Jehová Diosta rijsinaca alipachami can

ÑUCANCHI causaipica ¿imapash faltanllu? Taita Diosmanda ashagutalla yachashpaca, tal vez paimanda ashtahuan yachajunami faltanga. ¿Imamandata shina nipanchi? Ashtaca millón gentecunaca Bibliapi parlashca Taita Diosta rijsinami, ñucanchi tucui causaipi ninanda ayudajta cuenda japishca.

Bibliata escribichishca Taita Jehová Diosca ñucanchicuna paita rijsichunmi munan. Chaimandami Salmota escribijca cashna nishpa escribirca: “Cambaj shutica, Mandaj Dios [Jehová] shuti cajta, jahua pachapi causajuj can Dioslla, tucui cai pachata mandajujta yachanajuchun, chashna rurapangui” nircami. Jehová Diosta rijsina ñucanchicunapaca alipachami can. Chaitami Jehová Diosca ali yachan. Chaimandami paica cashna nin: “Ñucami, cangunata Mandaj Taita Dios cani. Ñucami, cangunapaj ali cachun cangunata yachachini”. Shinaca Jehová Diosta rijsinaca ¿imashinata ñucanchicunataca ayudan? (Salmo 83:18, TNM; Isaías 48:17).

Jehová Diosta rijsimandami ñucanchi causaipi imapash pasajpica imata ruranataca ali yachanchi. Shinallata shamuj punllacunapi ali causaigu tianatapash tucui shungu cripanchi. Ashtahuanbash ñucanchicunallatami tranquilo sintirinchi. Shinallata Jehová Diosta rijsinaca cunan punllacunapi tiashca problemacunata arreglai ushachunmi ayudan. Shinapash ¿ima problemacunamandata parlanajupanchi?

¿Imapata causanchi?

Cunan punllacunapi tecnología avanzashpa catijpipashmi, gentecunaca cashna nishpa tapurin: ¿Imapata causanchi? ¿Imata tucugrinchi? Cai tapuicunapa respuestata na tarishpaca ñucanchicuna imashpa causanajushcataca na yachanchimanllu. ¿Shinallatachu gentecunaca nishca? 1990 tucuri huatacunapica, Alemania llactapi huaquin gentecunataca causaimanda imata pensangui nishpami tapuchirca. Chai gentecunamanda chaupica imashpa causanajushcataca na yachanchichu nircami. Chai llactapica tal vez casi tucuicunami shina pensan.

Ñucanchi causaipi imata ruranata na atinashpaca, metacunata churaritaca na ushashunllu. Chaimandami ashtaca gentecunaca shuj título profesionalta charingapaj o ashtahuan chariyangapaj esforzarishca. Shinapash chai cosascunata charishpapash llaquilla, solollami sintirishpa catishca. Huaquin gentecunaca imapa causanajushcata na atinashpami llaquillapacha sintirimandaca causashpa catingapapash ñana munashca. Shuj joven huarmiguta ima pasashcamanda parlashpami International Herald Tribune nishca periodicopica cashna nirca: “Paica tucuita rurai ushashpa, shuj charij charij familiapimi viñarca” ninmi. Shina charij charij cashpapashmi paica llaquilla, solalla sintirimandaca ashtaca pastillacunata ufiashpa huañuchirirca. Quiquinbashmi shina pasashca gentecunataca tal vez rijsipangui.

¿Cientificocunami ñucanchicuna imamanda causanajushcataca explicai ushan nishcataca uyapashcanguichu? Alemania llactapi cada semana llujshi Die Woche nishca periodicopica cashnami nijurca: “Cientificocunapa investigacionguna cabal cashpapash Taita Diosta rijsingapaca na ashta ayudanllu. Evolucionmanda, shuj shuj investigaciongunamanda parlashpapash ñucanchicuna cushilla tranquilo sintirichunga na ayudaita ushanllu” nijurcami. Cientificocunapa investigaciongunamandami causai imashina cashcata yachai chayashcanchi. Shinapash cientificocunaca ñucanchicuna imamanda causanajushcataca na explicai ushanllu. Cientifocunapa nishcacunapilla crishpaca ñucanchicuna imamandapacha causajushcataca na yachashpallatami quedanchiman. Chaimandami Süddeutsche Zeitung, nishca periodicoca cashna nirca “Tucuicunallatami imamanda causanajushcata yachangapaj munapanchi”.

Shinaca ¿pita ñucanchitaca ayudaita ushan? Tucuita Ruraj Taita Diosmi ñucanchicunataca ayudaita ushan. Paimi gentecunataca cai alpapi causachun churarca. Chaimandami ñucanchicuna imamanda causanajushcataca paica ali yachan. Bibliapica gentecunataca cai alpapi mirachun, cai alpata cuidachunbashmi Jehová Diosca rurarca nijunmi. Shinallata gentecunataca alita ruraj cachun, ali yachaj cachun, juyaita ricuchichunbashmi rurashca. Ñucanchicunata imashpa Jehová Dios rurashcata yachaj chayashpaca imamanda causanajushcataca alimi intindipanchi (Génesis 1:26-28).

¿Imatata rurai ushapangui?

Quiquin charishca tapuicunapa respuestata yachangapaca Bibliapi nishcashnaca Jehová Diosta ali ali rijsinami ayudanga. Chaimanda parlashpami Jesusca cashna nirca “na llullaj shujlla Taita Dios cashpami, quiquinba Churi Jesucristotaca cachamuhuarcangui. Shina cajta rijsishpallami, pipash causaita causagringa” nircami. Shinallata ali cualidadcunata charingapaj, Jesús cai alpata ña mandajujpi causana munaitapash charingapami esforzarina capanchi. Shinami imapa causajushcata yachashun. Shinallata shamuj punllacunapi shuj juyailla esperanzatapashmi charishun. Ashtahuanbash ñucanchi tapuicunapa respuestatapashmi taripashun (Juan 17:3; Eclesiastés 12:13).

Quiquin charishca tapuicunapa respuestacunata yachanaca ¿imashinata ayudan? Hans shuti jariguta ima pasashcata ricupashun. * Paica Taita Diosmanda ashagutalla yachashpapash, paipa crishcacunataca paipa causaipica na pactachinllu carca. Paica drogata chupanata, huainayanata, nalicunata ruranata, motocunapi purinatapashmi gushtan carca. Paica ninmi: “cai tucui cosascunata rurashpapash na cushilla sintirijurcanichu”. Hansca 25 huatacunata charishpami Taita Diosta rijsingapaj munashpa paipacha Bibliata lii callarirca. Jehová Dioshuan ali amigo tucushpami paica imamanda causajushcata cuenda japirca. Chaimi paipa causaipi cambiangapaj decidirca. Jipamanga Testigo de Jehová shinami bautizarirca. Hansca cai último 10 huatacunatami Jehová Diosta tiempo completopi sirvijushca. Paica ninmi: “Jehová Diosta sirvishpa causanaca alipachami cashca, chaihuanga imapash na igualanllu. Jehová Diosta rijsinaca ñuca causaipica ninandami ayudahuashca”.

Imamanda causanajushcata yachangapaj munashca jahuapash gentecunaca cai mundopi ashtaca llaquicuna miranajujta ricushpami shuj shuj cosascunamandapash preocuparin.

¿Imashpata shina pasana carca?

Imapash llaqui japijpica gentecunaca ¿imashpata shina pasana carca? nishpami tapurin. Chai llaquita aguantashpa catichunga, imamanda shina pasashcata ali intindinami ayudanga. Shinapash imamanda shina pasashcata na ali intindishpaca gentecunaca llaquilla sintirishpami ashtahuan sufringa. Cunanga Bruni shuti huarmigupa ejemplota ricupashunchi.

Paica ninmi: “Huaquin huatacuna huashamanmi ñuca huahuagu Susanga huañurca. Taita Diospica crinmi carcani. Chaimandami shuj punllaca ayudachun yashpa shuj sacerdotepaman rircani. Chai sacerdoteca canba ushigutaca Taita Diosmi jahua cielopi shuj angelgushna causachun aparca nihuarcami. Ñuca ushigu huañujpica llaqui llaquimi sintirircani. Shinallata ñuca ushiguta Taita Dios apashcamandaca Taita Dioshuanga ninandami culirarcani”. Brunica ashtaca huatacunatami shina sufrishpa causarca. Paica ninbashmi: “Shuj testigo de Jehovami ñuca ushigu huañushcamanda Taita Dios na culpata charishcata Bibliahuan intindichihuarca. Jehová Diosca ñuca ushigu jahua cielopi shuj ángel cachunga na apashca carcachu. Ñuca ushiguca tucuicunashnallata juchayu caimandami shuj ungüi japijpi huañurca. Jehová Diosca ñuca ushigutaca ñallami huañuimandaca cutin causachinga. Shinallata Jehová Diosca gentecuna shuj paraíso alpagupi para siempre causachun rurashcatapashmi yachajurcani. Chaica ñallami pactaringa. Jehová Dios imashinapacha cashcata yachajunami paiman ashtahuan quimirichun ayudahuarca. Shinami tranquila sintiri callarircani” (Salmo 37:29; Hechos 24:15; Romanos 5:12.)

Ashtaca gentecunami paicunapa causaipi problemacunamanda, guerracunamanda, yarjai tiashcamanda o shuj shuj llaquicunamandapash ninanda sufrishpa causan. Brunica cai llaquicunamanda Taita Dios na culpata charishcata Bibliapi yachajushpaca tranquilami sintirirca. Shinallata paica Jehová Dios gentecuna na sufrishpa causachun munashcata, cai llaquicunata ñalla tucuchinatami yachajurca. Cunanbi llaquicuna mirashpa catinajujta ricushpaca tucurimui punllacunapi causanajushcatami cuenda japinchi. Tucui gentecuna munashca shuj ali causaiguca ñallapachami chayamunga (2 Timoteo 3:1-5; Mateo 24:7, 8).

Taita Diostaca ¿imashinami rijsi ushapanchi?

Hans y Bruni Taita Diospi crishpapash paita na ali rijsimandami Taita Diosmandaca panda yuyaicunata charin carca. Shinapash paicunaca Jehová Diosmanda yachajungapaj esforzarishcamandami imamanda causajushcata, imashpa llaquicuna tiashcata yachaj chayarca. Chaita yachanami paicunapa causaipi tranquilo sintirichun, shamuj punllacunapi ali causaigu tianatapash seguro cachun ayudarca. Ashtaca millón Jehovata sirvijcunatami shinallata pasashca.

Jehová Diosta rijsingapaca Bibliatami aliguta yachajuna canchi. Bibliapimi Jehová Diosmanda, Jehová Dios ñucanchicuna imata rurachun munashcatapash yachachin. Jesusta punda catijcunapash Bibliataca aligutami yachajun carca. Chaimandami Grecia llactapi congregacionmanda huauquipanicunamanda parlashpaca, Lucasca cashna nirca: ‘[Pablo y Silas] paicunaman villachinajujpica, ninanda cushijushpami uyanajurca. Shina cashpami: “¿Dios escribichishca Shimipipash, shinallatachu nijun?” nishpa, punllandi aliguta mascashpa liinajurca’ nircami (Hechos 17:10, 11).

Punda tiempopi Jesusta catijcunapashmi tandanajui huasicunapi tandanajun carca (Hechos 2:41, 42, 46; 1 Corintios 1:1, 2; Gálatas 1:1, 2; 2 Tesalonicenses 1:1). Cunan punllacunapipashmi testigo de Jehovacunaca shinallata tandanajun. Chai tandanajuicunaca gentecuna Jehová Diosta rijsichunmi ayudan. Shinallata paita cushijushpa sirvinata yachajuchunbashmi ayudan. Testigo de Jehovacunahuan tandanajunaca shuj shuj cosascunapipashmi ayudan. Gentecuna Taita Diosman rijchata rurashcacuna caimandami paishna ali cualidadcunata ricuchi ushapanchi. Chaita rurangapami testigo de Jehovacunaca ninanda esforzarin. Chaimandami testigo de Jehovacunahuan tandanajunaca Jehová Diosta ashtahuan rijsichun ayudan (Hebreos 10:24, 25).

¿Pitapash rijsingapaca esforzarinachu capanchi? Ari, esforzarinami capanchi. ¿Ñucanchi causaipi imatapash taringapaca ninanda esforzarinaca nachu minishtirishca can? Chaitami pipash shuj campeonatota ganangapaj munashpaca ruran. Entrenajushpaca ninandami esforzarin. Por ejemplo, Francia llactamanda medalla de orota ganashca Jean-Claude Killyca juegos olímpicos nishcapi ganangapaj imatalla rurana cashcamanda parlashpaca cashnami nin: “Chai pugllaicunapi ganangapaca 10 huatacuna faltajpillatami cada punlla entrenashpa, gananapilla pensashpa prepararina can”. Chai tucui tiempota esforzarishca cashpapash chai pugllaica 10 minutocunatallami paranga. Cunanga Jehová Diosta rijsinapi pensaripashunchi. Paita rijsingapaj esforzarinaca ñucanchi tucui causaipimi ayudanga. Shinallata ashtaca bendiciongunatapashmi charishun.

Cada punlla ashtahuan ali amigo tucuna

Ni pipash ñucanchipa causaipi imapash faltachunga na munapanchichu. Imapa causajushcata yachangapaj munashpa, shinallata imamanda ashtaca llaquicuna tiajta yachangapaj munashpaca Bibliapi parlashca Jehová Diostami rijsina capangui. Paita rijsishpaca cunanbi, shamuj punllacunapipash ashtahuan alimi causapangui.

Jehová Diosmanda yachajunaca ¿imahorapash tucuringacha? Ashtaca huatacunata Jehová Diosta sirvijcunapashmi cunangaman Jehová Diosmanda shuj shuj cosascunata ashtahuan yachajushpaca cushilla sintirin. Shinaca Jehová Diosta ashtahuan rijsishpaca, paiman ashtahuan quimirishpami ashtahuan cushilla sintirishun. Apóstol Pablo ima nishcata yaripashunchi. Apóstol Pabloca: “¡Taita Diosca, tucui imatapash charij, ali yuyaita charij, aligutapacha yachajmi! ¡Pai llaquichijujtaca, pipash na yachai ushanllu ¡Imashpa pai chashna rurajujtapash, na yachanllu! “Pai imata yarijujtaca, ¿pita yachai usharca? Na cashpaca, ¿pita paiman ali yuyaita cuj runa tiarca?” nircami (Romanos 11:33, 34).

[Notacuna]

[Comentario]

Cunangamanmi huaquin gentecunaca ¿imapata causanchi? ¿imata tucugrinchi? nishpa tapurin

[Comentario]

“Jehová Dios imashinapacha cashcata yachajunami paiman ashtahuan quimirichun ayudahuarca”

[Comentario]

“Jehová Diosta sirvinaca nimahuanbash na igualanllu. Jehová Diosta rijsinami ñucataca ninanda cushichihuashca”