República Dominicana llactapimi nacirircani. Chuscu huahuacunamandaca último churimi cani. Ñuca taitacunaca estudiashcacunami carca. Chaimandami ñucanchipash chashnallata estudiashca, shujcunamanda rijsishca cachun munarca. Ñuca naciringapaj chuscu huatacuna faltajpimi ñuca taitacunaca mormongunata rijsirca. Paicuna, limpio limpio ali arreglarishpa purijta ricushpami alicachirca. Tiempo jipaca ñuca familiami República Dominicana llactamandaca Iglesia de Jesucristo de los Santos de los Últimos Días o iglesia mormón nishcaman puri callarirca.

Ñucaca siempremi iglesiapa imapash ruraicunapi participan carcani. Pero ashtahuanbachaca familiacunahuan imashina ali causanata yachachijta, shinallata ali cosascunata yachachijtapashmi gushtan carcani. Mormón caimandaca cushijushcami sintirin carcani. Chaimandami misionero cangapa munarcani.

Ñuca taitacunaca shuj ali universidadpi estudiachun munajpimi 18 huatacunata charishpaca Estados Unidosman causangapa rircanchi. Shuj huata jipami ñuca tiocuna visitangapaj shamurca. Paicunaca testigo de Jehovacunami carca. Shina shamushpami Bibliamanda yachajungapa shuj asambleamanbash invitarca. Shinapash chai tandanajuipica tucuicunallata Bibliapa textocunata mascashpa y anotashpa catijta ricushpami ninanda alicachircani. Chaimandami ñucapash shuj esfero y shuj hojatapash mañashpa anotai callarircani.

Asamblea tucurishca jipami ñuca tiocunaca misionero cangapa munajta uyashpami Bibliata aliguta yachajuchun ayudangapa munanchi nihuarca. Alishnallami uyarihuarca. Porque ñucaca Bibliata yalica Mormón libromandami ashtahuan yacharcani.

Ñuca tiocuna tigrashca jipaca telefonopipashmi Bibliamanda parlashpa catircanchi. Paicunaca siempremi ñuca crishcacunata, Bibliapa yachachishcacunahuan comparashpa ricuchun animahuan carca. Ñucamandallata Bibliapa yachachishcacuna cabal cashcata cuenta urmachunmi munarca.

Ñuca religionbi ashtaca yachachishcacunaca alimi can yarcanimi. Pero Bibliapa yachachishcacunahuan igual cashcataca na seguro carcanichu. Ñuca tiami huata1995 noviembre quillamanda número 8 ¡Despertad! revistata cachamuhuarca. Chai revistapica mormonismo nishca informacionmandami parlajurca. Ñuca iglesiapi yachachishcacunatapash na ali yachashcata cuenta urmashpaca manllarishcami quidarcani. Chaimandami revistapi nijushca cierto cashcata yachangapa munashpa mormonguna charishca página de internetman yaicushpa informacionda mascarcani. Revistapi nijushca ciertomi cashcarca. Ashtahuanbash Utah nishca llactapi huaquin museocunata visitashpacarin ñuca iglesiapi yachachishcacuna Bibliapa yachachishcacunahuan na igual cashcatami ashtahuan cuenta urmarcani.

Siempremi Bibliapash y Libro de Mormón nishcapash Taita Diosmanda yachajungapallatami ayudan yashpa crin carcani. Shinapash Bibliata lii callarishpami Mormón libropi nishcacunahuanga na igual cashcata ricurcani. Por ejemplo, Bibliapica Ezequiel 18:4​pica almaca huañunmi nijunmi. Cutin Mormón Libropica Alma 42:9​pica almaca nunca na huañunllu nijunmi.

Cashna yuyaicunata y shuj yuyaicunatapash ricushpami mormón iglesiapi yachachishcacuna na cabal cashcata cuenta japircani. Mormongunaca jardín de Edenga, Estados Unidospi condado de Jackson nishca pushtupi cashcatami crin. Shinallata iglesiapa profeta nishcacunaca ninmi: “Diospa Reino ña mandajujpica Estados Unidospa banderami caiman chaiman cuyuringa, chaimi tucuicunallata libre cashun, shinallata igual derechocunata charishun” ninmi.

Chaimi shina pasajpica ñucanchi llactahuan y chaishuj llactacunahuanga imashi tucunga nishpa pensarircani. Shuj chishica misionero tucungapaj munaj shuj amigomi cayamuhuarca. Chaimi paitaca cashna nishpa tapurcani: “Canba llactahuan shuj llactahuan guerra tiajpica ¿chaishuj llactapi tiashca mormongunahuan guerrapi macanajuna cajpica paicunahuanbash macanajunguimanllu?” nircanimi. Shina tapuchijpica paica ari nihuarcami. Chaita uyashpaca nali yarihuarcachu. Shinapash iglesiapi yachachishcacunataca investigashpami catircani. Shinallata iglesiata ñaupaman pushajcunatapashmi huaquin tapuicunata rurarcani. Shinapash paicunaca canba tapuicunataca na yachai usharinllu talvez asha ashami chai tapuicunataca yachai usharinga nihuarcami.

Shina nijpica llaquillapachami sintirircani. Chaimi imashpata misionero tucungapaj munajuni yashpa pensarircani. Ñucapaca misionero canaca gentecunata ayudangapa trabajoshnami carca. Shinallata misionero tucujcunaca iglesiapica rijsishca rijsishcami tucun carca, chaimandami misionero cangapa munarcani. Shinapash Taita Diosmandaca ashatallami yacharcani. Huaquin viajecunami Bibliapa huaquin textocunata liishcarcani, shinapash Bibliata yachajuna importante cashcataca na yarcanichu. Shinallata Taita Dios gentecunata para siempre causachun, cai alpatapash shuj juyailla paraisota ruragrijushcatapash na yachashcarcanichu.

Testigo de Jehovacunahuan Bibliata yachajushpami ashtaca cosascunata yachajurcani: Taita Dios ima shuti cajta, gentecuna huañushca jipa ima tucujta shinallata Jesús Taita Diospa munai pactarichun huañuna cashcatapashmi yachajurcani. Por finmi Bibliata ashtahuan rijsi callarircani. Bibliapi yachajushcata shujcunahuan parlanataca ninandami gushtan carcani. Taita Dios tiajtaca siempremi yacharcani. Pero cunansi ñuca mejor amigohuan parlajushcashna Taita Dioshuanga oracionbi parlaita ushani. 12 de julio del 2004 huatapimi bautizarishpa Testigo Jehová tucurcani. Y 6 quillacuna jipaca tiempo completopimi sirvi callarircani.

Nueva York llactapimi testigo de Jehovacunapa Jatun Betelpimi 5 huatacunata trabajarcani. Ashtaca gentecuna beneficiarichunmi, Bibliata ruranapi, shuj shuj publicaciongunata ruraicunapipash ayudarcani. Chaipi ayudai ushashcamanda, ashtaca gentecunata Bibliamanda yachachishpa Jehová Diosta rijsichun ayudai ushashcamandapash cushillami sintirini.