Diabloca calefonba nali gas cuendami can. Na ricurishpapash gentecunataca ninandami llaquichi ushan. Shinapash na manllanachu canchi. Taita Diospa ayudatami charinchi. Imashina ayudajta ricupashun.

Agllaita ushanchimi. Santiago 4:7​pica ninmi: ‘Diablomanda [“caruyaichi”, NM ]. Chashnami cangunamandaca Diabloca anchuringa’ nishpa. Diabloca ashtaca ushaita charishpapash paipa munaita rurachunga na ñucanchitaca obligai ushanllu. Ñucanchicuna shinlli feta charijpica Diabloca caruyanllami (1 Pedro 5:9). Jesusta quimsa viajecaman pandachingapaj munashpapash na ushashpami Diabloca Jesusta tranquilo saquirca (Mateo 4:11). Ñucanchipash Diablo pandachichunga na saquinachu canchi.

Jehovaman quimirishunchi. Santiago 4:8​pica ninmi: “Taita Diospajman quimirichi” nishpa. Paipaman quimirichunga Taita Diosllatami invitajun. Shinapash Taita Diosman quimiringapaca ¿imatata rurana canchi? Callaripica Bibliata yachajushpami Taita Diosta rijsina canchi (Juan 17:3). Ashtahuan yachajushpaca, ashtahuan ashtahuanmi Jehová Diosta juyashun. Jehovata ashtahuan juyashpaca paita ashtahuan sirvingapami munashun (1 Juan 5:3). Shina rurajpica ¿imatata Jehová Diosca ruranga? Santiago 4:8​pica ninmi, canguna quimirijpica ‘paipashmi cangunapaman quimiringa’ nishpa.

Taita Diosca cuidangami. Proverbios 18:10​pica ninmi: ‘Mandaj Diospa shutica shinlli torreshnami. [Alita] ruraj runa paipaman calpajpica ayudangallami’ nishpa. Shinapash Taita Diospa shutica  suertepa nishca cadenacunashna, pulseracunashnaca na canllu. Taita Diospa shutita respetajcuna ayudachun minishtijpica, siempremi Taita Diosca cuidariajun.

Shuj ali ejemplo. Hechos 19:19​pica Éfeso llactamanda Jesusta catijcuna ima pasashcatami parlan. Chaipica ninmi: ‘Taucacunami yumbu tucungapaj yachajuna librocunata apamushpa, tucuicunapaj ñaupajpi rupachinajurca. Chaicunata cuentata rurajpica, picha chunga huaranga culqui valitashnami rupachirca’ nishpa. * Éfeso llactapi Jesusta catijcunaca valishca librocuna cajpipash brujería librocunataca tucuillatami rupachishpa saquirca. Shina rurashpaca ali ejemplotami ñucanchimanga saquirca. Cunan punllacunapica ashtaca brujería cosascuna, ruraicunami tian. Alishnalla cashpapash brujería cosascuna caimandaca ayacunata cayajuj cuendami can. Chaimandami mashna valishca cajpipash brujería cosascunataca na charina canchi (Deuteronomio 18:10-12).

Callari temapi parlashca Rogelioca 50 huatacunata charishpami Diablo tiajtaca crirca. ¿Imamandata crirca? Rogelioca ninmi: “Bibliata liishpami Diablo cierto tiajtaca crircani. Diablo tiajta yachashpami Diablomanda cuidari usharcani” nishpa.

¿Diablo illaj Alpapi causangapaj munanguimanllu? Bibliapica ninmi, gentecunata pandachijuj Diabloca ñallami ‘azufrehuan rupajuj nina cuchaman shitai tucunga’ nishpa (Apocalipsis 20:10). ‘Azufrehuan rupajuj nina cuchapimi’ shitai tucunga nishpaca, Diablo tucuchitapacha tucuchi tucunatami nijun. Shina pasajpica Jehová Diosta catijcunaca tranquilo, cushillami causashun.

Chai punlla chayamungacamanga Jehová Diosmanda ashtahuan yachajushpa, imata yuyajta yachajushpa catishunchi. * Shina rurashpaca cushijushpami nishun: “Diabloca ñana tianllu” nishpa.