Laura: Mingachihuai tia. Ñuca shutica Laurami can. ¿Quiquinba shutiguca?

Sofía: Sofiami capani.

Laura: Gulpi gentecunamanmi ¿Cai tapuicunata yachangapaj munanguimanllu? nishca tratadoguta saquijupani.

Sofía: ¿Religionmandachu parlajun?

Laura: Ari. 6 tapuigucunatami charin. ¿Ima tapuigutata yachangapaj munapangui?

Sofía: Na munanichu.

Laura: ¿Imamandata na munapangui?

Sofía: Cabalguta nishpaca, Diosca na tianllu yanimi.

Laura: ¿Siemprechu shina pensapashcangui?

Sofía: Na. Uchila cashpaca iglesiaman purinmi carcani. Shinapash unaitami ñana rini.

Laura: Ñuca crishcacunata catichun nishpa obligangapaca na shamupashcanichu. Shinapash ¿imamandata Diosca na tianllu yani nipangui?

Sofía: 17 huatacuna huashamanmi ñuca mamita carropi rijushpa chocarirca.

Laura: Llaquima, mamaca ¿imapash pasarcachu?

Sofía: Ari. Chai horasmandapachami ñana purita ushan.

Laura: Ama llaquitaca nihuanchu. Mamaca ninanda llaquirishcami causanga.

Sofía: Ari. Chaimandami, “Dios tiashpaca ¿imamandata gentecuna chashnapacha su­frichun saquin?” nishpa pensarijunilla.

Laura: Ninanda sufrinajushpaca shina pensanchillami. Ñaupa tiempopi Diosta ali sirvij huaquin gentecunapash shinallatami sintirirca.

Sofía: ¿Cierto?

Laura: Shuj ejemplomanda parlangapaj munapani.

Sofía: Parlapailla.

Laura: Profeta Habacuc Diosta imata tapushcata yachangapaj, Bibliapi Habacuc 1:​2, 3 textocunata liipasha, cashnami nin: “Mandaj Dioslla, ¿ima punllacunacamanda caparishpa mañajujpipash, na uyagrihuangui? Ninandapacha llaquichishcamanda caparishpa villajujpipash, ¿ima punllacunacamanda na quishpichigrihuangui? ¿Imashpata nalicunatara ricuchishpa, llaquicunata ricuchun saquihuangui? Ñuca ñavipica tucuchijcuna, ninandapacha llaquichijcunami ricurin. Fiñanajushpa rimajcuna, maitapash rimarijcunami jatarinajun”. Huaquinbica ¿nachu quiquinbash chashnallata tapuripashcangui?

Sofía: Ari.

Laura: Profeta Habacuc chashna tapujpipash, Taita Diosca paihuanga na culirarcachu. Ashtahuan feta charinami cangui nitallapash na nircachu.

Sofía: Chaitaca na yachapashcanichu.

Laura: Bibliapica yachachinmi, ñucanchicuna sufrijujta ricushpaca Taita Diospash llaquirinmi nishpa.

Sofía: Shinaca ¿Taita Diospash llaquirinllari?

Laura: Ari. Shuj ejemplota Éxodo 3:​7​pi ricupashun. Quiquin liingapaj munapanguimanllu?

 Sofía: Ari liipashallami. “Chai jipapash Mandaj Diosca, cashnami nijurca: Ñuca agllashca gentecuna, Egiptopi llaquita apanajujtaca alimi ricurcani. Shinallata paicunata mandajcuna llaquichinajujpi, paicuna caparinajujtapash uyarcanimi. Paicunapaj ninan llaquicunataca, ñucami yachani.”

Laura: Pagui tia Sofía. Gentecuna llaqui apanajujpica ¿Taita Diosca llaquirinllu?

Sofía: Shinami yarin.

Laura: Taita Diosca na jahua jahuallaca ricujunllu. Ultimopi ima nijujta cutin ricupai: “Paicunapaj ninan llaquicunataca, ñucami yachani” ninmi. Na llaquij Dios cashpaca ¿shina nijunmanllu?

Sofía: Na shina ninmanllu.

Laura: Pipash llaquipi cajpi ricuimandalla ricunapa randica ¿paimanda llaquirina ashtahuan ali canman nachu?

Sofía: Ari.

Laura: Punda tiempopi paipa sirvijcuna llaqui apanajujpi, Taita Dios imata nishcata ricupashun. Isaías 63:​9​pica cashnami nin: “Paicunata ninan llaqui japijpica, tucuipimi Diospash ninanda llaquirijurca” nishpa. Paita sirvijcuna sufrinajujpica ¿Diosca paicunamanda llaquirircachu?

Sofía: Paicunamanda llaquirirca ninmi.

Laura: Shinaca, gentecuna sufrijujta ricushpaca Taita Diosca ninandami llaquirin. Chaimandami ñucanchi llaquilla cajpica paipash llaquirin.

Laura: Nara rishpallata shuj yuyaigutapash parlangapami munapani.

Sofía: ¿Imagutashi?

Laura: Bibliapica Taita Diospa ushaimandapashmi parlan. Jeremías 10:​12​ta liipai.

Sofía: Cashnami nin: “Cai pachataca Diosmi paipa ushaihuan rurarca. Cai pachataca alipacha yachaihuanmi aliguta jilapi churarca. Alipacha yachaihuanmi, jahua pachatapash churarca”.

Laura: Pagui. Cai textomanda ashaguta yachajupashun. Cielotapash, cai Alpatapash, caipi tucui tiashcacunatapash rurangapaca ¿mashna ushaitashi Diosca minishtishcanga?

Sofía: Ashtaca ushaitami minishtishcanga.

Laura: Shinaca, Diosca tucuita rurangapaj ushaita charishpaca ¿nachu llaquicunata tucuchitacarin ushanga?

Sofía: Ari. Tucuchinmanlla yanimi.

Laura: Cunanga quiquinba mamamanda parlapashun. Mama llaquilla cajta ricushpaca ¿imamandata quiquinbash llaquiringui?

Sofía: Ñuca mamitata juyaimandami ninanda llaquirini.

Laura: Quiquinllata jambita ushashpaca ¿na­chu jambinguiman?

Sofía: Ari, jambimanmi.

Laura: Imashinami ricupashcanchi ñucanchi sufrijujta ricushpaca Taita Diospashmi llaquirin. Shinallata llaquicunata tucuchingapaj ushaitapash charinmi. Shinapash ¿imamandashi Taita Diosca llaquicunata nara tucuchin?

Sofía: Chaitaca na yashcanica.

Laura: Shinaca ¿imamandashi ñucanchi llaquicunata nara tucuchishpa shuyajunra? *

Sofía: Na yachapanichu.

Laura: Pichari telefonopi quiquinda cayajun yarin. Shinaca ashtahuan parlangapaj shuj punllagu tigramupasha.

Sofía: Ari, shinacashpaca shamupanguilla.