrafo 8​pi parlashca Danielca chai videojuegocunahuan pugllanaca nalipacha cashcatami cuenta japirca. Danielca Watchtower Library nishcapi videojuegocunata ñana punllangapaj nishca publicaciongunatami mascarca. Shinami videojuego pugllanata, Internetpi pugllangapaj anotarishcatapash saquita usharca. Shinallata paihuan videojuegocunata pugllajcunatapashmi saquirca. Paica ninmi: “Videojuegocunata pugllanapa randica calpangapaj o huauquipanicunahuan imagutapash rurangapami tiempota llujchini” nin. Cunanbica Danielca precursor, anciano shinami sirvijun.

15. ¿Imamandata Jehovamanda llullacunata yachachijcunataca na uyana capanchi?

¹⁵ Jehovamanda llullacunata yachachijcunataca Timoteoca nimamanda na uyarcachu. Ñucanchicunapash Timoteoshnami cana capanchi (1 Tim. 4:1, 7; 2 Tim. 2:16). Jehovamanda llullacunata yachachijcunaca Jehovapa organizacionmanda, huauquipanicunamanda llullacunata nishpami crichingapaj munan. Chai  llullacunata crishpaca Jehovapica ñana tucui shunguhuan crita ushashunllu. Chai ‘runacunaca imatapash’ llullacunata nishpami huauquipanicunapura culirarichun imatapash ruran (1 Tim. 6:4, 5). Jehovamanda llullacunata yachachijcunaca paicunapi crishpa, ñucanchi huauquipanicunapi ama crichunmi munan.

16. ¿Imacunata Jehovata sirvichunga jarcaita ushanman?

¹⁶ Jehová Diosta sirvishpa catina. Timoteoca “Jesucristopaj alipacha soldadoshna” caimandami Jehová Diosmanda villachinataca na saquirca. Cai mundopi ashtahuan charijyangapapash na munarcachu (2 Tim. 2:3, 4). Timoteoshnallatami cai mundopi cosascuna ñucanchita ‘pandachichunga’ na saquina capanchi. ‘Ashtahuan charijyangapaj’ munashpaca Jehovatami saquita ushapanchiman. Jehová Dios Bibliata cushcatapash cungaitami cunganchiman. Shujcunaman Bibliamanda yachachinatapashmi saquita ushapanchiman (Mat. 13:22). Charishcaguhuanlla cushilla causana capanchi. Shinami ‘Taita Dios mandajuj llactagupi causanatara pundapi’ churangapaj tiempota, fuerzata charipashun (Mat. 6:22-25, 33).

17, 18. Jehovata tucui shunguhuan sirvishpa catingapaca ¿imatata ña pensarishcalla cana capanchi?

¹⁷ Cunanmandami imata ruranataca pensarishcalla cana capanchi. Shuj alipacha soldadoca imapash llaqui tianata yachashpaca imata ruranataca ña pensarishcallami can. Ñucanchicunapashmi llaquicuna ricurijpi Jehovapa mingashcata pactachingapaca cunanmandallata imata ruranataca ña pensarishcalla cana capanchi.

¹⁸ Caita ashtahuan intindingapaca caipi yuyapashun. Shuj jatun localpi shuj programata ruragrinajushpaca imapash llaqui tiajpi gentecuna uchalla llujshichunmi shuj punguta ricuchin. Shina cuendami ñucanchicunapash imapash nara pasajpillata imata ruranataca ña pensarishcalla cana capanchi. Por ejemplo, Internetpi, telepi imapash peliculacunata ricujujpi huainayana programacuna, macanajuicuna, Jehovamanda llullacunata yachachijcunapa propagandacuna llujshijpica imata ruranataca ña yachapashun. Ñamanda imata ruranata yachashpaca Jehovataca tucui shunguhuanmi sirvishpa catita ushapashun (Sal. 101:3; 1 Tim. 4:12).

19. Jehovapa mingashcacunata pactachishpaca ¿ima bendiciongunatata chasquipashun?

¹⁹ Jehová Diosca ñucanchicunamanga Bibliatami cushca. Shinallata shuj gentecunamanbash paimanda yachachichunmi mingashca. Chaicunaca ñucanchipaca ninan valishcami can. Jehovapa yachachishcacunata ñucanchi causaipi pactachishpa, shujcunamanbash yachachishpaca shungupipash tranquilo, cushillami sintiripashun. Jehovapa ayudahuanga paipa mingashcataca alimi pactachi ushapashun (1 Tim. 6:12, 19).