1, 2. a) Apocalipsis 15:3​pi nishca shinaca ¿imacunatallata Jehová Diosca carashca? b) Cai temapica ¿imatata yachajupashun?

JEHOVÁ Diosca tucui tucuita caraj Diosmi can. ¿Imacunatallata carashca? Maipi causanata charichunmi cai Alpata carashca. Pensari ushachun, parlai ushachunbashmi pensamientoguta carashca. Shinallata ñucanchi charishca tapuicunamanda yachajuchunbashmi Bibliata carashca (Apocalipsis 15:3, liingui).

² Cai temapimi Jehovapa cai quimsa carashcacunamanda yachajupashun. Chai carashcacunamanda yachajushpami Jehovapa carashcacunataca ashtahuan alicachichun ayudan. Shinallata Tucuita Ruraj Jehová Diospa ñaupajpipashmi ali ricuringapaj munapashun. Paica ñucanchicunataca ninandami juyan (Apoc. 4:11). Ñucanchi caicunamanda yachajushpaca evolucionbi crij gentecunahuan parlachunbashmi ayudanga.

3. Shuj planetacunamanda ñucanchi mundo Alpaguca ¿imashpata shujpacha can?

³ Cai juyailla mundo Alpaguta rurashcata ricushpaca Jehová Dios alipacha yachaj Dios cashcatami ricupanchi (Rom. 1:20; Heb. 3:4). Jahua cielopica ashtaca planetacunami tian. Cai planetacunaca inditami muyunajun. Ashtaca ashtaca planetacuna tiashpapash cai mundo Alpapillami causaica tian.

4. Cai Alpaguta ricushpaca ¿imashinata Jehová Dios alipacha yachaj Dios cashcata ricui ushapanchi? Intindichipai.

⁴ Cai mundo Alpaca shuj barcopi gentecuna junda rijunshnami can. Shinapash barcota cai mundo Alpahuan chimbapurashpa ricujpica cai mundoca shujpachami can. Por ejemplo, barcopi rij gentecuna micunata, yacuta, oxígeno nishca samaita paicunallata rurashpa, basuratapash na shitashpaca ¿causashpa cati ushanmanllu? Na, na ushanmanllu. Cai mundo Alpagupica  ashtaca millón gentecuna, plantacuna, animalcunami tian. Jehová Diosca ñucanchi Alpa oxigenota charichun, micunata, yacutapash charichunmi rurashca. Caicunaca minishtirishcapacha caimandami nimahora na tucuringa. Shinallata cai mundo Alpapi ashtaca ashtaca basuracuna tiashpapash cai mundopica na jundanllu. Cai Alpaca juyaillagu, causanayaimi can. Cai Alpaguta rurashpaca Jehová Dios cai Alpapi tiashcacuna ismushpa cutin alpaman tigrachunmi rurarca. Cunanga oxígeno imashina tiajta, yacupash imashina tiai callarijta yachajupashun.

5. Oxígeno tiashpa catichunga ¿imatata Jehová Diosca rurashca?

⁵ Oxígeno na tiashpaca animalcunapash, gentecunapash na causaita ushanmanllu. Estudiashca gentecunaca ninmi, huatapica animalcunapash, gentecunapash cien mil millón yali oxigenotami respiran nishpa. Gentecunapash, animalcunapash samaita cacharishpaca dióxido de carbono nishca nali airetami cacharin. Shinaca oxigenoca nunca na tucurinllu. Shinallata dióxido de carbono nishca nali airepash cai mundopica na jundanllu. Cai pasachunga ¿imatata Jehová Diosca rurashca? Jehová Diosca uchilla plantacunata, jatun plantacunatami rurashca. Chai plantacunami dióxido de carbono nishcata chasquishpa, oxígeno nishcata shitan. Shinami oxigenoca tiashpa catin. Caimanda parlashpaca Hechos 17:24, 25​pica ninmi: Jehová Diosca “causaita, samaita, imata munashcatapash tucuicunamanmi caramujun” nishpa.

6. ¿Imamandata yacu illajca na quedapanchi? (“ Jehová Diosmi yacugutaca carashca” nishca recuadrota ricupangui).

⁶ Cai Alpapica ashtaca ashtaca yacumi tian. Shinapash cai mundo Alpa Indi ladopi cajpica tucuilla yacumi chaquirinman. O Indimanda yapa carupi cajpica hielomanmi tigranman. Shinapash Jehová Dios cai Alpata maipi canapi churashcamandami yacupash tiashpa catin. Causaipash tian. Yacuca ¿imashinata tiashpa catin? Indica, lagunacunata, cai alpapi tiashca yacucunata cunujyachijpimi samaica cieloman rishpa fuyuman tigran. Cada huatami ashtaca millón yali litro yacucuna chai fuyupi tian. Chai samaimi yacuman tigrashpa diez punllacuna jipa tamiamun o razo urmamun. Chaicunata ricushpami Jehová Dios tucui ushaita charij, alipacha yachaj Dios cashcatapash ricui ushapanchi (Job 36:27, 28; Ecl. 1:7).

7. Salmo 115:16​pi nishca shinaca Jehovapa carashcacunamandaca ¿imashinata agradicishcata ricuchipashun?

⁷ Jehová Diosta agradicingapaca cai Alpapi imacunatalla Jehová Dios rurashcacunapimi pensarina capanchi (Salmo 115:16, liingui). Shina pensarinami cada punlla imaguta carajpipash agradicishun. Chaimi ñucanchi causajushca alpagutapash cuidangapaj esforzaripashun.

8. ¿Imamandata ñucanchi pensamientoguca ali ali rurashcami can nipanchi?

⁸ Jehová Diosca ñucanchicuna pensamientoguta charichunmi rurashca. Mamapa vijsa ucupi cajllapitami Jehová Diosca ñucanchi pensamientogutaca tucui cabalguta ali ali rurashca. Cada minutopimi ashtaca ashtaca células cerebrales nishcacunaca mirashpa catirca. Estudiashcacunaca ninmi, gentecunapa pensamientogupica casi 100 mil millón neuronacunami tian nishpa. Cai neuronacunapashmi células nishcacuna can. Cai celulacunaca ñucanchi pensamientogupica shuj ladogupilla tandachishcami can. Tres libras yaligutami pesan. Cunanga ñucanchi pensamientogu imapalla sirvijta yachajupashunchi.

9. ¿Imamandata Jehová Diosmi ñucanchicuna parlai ushachunga rurashca nipanchi?

⁹ Parlai ushachunmi Jehová Diosca rurashca. Parlai ushangapaj imacunalla ñucanchi  cuerpopi pasajta ricupashunchi. Ñucanchi pensamientogumi shuj shimigutallapash parlachunga jalluta, cungata, shimita, quijadasta, ñucanchi pechotapash cuyuchin. Tucui caicunapa musculocunami parlachunga cuyurina can. Cai musculocunami intindirinallata parlachun ayudan. Huata 2019​pi llullu huahuacunapa pensamientoguta estudiajcunaca nircami, llullu huahuacunaca huaquin shimicunataca intindi ushanmi, shuj shuj idiomacunatapash yachajuita ushanmi nishpa. Shuj estudiashcacunapashmi chaitallata nin. Jehová Diosmi ñucanchicuna parlai ushachunga rurashca (Éx. 4:11).

10. Ñucanchi parlai ushachun Jehová Dios rurashcata agradicingapaca ¿imatata rurana capanchi?

¹⁰ Ñucanchi parlai ushachunmi Jehová Diosca ñucanchitaca rurashca. Chaimanda agradicishcataca ¿imashinata ricuchi ushapanchi? Evolucionbi crij gentecunamanga Jehová Diosllami tucuita rurashca nishpa parlana capanchi (Sal. 9:1; 1 Ped. 3:15). Evolucionbi crij gentecunaca cai Alpa, causaipash yangamanda tiai callarishcata crichunmi munan. Shinapash ñucanchicunaca cielota, cai Alpata tucui ima tiashcacunatapash Jehová Dios rurashcataca seguromi capanchi. Chaimi evolucionbi crijcunaman caita intindichingapaca Bibliata, cai temapi yachajushca yuyaicunatapash utilizana capanchi (Sal. 102:25; Is. 40:25, 26).

11. ¿Imamandata ñucanchi yuyaica ali ali rurashcami can nipanchi?

¹¹ Ñucanchi yuyaipash ali ali rurashcami can. Huaquin huatacuna huashamanga, shuj cientificoca nircami, gentecunapa pensamientoguca 20 millón librocunapi tiashca informaciondami yuyarita ushan nishpa. Shinapash shuj estudiashcacunaca nishcami, cunanbica 20 millón yali informaciondami ñucanchi pensamientoguca yuyarita ushan nishpa. Ñucanchi yuyaimanda ashtahuan yachajupashun.

12. Gentecunaca ¿imatata rurai ushapanchi?

¹² Cai Alpapica gentecunallami ima ali cajta, ima nali cajta intindi ushapanchi. Caita yarinami ñucanchi causaita, yuyaicunatapash cambiachun ayudan. Ali gentecuna cachunbash ayudan (1 Cor. 6:9-11; Col. 3:9, 10). Jehová Diosca ñucanchi conciencia ali cachunmi yachachin. Chaimi ima ali cajta, ima nali cajtapash yachai ushapanchi (Heb. 5:14). Shinami juyanata, llaquishpa tratanatapash yachajupanchi. Shinallata ima ali cashcatapash yachajuita ushapanchi.

13. Salmo 77:11, 12​pica ¿imatata nijun?

¹³ Jehová Diosmi ñucanchimanga yuyaita carashca. Chaimi Jehová Diostaca agradicipanchi. Agradicimandami pai imashina ayudashcata yarinchi, jipa punllacunapipash ayudanapi confiapanchi (Salmo 77:11, 12, liingui; 78:4, 7). Jehová Dios yuyaita carashcamandami shuj gentecunatapash ñucanchita ayudashcamanda agradicipanchi. Estudiashca gentecunaca ninmi, shujcunata agradicishcata ricuchinami cushilla causachunga ayudan nishpa. Ñucanchi yuyaita ali utilizashpaca Jehová Dios imashina cashcatami ricuchipanchi.  Jehová Diosca jucha illaj cashpapash pipash pandarijpica chaicunataca na yarijunllu. Ñucanchi juchacunamanda arripintirijpica Jehová Diosca tucuitami perdonan (Sal. 25:7; 130:3, 4). Ñucanchita pipash nali sintichijpica Jehová Diospa ejemplota catishpami shujcunata perdonana capanchi (Mat. 6:14; Luc. 17:3, 4).

14. Ñucanchiman pensamientoguta Jehová Dios carashcamandaca ¿imatata rurangapaj munapanchi?

¹⁴ Ñucanchiman pensamientoguta Jehová Dios carashcamandami paita adorana capanchi. Huaquin gentecunaca paicunapilla pensarimandami paicunapa munashcata ruran. Shinami ima ali cajta, ima nali cajtapash paicunallata agllan. Jehová Diosmi ñucanchita rurashca. Chaimi ñucanchi pensamientocunata catinapa randica Jehová Diospa mandashcacunata catina capanchi (Rom. 12:1, 2). Jehovapa mandashcacunata catishpaca ñucanchillatami cushilla, tranquilo sintirishun (Is. 48:17, 18). Ñucanchi causaipica Jehová Diosta adorangapaj paita cushichingapami munapanchi (Prov. 27:11).

15. Ñucanchita juyashcataca ¿imashinata Jehová Diosca ricuchishca?

¹⁵ Jehová Dios paipa espíritu santota cushpa yarichijpimi, huaquin gentecunaca Bibliata escribirca. Jehová Diosca ñucanchita juyaimandami Bibliata carashca. Bibliapimi ñucanchi charishca tapuicunamanda yachajui ushapanchi. Por ejemplo: Gentecunaca ¿imashinata tiai callarirca? ¿Imapata causanchi? Jipa punllacunapica ¿imashinata causashun? Jehová Diosca tucui gentecunata juyaimandami cai tapuicunamanda Bibliapi yachachin. Chaimi cai tucui huatacunapica Bibliata ashtaca ashtaca idiomacunapi traducichun ayudashca. Bibliaca tucui librocunatapash yalimi shuj shuj shimicunaman traducishca libro can. Cunanbica Biblia entero cashpa o Bibliapa huaquin partecunallapash 3 mil yali idiomacunapimi llujshishca. Chaimandami gentecunaca maimanda cashpapash, shuj shuj idiomata parlashpapash Bibliamandaca paicunapa propio shimipi yachajuita ushan (“ Africapi tiashca idiomacunamanmi  Bibliata traducin” nishca recuadrota ricupangui).

16. Mateo 28:19, 20​pi nishca shinaca Bibliata Jehová Dios carashcamanda agradicishcataca ¿imashinata ricuchipanchi?

¹⁶ Bibliata Jehová Dios carashcamanda agradicishcataca ¿imashinata ricuchipanchi? Bibliata cada punlla liishpa, liishcapi pensarishpa, ñucanchi causaipi pactachishpami agradicishcataca ricuchipanchi. Shinallata Bibliamanda shuj gentecunaman yachachishpapashmi agradicishcataca ricuchipanchi (Sal. 1:1-3; Mat. 24:14; Mateo 28:19, 20, liingui).

17. a) Cai temapica ¿imatata yachajupashcanchi? b) Cati temapica ¿imatata yachajupashun?

¹⁷ Cai temapica Jehová Dios ñucanchiman cai Alpaguta carashcata, ñucanchi pensamientoguta carashcata, Bibliatapash carashcatami yachajupashcanchi. Shinapash Jehová Diosca ¿imacunatallata ashtahuan carashca? Cati temapica Jehovapa shuj carashcacunamandapashmi yachajupashun.