Ñucanchita Ruraj Taita Diosta alabangapaca espiritual metacunatami charina capanchi

“SIGLO primeropi shuj filósofo romanoca nircami: “Maijan muelleman chayanata na charij barcoca caiman chaiman yangata rijunllami” nishpa. Chaica ciertomi can. Porque causaimandalla causanajuj gentecunaca maijan muelleman chayanata na charij barcoshnami can. Ama shina causangapaca shuj propósito o shuj metata charinami minishtirin.

Bibliapica metata o propositota charishca gentecunamandami parlan. Por ejemplo, Noeca ‘paipa huasipi causajcunandi quishpiringapaj’ o salvaringapami arcataca casi 50 añospi rurashpa tucuchirca. Profeta Moisespash Taita ‘Dios carajpi japinata yariashpami causarca’ (Hebreos 11:​7, 26). Taita Diosmi Josuemanbash Canaán llacta ganashpa chai alpacunata japini ideata curca. Josueca Moisespa catimi Israel llactataca ñaupaman pusharca (Deuteronomio 3:​21, 22, 28; Josué 12:​7-​24).

Apóstol Pablopashmi metacunata charirca. Paica Jesuspa shimicunata yarishpami metacunata charishcanga. Jesusca nircami: “Taita Dios mandajujmanda cai ali villaitaca, cai pachapi tiaj tucui llactacunapi causajcuna yachachunmi villanajunga” (Mateo 24:14). Shinallata shuj viajecarin shuj muscuicunapishna parlashpami Jesusca ‘na israelitacunamanmi ñuca shutipi villagrina’ cangui nishpa apóstol Pablotaca mandarca. Shina nishpa animajpimi apóstol Pabloca tucuilla Asia Menor y Europa llactacunapi mushuj congregaciongunata callarichishpa ayudarca (Hechos 9:​15; Colosenses 1:​23).

Jehová Diosta sirvijcunaca, paita alabangapami ña unaita shuj shuj ali metacunata pactachishca. Shinaca ¿imashinata cunanbipash espiritual metacunata chari ushapanchi? ¿Ima metacunatata charita ushapanchi? Chai metacunata pactachingapaca ¿imatata rurai ushapanchi?

Ali munaicunatami charina capanchi

Ñucanchi causaipica tucuipimi metacunata charita ushapanchi. Mundo enteropi gentecunapashmi metacunataca charin. Pero espiritual metacunaca cai mundopi metacunahuanga diferentemi can. Porque mundopi gentecunaca culquita charinamandalla, autoridadta charinamandalla o shujcunata mandangapallami metacunataca charin. Ñucanchicunapash autoridadta charinamandalla o respetashca canamandalla metacunata charishpaca nalitami ruranajunchiman. Jehová Diosta adorashpa alabangapaj y paipa Gobiernota en primer lugar churangapami metacunataca charina capanchi (Mateo 6:​33). Taita Diosta juyaimanda y shuj gentecunata juyaimandami shina metacunataca charina capanchi. Y chai metacunaca Taita Diosta adorashpa causangapami cana can (Mateo 22:​37-​39; 1 Timoteo 4:​7).

Congregacionbi ashtahuan responsabilidacunata charingapaj y espiritualmente ashtahuan progresangapaj metacunata charinaca alimi can. Pero chai metacunataca ali munaicunahuanmi charina capanchi. Huaquinbica chai metacunata ali munaicunahuan charishpapash tucuilla metacunata pactachitaca na usharinllu. Shinaca metacunata charingapaca ¿imatata rurana capanchi? Chai metacunata pactachingapaca ¿imatata rurana capanchi?

Metacunata pactachina munaita charinaca minishtirishcapachami can

Jehová Dios cai universota imashina rurashcata ricupashun. Paica ‘chishipash’ y ‘tutamandapash’ tiachunmi tiempotaca aliguta separashpa churarca (Génesis 1:​5, 8, 13, 19, 23, 31). Cada imatapash rurai callarigrijushpallatami Jehová Diosca chai tiempopi imatalla rurana cashcata y chaicunata imashina pactachinatapash ali yacharca. Y chai tiempopi imata rurana cashcataca rurarcallatami (Apocalipsis 4:​11). Punda tiempopi Jehová Diosta sirvij Job runagupash Jehová Diosca ‘pai imata rurangapaj munashcataca rurarcallatami’ nircami (Job 23:13). Jehová Diosca paipa tucui ‘rurashcacuna aligupacha cajta ricushpami’ contento, cushijushca cashcanga (Génesis 1:​31).

Ñucanchi metacuna pactarichun munashpaca, metacunata pactachina munaitami charina capanchi. Pero pactachina munaita charichunga ¿imata ayudanga? Callaripica cai alpaca sin forma, shitashcami carca. Pero Jehová Diosca shamuj punllacunapi pensarishpami cai alpataca ña juyailla alpagutashna ricurca. Chashna juyailla alpagumi Jehová Dios alipacha, punchapamba Taita Dios cajtaca ricuchina carca. Ñucanchicunapash shuj metata charishpaca, chai metata imashina pactachinata y chai metata ña pactachishpa ima beneficiota charinatami pensarina capanchi. 19 añosta charij Tonyca, Europa occidentalpi testigo de Jehovacunapa sucursalta por primera visitashcataca nunca na cungarcachu. Chai punllamandapachami caipi causana y caipi sirvinaca imashinashi can yashpa pensarin carca. Sucursalpi canataca pensarijunllami can carca y chai metata pactachingapami esforzarirca. Shinaca huaquin huatacuna jipa, Tonypa solicitudta chasquishpa Betelpi sirvichun invitajpica ¿nacha Tonyca ninandapacha cushijurca?

Shinallata ñucanchi metacunata pactachingapaca paicunapa metacunata pactachishca gentecunahuan llevarina capanchi. Porque shinami ñucanchi metacunata pactachina munaita charishun. Jaysonga cunanbica ña 30 añostami charin. Pai joven cashpaca predicangapaj rinataca na gushtanllu carca. Pero ña colegiota tucuchishpaca precursor regular tucushpami, Taita Diospa Gobiernomandaca a tiempo completo predicai callarirca. ¿Imamandata paica precursor regular tucungapaj munarca? Jaysonga ninmi: “Precursor huauquipanicunahuan parlana y paicunahuan predicangapaj llujshinami ayudahuarca”.

Ñucanchi metacunata shuj papelgupi escribishpa charinaca alimi can

Escribishpami ñucanchicuna imata pactachingapaj munajushcataca ashtahuan yaipi charinchi. Rey Salomonga nircami, aligutapacha yachajushca runacuna rimashca shimicunaca agujahuan tujsinshnami ñucanchi causaipi imata ruranataca ricuchin nishpa (Eclesiastés 12:11). Escribishca palabracunaca tanto ñucanchi mentepipash como ñucanchi shungupipashmi grabarishpa quidaita ushan. Chaimi Jehová Diosca israelita reycunataca cangunapa maquihuan escribishpami Leytaca copiana canguichi nishpa mandashcanga (Deuteronomio 17:18). Shinaca, ñucanchicuna ima metacunata charishcata y chai metacunata imashina pactachinata escribishpa charinaca alipachami can. Ashtahuangarin chai metacunata ama pactachichun ima jarcaicuna ricurinata y chai jarcaicunata imashina mishanatapash escribinaca alipami can. Shinallata ima temacunata estudianata, ima habilidadcunata charina cashcata y chai habilidadcunata charichun picuna ayudai ushashcatapashmi pensarina capanchi.

Geoffreyca Asia llactapa shuj alejado alejado pushtupimi ña ashtaca huatacunata precursor especial can. Paipa huarmiguca cungashcapimi huañurca. Paipa huarmigu huañushcata ña aceptashca jipami Geoffreyca ashtahuan aliguta predicangapaj metacunata churarirca. Ima metacunata charishcata escribishpa y Jehová Diosta ayudahuai nishpa mañashca jipami, quilla nara tucurijpillata quimsa mushuj estudiocunata charingapaj metata churarirca. Cada punllami imata rurashcata repasan carca y cada 10 punllami imapi mejorashcata ricun carca. ¿Paipa metataca pactachircachu? Paica cushijushpami ari pactachircanimi nirca. Y paica na solo quimsa estudiocunatallachu tarirca sino chuscu estudiocunatami tarirca.

Ashalla tiempopi pactachi ushana metacunami imashina progresajushcata ricuchun ayudan

Huaquin metacunaca, callaripica na pactachi ushanashnallami ricurin. Ñaupa parrafocunapica Tonymandami parlarcanchi. Pundacunaca maipash cachun causashcamanda y nara bautizarishca caimandami Betelman rinataca na usharingachu yan carca. Pero Jehová Dios munashcashna causangapami munarca. Chaimi bautizaringapaj requisitocunata pactachina metata churarirca. Ña bautizarishpaca primeroca precursor auxiliar y precursor regular tucuna metatami churarirca. Chaipaca ima fechacunapi callarinataca calendariopi anotashcallami charijurca. Ña unaillaguta precursor regular tucushca jipami, sucursalpi sirvinaca metaca pactachi ushanashnalla ricurirca.

Huaquin metacunataca a largo plazo o unailla tiempogupimi pactachitaca usharin. Chaimi a largo plazo pactachi ushana metacunataca dividishpa shugu shugu pactachishpa rina can. Chai metacunata ashagu ashagu pactachinami a largo plazo metacunata pactachichun ayudan. Chaimandami huaquinbi huaquinbica metacunata imashina ña pactachijushcata ricunaca ali can. Porque shinami a largo plazo pactachi ushana metacunataca yaipi charishun. A largo plazo metacunata pactachinata yaipi charingapaca Jehová Diostapashmi mañana capanchi. Apóstol Pabloca “Taita Diostaca siempremi mañariana capanguichi” nircami. (1 Tesalonicenses 5:​17).

Pactachishapachami yashpa pensana y esforzarinami minishtirin

Aliguta pensarishpa metacunata charishpa y pactachingapaj munashpapash huaquinbica na usharinllu. Juan Marcosta yaripashun. Apóstol Pabloca por segunda vezmi shuj shuj llactacunapi predicangapaj ri callarijurca. Pero Juan Marcos cumbachunga na munarcachu. Chaimi Juan Marcosca ninanda nali sintirishcanga (Hechos 15:​37-​40). Shinapash, Jehová Diosta ashtahuan sirvingapaca shuj cosasta na rurai ushashpaca shuj cosasta rurana cashcatami yachajurca. Jipamanga apóstol Pabloca ali cosascunatami Juan Marcosmandaca parlarca. Y Babiloniapi cashpaca ali ali amigocunami apóstol Pablohuan y Juan Marcoshuanga carca (2 Timoteo 4:​11; 1 Pedro 5:​13). Ashtahuangarin Jesuspa causaimanda y Jesús imashina predicashpa purishcata escribina bendiciondami Juan Marcosca charishcanga.

Huaquinbica ñucanchicunapashmi shuj metata pactachingapaj ninanda esforzarinajunchi. Pero imapash problemacuna ricurijpimi na ushanchi. Shina pasajpi ñana ushashachu yashpa quidanapa randica, chai tiempocaman ñucanchi charishca metata imashina o maicaman ña pactachijushcatami ricuna capanchi. Shinallata chai metapi cutin aliguta pensarishpami imapi cambiana cashcata ricuna capanchi. Imapash jarcaicuna ricurijpica, chai jarcaicuna mishachunga na saquishpami ñucanchi charishca metata pactachingapapacha esforzarina capanchi. Rey Salomonga nircami: ‘Can imatalla ruranatapash, Mandaj Diospa maquipi mingangui. Chashnami, can imata yarijushcapash ali Ilujshinga’ (Proverbios 16:​3).

Ninanda esforzarishpapash huaquinbica nali saludta charimanda o familiapi shuj shuj obligaciongunata pactachina ricurijpimi ñucanchi charishca metacunata pactachitaca na usharin. Shinapash jahua cielopi causana o cai alpapi causana premiota chasquinataca yaipimi cana capanchi (Lucas 23:43; Filipenses 3:​13, 14). Chai premiota charingapaca ¿imatata rurana capanchi? Bibliapica apóstol Juanga nircami: “Cai pachaca, tucui imapash nali munaicunandimi tucurijun. Ashtahuangarin Taita Dios munashcata rurajcunaca, causaitami causanga” (1 Juan 2:17). Imapash problema presentarishcamanda ñucanchi charishca metata na pactachi ushashpapash ‘Taita Diosta manllashpa paipa mandashcacunata pactachitaca’ usharingami (Eclesiastés 12:13). Espiritual metacunata charinami, Taita Diospa munaita pactachinata yaipi charichun ayudanga. Shinaca ñucanchita Ruraj Jehová Diosta alabangapaca espiritual metacunata charishpa chai metacunata pactachipashunchi.

[Recuadro]

Cai metacunatami charita ushapanchi

○ Bibliata cada punlla liina

○ Villajun y Rijcharipaichi revistacunata liishpa al día cana

○ Ashtahuan tucui shunguhuan mañana

○ Taita Diospa espíritu santo pushachun saquishpa ali cualidadcunata charina

○ Jehová Diosta ashtahuan sirvina

○ Ashtahuan aliguta predicana y yachachina

○ Telefonopi, negociocunapi o informalmentepash aliguta predicana