Daniel 2:​44​pica ninmi: ‘Chai jatun mandajcuna mandajui punllacunapimi Taita Diosca ima horapash na tucuchi tucuna mandanata [“reinota”, NM] churanga. Chaitaca, na shuj llacta runacunaman cungachu. Chai mandajmi tucuilla’ mandajcunata ñutushpa tucuchinga. Paica unai unaicamanmi mandajungalla nishpa.

Diospa Reinoca jahua cielopimi can. Jesusmi chaipica Rey can. Cai Alpapi tucui gobiernocunapa cuendaca Jesusmi mandanga. Jahua cielopishna Diospa munai cai Alpapipash pactarichunmi Jesusca mandanga (Mateo 6:​9, 10). Diospa Reinomi unai unaicaman mandajungalla. Ali causai tianata crichunmi Bibliapica nin: ‘Ñucanchita Mandaj, Quishpichij Jesucristoca’ unai unaicamanmi mandajungalla nishpa (2 Pedro 1:11).

Bibliapica ninmi: ‘Satanaspash punchapamba angelshna tucunllami. Shina cajpimi Satanaspajta rurajcunapash [alita] rurajcunashnalla tucushpa purinajun. Chashnacunaca tucurimui punllapimi ninanda llaquichi tucunga’ nishpa (2 Corintios 11:​14, 15).

Chai punllacunapimi tucuicuna yachanga panda religiongunaca Diablopa munaita ruranajushcata. Religionmanda huañuchijcuna o religionmanda imatapash rurajcunaca tucuringami. Shinami, ‘Taita Diosta’ juyajcunaca feta charishpa, tucui shunguhuanbacha alicachishpa, Diospa espíritu yuyaita cujpi’ Taita Diostaca adoranga. Tucui gentecunami tranquilo, cushilla causashun (1 Tesalonicenses 1:9; Efesios 4:5; Juan 4:23).

Bibliaca ninmi: ‘Diosca paicunapa Taita Dios cangapami paicunahuan causajunga. Taita Diosmi tucuilla viquita fichanga. Huañuipash huacaipash llaquipash nanaipash na ashtahuan tiangachu. Punda ima tiashcapash illangami’ nishpa (Apocalipsis 21:​3, 4).

Jehová Diosca paipa Churita mandachun churashpami gentecunamanga chashna ali causaita cunga. Jesusmi ñucanchimanda huañurca (Juan 3:16). Jesús mandajpica gentecunaca jucha illajmi  tucunga. Gentecunahuan ‘Taita Dios cashpami’ paicunapa ‘tucuilla viquita fichanga’. Llaquicunaca tucuringami. Tucui juchacuna, llaquicuna chingarijpica ali gentecunallami cai Alpapica causanga (Mateo 5:5).

Bibliaca ninmi: ‘[Jesusmi] dragón nishca, pundamandapacha causajuj culebrataca japishpa, huaranga huatacaman huatarca. Chai culebrami Diablo nishcapash, Satanás nishcapash carca. Chai diablotaca manllanayai ucu ucu utujuman shitashpami, pungutapash vichashpa sellarca. Llactacunapi causajcunataca huaranga huata pactangacaman ama ashtahuan umachijuchunmi chashna shitarca’ nishpa (Apocalipsis 20:​2, 3).

Diablota demoniocunata ucu ucu utujuman shitajpica ñana gentecunata pandachishpa controlai ushangachu. Diablopash demoniocupash tucurijpimi cushilla, tranquilo causashun.

‘Tucurimui punllacunaca’ ‘ninan manllanai’ llaqui punllacuna tucurijpimi tucuringa. Jesuca nircami: ‘Chai punllacunapica ninan manllanayai llaquimi tianga. Cai pacha tiai callarishca punllamandapacha cunangaman, chashna jatun llaquica nara tiarcachu, jipamanbash na tiangachu’ nishpa (Mateo 24:21).

Ima horapash na tiashca ninan manllanai llaqui punllacunaca ‘Tucui Ushaita Charij Taita Dios ninanda llaquichimui punllapimi tucuringa’ (Apocalipsis 16:​14, 16).

Ali gentecunaca tucui llaquicuna tucurina punllacunatami shuyanajun. Cunanga Diospa Reino mandajpi ima bendicionguna tianata ricupashun.

‘Ashtaca gentecunami’ paraíso Alpagupi tranquilo, ali causanga. Bibliaca ninmi, ‘na cuentai ushanalla ashtaca gentecunami’ ‘jatun manllanai llaqui’ punllacunamanda salvarishpa paraíso Alpagupi causanga nishpa (Apocalipsis 7:​9, 10, 14; 2 Pedro 3:13). Chaipimi paicunaca Taita Diospa Llamagumanda o Jesusmandami salvarinchi ninga (Juan 1:29).

Ñucanchillata ali causangapami Taita Diosmandaca ashtacata yachajushun. Paraíso Alpagupica ‘tucui cai pachami Mandaj Diosta rijsina yuyaihuan jundanga’ (Isaías 11:​9). Taita Diosca shuj gentecunahuanbash animalcunahuanbash tranquilo, aliguta causachunmi yachachinga. Taita Diosca nircami: ‘Ñucami cangunata Mandaj Taita Dios cani. Ñucami cangunapa ali cachun yachachini. Canguna maijan ñanda rinatapash, ñucami ricuchishpa pushani’ nishpa (Isaías 48:17).

Ñucanchi huañushca familiacunapash causaringami. Jesús cai Alpapi cashpaca paipa amigo Lazarota causachircami (Juan 11:​1, 5, 38-44). Shinami Jesusca Diospa Reinopi mandajushpa huañushcacunata causachinata ricuchirca (Juan 5:​28, 29).

Unai unaicamanmi tranquilo, aliguta causashun. Jesús mandajpica nalicunaca tucuringami. Jesusca gentecunapa shungutaca alimi rijsin. Chaimandami picuna ali cajta picuna nali cajtaca ali rijsin. Na cambiangapaj munaj gentecunaca paraíso Alpagupica na causai ushangachu (Salmo 37:​9, 10; Isaías 11:​3, 4; 65:20; Mateo 9:​4).

Imashinami ricupanchi Diospa Reino mandajpica unai unaicamanmi ‘casilla ali causaihuan’ gentecunaca ninanda cushijunga (Salmo 37:​11, 29). Bibliapa shuj profeciacunapash pactarijpimi tucui llaquicuna tucuringa. Taita Diosca nishcami: ‘Ricui ñucami imatapash tucuita mushujta rurani. Ñuca villajushca shimicunataca na llullashpami pactachisha’ nishpa (Apocalipsis 21:​5).