Bangladés llactamanda Smita * shuti huarmiguca trabajadora, cushi cushimi carca. Cusahuanbash alimi causan carca. Taita Diosmanda yachachinatapashmi gushtan carca. Tucuicunami paitaca alicachin carca. Shinapash cungashcapimi ninanda ungushpa shuj semanapilla huañurca. Paica 35 huatacunatallami charirca. Pai huañujpica paipa familiaca shungu faquirishcami quedarca.

Charlespash paipa huarmipash 35 huatacunatallami charirca. Paicunapash cushi cushi, alimi carca. Paicunaca Estados Unidospillata rijsicunata visitangapami rirca. Shinapash carropi chocarishpami huasimanga ni más na tigrarca. Paicuna huañujpica familiacunapash, rijsicunapash ninandami llaquirirca.

Cai mundopica ashtaca llaquicunami tian. Guerracunapimi soldadocuna, shuj gentecunapash huañun. Nali gentecunapash shujcunataca yangata huañuchinllami. Nali ungüicuna japijpica charijcunapash, pobrecunapash, huahuacunapashmi huañun. Accidentecunapi, terremotocunapi, acapacunapipash ashtaca gentecunami huañun. Ashtahuangarin, tucui ladocunapimi shuj gentecunata nalicachishpa, millanayachishpa ricuj gentecuna tian. Huaquinbica quiquinllatapashchari chashna llaqui apashcangui.

Llaqui japijpimi huaquingunaca nin:

• ¿Imamandata ali gentecunapash llaquicunata charin?

• ¿Taita Dioschu culpata charin?

• Llaquicunaca ¿gentecunapa culpamanda o llaqui tiana cashcamandallachu tian?

• ¿Karma nishcamandachu llaquicunaca tian? ¿Punda causaipi nalita rurashcamandachu paganajunchi?

• Taita Dios ciertopacha tiashpaca ¿imamandata ali gentecunataca na cuidan?

• Llaquicuna, nalicunaca ¿ima horata tucuringa?

Chaita yachangapaca pundapica cai ishcai tapuicunata yachajupashun: ¿Imamandata llaquicunaca tian? ¿Imatata Taita Diosca ruranga?