Bibliapica ‘llactacunapash paicunapurami macanajunga’, ‘nali gentecuna tucuchi tucuna tiempo chayamujujpica’ jatun llaquicunami tianga nircami (Mateo 24:3, 7). Año de servicio de 2023 huatapimi cai shimicuna pactarijtaca ricushcanchi. a Guerracuna, terremotocuna, jatun acapanacuna o shuj jatun llaquicuna tiajpipash 100 yali llactacunapimi testigo de Jehovacunaca Jehová Diosta tucui shunguhuan juyashcata ricuchishca. ¿Imashinata chaita rurashca?

 Año de servicio 2023​pica, ñucanchi huauquipanicunataca 200 yali jatun llaquicunami llaquichirca. Huaquingunaca terremotocuna, acapanacunami carca. Cutin shuj llaquicunataca gentecunallatami callarichirca. Chaimandami testigo de Jehovacunaca labores de socorro nishcapa donashca culquimandaca 10 millón yali dolarcunata b utilizarca. Ashtaca huauquipanicunacarin paicunapa munaimi paicunapa llactapi o paicuna causashca pushtupi gentecunata ayudangapaj paicunapa culquiguta utilizashca. Ñucanchi donación culquiguta ishcai jatun llaquicunapi imashina utilizashcata ricupai.

 Nigeria llactapica huaquin pushtucunapimi inundacionguna cutin cutin tiarca. Shinapash, octubre de 2022​pica 10 huatacunapi na tiashca inundaciongunami chai llactataca ashtacata llaquichirca. 676 mil hectárea yali tarpushca alpacunami tucurirca. 2 millón yali gentecunapashmi paicunapa huasimanda rina tucurca. Nigeria llactapa sucursalca llaqui tucushcacunata espiritualmente, shinallata imagupipash ayudangapami ñapash Comité de Socorrota callarichirca.

•   7.505 publicadorcunami paicunapa huasimanda rina tucurca.

•   860 huasicunami tucuritapacha tucurirca o huaglishca quidarca.

•   90 Salón del Reinocuna, shuj Salón de Asambleaspashmi inundarirca.

 $250 mil yali dolarcunatami labores de socorropi utilizarcanchi. Por ejemplo:

•   Micunata, arrozta, frejolta, fideocunatami randircanchi.

•   Colchongunata, chuspipa toldocunata shuj cosascunatapashmi randircanchi.

•   Huaglishca huasicunata cutin shayachingapaj, arreglangapami utilizarcanchi.

 Ñucanchi huauquipanicunaca donaciongunata ali utilizajushcataca ¿imashinata seguro can? Por ejemplo, cada huasitami arreglana o na arreglana minishtirishcataca alipacha ricurcanchi. Shuj huasita cutin shayachina minishtirijpica, shuj sencillo diseñota utilizashpami chai llactapi tiashca materialcunahuan rurarcanchi.

 Ayudata chasquishca huauquipanicunaca ninandami agradicin. Shuj paniguca cashnami nirca: “Inundación tiashcamandami ñucanchi causaica cambiaitapacha cambiarca. Ñucanchipa chagracuna, huasipash tucuritapachami tucurirca. Huauquipanicuna llaqui tiashca punllapacha ayudangapaj shamushcamanda, maipi pacarina pushtuta mascashpa ayudashcamandami ninanda agradicinchi. Sucursal cachamushca micunaguta chasquishpami tranquilo sintirircanchi. Juan 13:34, 35​pi shimicuna ñucanchi causaipi pactarijta ricushpaca manllarishcami quidarcanchi. Ciertopacha juyaica tianmi. Tucui ñuca familiami llaquipi cashca horas ñucanchita ayudangapaj shamushca huauquipanicunataca tucui shungu agradicinchi”.

 Na testigo gentecunapashmi ñucanchi organización ayudajushcataca ricurca. Estado de Bayelsa llactamanda Sabagreia comunidadpa shuj jefeca cashnami nirca: “Mundo enteropica ashtaca organizacionguna o religiongunami tian. Shinapash, testigo de Jehovacunallami cashna cosascunataca ruranguichi […]. Cangunapa organizacionllami mundo enteromandaca alipacha can”.

 Febrero de 2023​pica, Chile llactapica 400 yali incendiocunami ninanda llaquichirca. 430​mil yali hectareacunami ruparca. Chile llactapa minishtirishca cosascunapashmi incendiocunapi tucurirca. Shinallata, más o menos 8 mil gentecunami paicunapa huasita saquina tucurca. Cai llaqui tiai callarishca jipallami sucursalca labores de socorrocunata organizai callarirca.

•   222 publicadorcunami paicunapa huasimanda llujshina tucurca.

•   20 huasicunami tucurirca.

 $200 mil yali dolarcunatami labores de socorropi utilizarcanchi. Por ejemplo:

•   Micunata yacutami randircanchi.

•   Gasolinata, limpieza cosascunata, jambicunatami randircanchi.

•   Huaglishca huasicunatami arreglarcanchi.

 Shuj familiaca paipa huasipash, negociopash tucuilla tucuritapacha tucurishcata ricushpaca ninanda manllarishcami quidarca. Chai familiaca tucui paipa cosascunatami chingachirca. Callari punllacunaca chai familiaca paicunapa huasi cashca pushtupi nima nima na quidashcata ricushpaca ninan llaquillami carca. Shinapash paicunapa huasita cutin shayachijujta ricushpaca asha ashami traquilo sintirirca. Ayudangapaj shamushca voluntariocuna juyaihuan ayudajta ricushpami chai familiaca chai jatun llaquita aguantai usharca. Chai familiaca ninanda cushilla sintirishpami paicunapash shuj voluntariocunahuan shuj huauquipa huasita shayachirca.

 Ashtaca huauquipanicunami ñucanchi organización ayudashcamandaca cushilla sintirirca. Shuj huauquica cashnami nirca: “Jehová Diosca Comités de Socorrocunata churashpaca alipacha arreglotami rurarca. Llaqui tiashca cayandi punllallatami minishtirishca cosascunata ña charircanchi. Chaimandami ñucanchi organización shuj pushtucunapi imashina ayudajushcata liingapaj munanchi. Shinapash, ñucanchitallata llaqui japijpica diferentemi can. Huauquipanicuna Jehová Diospa cualidadcunata ricuchijta ricushpaca ashtahuanmi paipa organizaciondaca juyangui. Paicunaca espiritualmente, emocionalmente, shinallata minishtirishca cosascunata ñucanchicuna charichunmi ashtacata preocuparin. Jehová Dios imashina ñucanchita ayudashcatami ricushcanchi”.

 Cai nali causai tucuringacamanga llaquicunaca ashtahuan mirashpami catinga (Lucas 21:10, 11). Shinapash, ñucanchi rey Jesusca congregaciongunata utilizashpami “tucui punllacuna” ñucanchihuan can (Mateo 28:20). Obra mundialpa quiquingunapa donaciongunahuan, Internetpi donate.dan124.com paginapi donaciongunahuan, quiquingunapa tiempohuan, charishcacunahuan ayudashpami Taita Diospa Gobiernota, paipa Reytapash apoyajushcata ricuchinguichi. Quiquinba donaciongunamandaca ninandami agradicinchi.