Naoko shuti huarmiguca ninmi, Taita Diosta rijsishpa, pai imata ruranata yachajushpami tabacotaca saqui usharcani nishpa. Naokoca Bibliatami yachajurca. Bibliapi tabaco shimi na tiajpipash, tabacota chupanamanda Taita Dios imata pensajtaca villajunmi. * Ashtaca gentecunaca Taita Dios imata pensajta Bibliapi yachajushpami tabaco viciota saquishca, cutin shujcunaca shuj viajegullapash tabacota chupanataca na munashca (2 Timoteo 3:​16, 17). Cunanga tabacota chupajcuna ima llaquicunata charijta, Bibliapi imata yachachijta ricupashun.

Tabacoca nicotina nishca drogatami charin. Chai droga ñapash umaman chayajpimi gentecunaca cushilla o llaquilla sintirin. Shuj viajegutalla chupashpallatami cuerpo aguantai ushashca drogata chupanajun. Shinaca, punllapi shuj cajetillata chupadorcunaca cuerpo na aguantai ushashca drogatami chupanajun. Tabacopi nicotina drogata yapata chupaimandami tabacota chupadorcunaca tabacota ninanda minishtin. Tabacota na chupashpaca chujchuita o sudaitami callarin.

Gentecuna aliguta pensachunmi Bibliapica nin: ‘Maijanba [esclavo] tucushpapash ¿nachu paita cazungapaj [esclavo] tucunguichi? Maijanda cazushpa causajushpapash, chaipa [esclavomi] canguichi’ nishpa (Romanos 6:16). ¿Nachu tabacota chupanapilla pensajcuna, o tabacomanda imatapash rurajcunaca tabacopa esclavocuna tucushca? Jehová Diosca gentecuna esclavoshna causashpa paicunapa cuerpota, yuyaicunata huaglichichunga na munanllu (Salmo 83:​18, NM; 2 Corintios 7:⁠1). Gentecunaca Taita Diosta juyashpa respetanata yachajushpami Taita Diosta ali catingapaj munan. Shinallata, Taita Diospa ñaupajpi ali ricuringapaj munashpami tabacota chupana tentaciondapash aguantan.

Alemania llactamanda Olaf shutica 12 huatacunata charishpami tabacota chupai callarirca. Paica 16 huatacunatami tabacota chuparca. Callaripica shuj tabacogutalla chupashpaca na imapash pasashachu yarcami. Shinapash jipa huatacunamanga tabaco viciopimi urmarca. Paica ninmi: “Shuj punllaca tabaco tucurijpimi ansia tabacota munashpa, chupashca tabacocunata tandachishpa periodicopi pillushpa chuparcani. Yarishpallatami pinganayan. Shinapash Taita Dios ñucata alicachishpa ricuchunmi munarcani. Chaimandami Taita Diosta juyashpa, shamuj punllacunapi ali causai tianata yachajushpaca tabacota chupanata saqui usharcani” ninmi.

Shuj libroca ninmi: “Tabacoca casi tucuilla cuerpotami huaglichin. Tabacomandami shuj shuj ungüicuna ricurin, ashtaca gentecunapash huañunajun” nishpa (The Tobacco Atlas). Tucuicunami ricushcanchi, gentecunaca tabacopa culpamanda shungu nanaita charijta, cancerta o pulmonbi imapash ungüita japijta. Organización Mundial de la Saludca ninmi, tabacomandami tuberculosis ungüihuan o imapash ungüihuan contagiarishpa gentecunaca ashtahuan huañunajun nishpa.

Jehová Diosca Bibliahuanmi ñucanchitaca yachachin, ñucanchi causaita, cuerpota, yuyaicunata limpio charichun. Jesusca nircami: ‘Canba Taita Diostaca tucui shunguhuan, tucui almahuan, tucui yuyaihuanmi juyana cangui’ nishpa (Mateo 22:37). Taita Diosca ñucanchi causaita, cuerpota huaglichichunga na munanllu. Taita Diosta rijsishpa, shamuj punllacunapi ali causai tianata yachajushpami Taita Diosta juyashpa, agradicishpa nali viciomandaca caruyai ushashun.

India llactamanda Jayavanth shuti doctorca 38 huatacunatami tabacota chupashpa causarca. Paica ninmi: “Revistacunapimi liin carcani, tabaco ñucanchi cuerpota huaglichijta. Tabacota chupana nali cashcatapash alimi yacharcani. Pacientecunataca ninmi carcani, tabacota chupanata saquinami canguichi nishpa. Gentecunata shina nishpapash tabacota saquitaca na ushanllu carcani. Picha o sujta viajecamanmi tabacota saquingapaj munarcani. Shinapash na usharcanichu” ninmi. Paica ¿imashinata tabacota saqui usharca? Paica ninmi: “Bibliata yachajushpami tabacotaca rato saqui usharcani. Taita Dios ñucata alicachichun munaimandami tabacota saqui usharcani” nishpa.

Tabaco cushnica veneno cuendami can. Tabacota na chupashpapash tabaco cushnita mutijimandami cáncer ungüita o imapash ungüicunata japishpa cada huata 600 mil gentecuna ashtahuanbachaca huarmicuna, huahuacuna huañun. Organización  Mundial de la Saludca ninmi: “Shujcuna chupashca tabaco cushnica maimandami shuj gentecunapa cuerpotaca huaglichin” nishpa.

Jesusca nircami, Taita Diosta tucui shunguhuan juyashca jipaca ‘canba cumba runagutami juyana cangui’ nishpa (Mateo 22:39). Cumba runagu nishpaca familiacunamanda, rijsicunamanda, ñucanchi ladopi causajucunamandami parlajurca. Shinaca tabacota chupashpa tabaco cushnita shitashpaca paicunata na juyashcatami ricuchinajunchiman. Shuj gentecunata juyashpaca na ñucanchipalla ali cashcatachu rurana canchi. ‘Ashtahuangarin shujcunapajpash ali cachunmi imatapash rurana’ canchi (1 Corintios 10:24).

Armenia llactamanda Armen shutica ninmi: “Ñuca familiaca siempremi nin carca, tabacota saqui, tabaco cushnica ñucanchitapashmari unguchin nishpa. Shinapash ñucaca na intindinllu carcani. Bibliata yachajuimanda, Taita Diosta juyaimandami tabacota chupanataca saquircani. Shinallata intindircanimi tabacota chupanaca ñucapajpash ñuca familiapajpash nali cashcata” nishpa.

Olaf, Jayavanth, Armenbash tabacomandami shuj gentecunatapash, paicunapa cuerpotapash huaglichinajurca. Shinapash Bibliata yachajunami paicunataca tabaco viciota saquichun ayudarca. Ashtahuangarin tabaco nali cashcata yachashpapash, Taita Diosta juyaimanda, Taita Diospa ñaupajpi ali ricuringapaj munaimandami tabacotaca saqui usharca. Bibliapi 1 Juan 5:3​pica ninmi: ‘Taita Dios mandashca shimicunata pactachijushpallami paita juyashcataca yachanchi. Pai mandashca shimicunaca pactachi ushanallami’ can nishpa. Huaquinbica Taita Diosta cazunaca na facilchu can. Shinapash Taita Diosta juyashpaca paipa mandashcacunata pactachi ushashunmi.

Jehová Diosca mundo enteropi yachachishpami ashtaca gentecunataca tabaco viciomanda salvarichun ayudajun (1 Timoteo 2:​3, 4). Ñallami paipa Churi Jesusta mandachun churashpa, tucuilla tabaco negociocunata anchuchijpi gentecunaca cushilla, sano causanga (Isaías 33:24; Apocalipsis 19:​11, 15).

Tabacota chupanata na saqui ushashpaca na desanimarinachu capangui. Tabacota chupanamanda Taita Dios imata pensajta yarishpa, Taita Diosta juyashpaca tabacota chupanataca saqui ushanguimi. Testigo de Jehovacunapash cushijushpami quiquindaca Bibliapi consejocunata pactachichun ayudanga. Jehová Dios ayudanata confiajpica paica ayudangami (2 Corintios 4:7).