Oracionda rurana: ¿Pitata mañana canchi?
ASHTACA gentecunami ñucanchi oraciongunata piman rurajpipash tucui oraciongunallatami Taita Diosman chayan nin. Religioncunata difindij gentecunapash chai yuyaitallatami charin. Pero chaica ¿Ciertochu can?
Bibliapica na tucui gentecuna Taita Diosta mañan cashcatami ricuchin. Bibliata escribijuj tiempocunapica gentecunaca yanga santocunata, imagencunatami mañan carca. Chaimandami Taita Diosca gentecunataca ama chashna rurachun advirtirca. Salmo 115:4-6pica “Paicunapa yanga dioscunaca rinrita charishpapash na uyanajunllu” ninmi. Shinaca na uyaj dioscunata mañanaca ¿nachu yangallata canman?
Yanga dioscunata imamanda na mañana cashcata ashtahuan intindingapaca profeta Elías imata rurashcata ricupashun. Eliasca ñucaca ñucapa Diostami mañasha. Cutin Baal diosta adoraj sacerdotecunataca quiquingunaca cangunapa diosta mañaichi nircami. Shinami Eliasca paipa Dios ciertopacha Taita Dios cashcata ricuchigrijurca. Chaimi Baal diosta adorajcunaca mañai callarirca. Tauca horascunata ninanda caparishpa mañanajujpipash paicunataca “pipash na parlarcachu, pipash na uyashpa tigrachircachu” (1 Reyes 18:29). Cutin Eliastapash ¿shinallatachu pasarca?
Na shinallata pasarcachu. Elías oracionda rurashcandimi Taita Diosca cielomanda rupajuj ninata cachamushpa Elías cushca ofrendataca tucuillata tucuchirca. Eliaspa oracionga ¿imapita diferente carca? Cai tapuipa respuestataca 1 Reyes 18:36, 37pimi ricui ushapanchi. Chaipimi Elias imashina mañashcata ricuchin. Hebreo manuscritocunata ricushpami chai textocunapica Eliasca quimsa viajecaman Jehová nishpa mañashcata ricuchin.
Baal shuti diosca cananeocunapa diosmi carca. Baal nishpaca dueño o amo nisha ninmi. Cai yanga diostallatami gentecunaca shuj shuj shuticunahuan rijsin carca. Shinapash Jehová shutica shujllami can. Y Taita Diosllami chai shutitaca charin. Paillatami cashna nirca “ñucaca Jehovami cani. Chaimi ñuca shuti can. Ñuca ninanda alicachi tucunataca pimanbash na cushachu” nircami (Isaías 42:8 TNM ).
Shinaca Elias rurashca oracionbash Baalpa profetacuna rurashca oraciongunapash ¿shujlla diosman chayarca ni ushapanchichu? Na, na shujlla diosman chayarcachu. ¿Imamandata chaita nipanchi? Baalta adorangapaca gentecunata huañuchishpami sacrificiocunata ruran carca. Huainayashpa, nali cosascunatallami ruran carca. Chaimandami gentecunaca ashtahuan nalicuna tigranajurca. Shinapash Jehová Diostaca limpio, ali ruraicunahuanmi adorana carca. Shinallata Jehova Diosta adoranami gentecunataca ali causahun ayudarca. Shinapash Eliaspa mañashcacunataca Baalca na uyarcachu, porque chai oraciongunaca Jehová Diospami carca. Cunanga caipi pensaripashunchi: shuj respetashca amigoman cachashca mensajecunatallataca shuj nali personamanga nimamanda na cachanchimanllu. Shina cuendami ñucanchi oraciongunaca Jehová Diospalla cana can.
Elías ricuchishcashnaca na tucui mañaicunachu Jehová Diosmanga chayan
Jehová Diosta mañashpaca tucuita ruraj Taita Diostami mañanajunchi. * Chaimi profeta Isaíasca “can Mandaj Diosmi ñucanchipa taita cangui” nirca (Isaías 63:16). Jehová Diosmanda parlashpami Jesusca paipa catijcunamanga “ñuca Taitaca, cangunapapash Taitami. Ñuca Taita Diosca cangunapapash Taita Diosmi. Paipajmanmi vichai rina cani” nirca (Juan 20:17). Jehová Diosca Jesuspa Taitami can. Jesusca paipa Taita Jehová Diostami mañarca. Jehová Diostallatami paipa discipulocunapash mañana carca (Mateo 6:9).
Bibliapica ¿Jesusta, Mariata, santocunata o angelcunatapash mañana cashcatachu yachachin? Na. Jehová Diostalla mañana cashcatami yachachin. Shuj oracionda rusrashpaca Taita Diosta adoranajushcatami ricuchinchi. Chaimandami Biblipapica Jehová Diostallami adorana canguichi nishpa yachachin (Éxodo 20:5). Shinallata Bibliapica Taita Diostaca ñucanchi “mañanajujtaca, canmi uyajungui” ninmi (Salmo 65:2). Taita Diosca angelcunamanga shuj shuj responsabilidadcunatami cushca. Shinapash ñucanchi mañaicunata uyachunga ni piman na mingashcachu. Ñucanchi mañaicunataca Jehová Diosllami uyajun.
Jehová Dios ñucanchi oraciongunata uyachunga paipa shutipimi mañana canchi. Chaimandami Bibliapica “Jatun Diospaj shutipi mañajcunaca, tucuillami quishpiringa” nin (Hechos 2:21). ¿Shinaca Jehovapa shutipi mañashcamandallachu Jehová Diosca tucui ñucanchi mañaicunata uyanga? O ñucanchi mañaicunata uyachunga ¿imatapash ruranaracha canchi?
^ párr. 9 Huaquin religioncunapica Diosta mañajushpapash paipa shutitaca na ninachu canguichi nishpami prohibishca. Shinapash Bibliapa original manuscritocunapica Jehová shutica 7 mil viajecunatami ricurin. Ashtahuanbachaca Jehovata sirvijcunapa oración rurashcacunapi, Salmo librocunapipashmi Jehovapa shutica ricurin.