1, 2. Runaguna imasaibi imatata tapurinaun.

HUAHUAGUNAGA ashca tapuigunata ranaun. Imata intindichicpiga, mas tapusha catinaun. Paiguna tapushcata cutichicpihuas cuti tapunaun.

² Maltaguna asha, rucuguna ashahuas tucuiguna tapurinchi. Imatata micushun, ima llachapata churarishun, imatata randishun nishachari tapurishcanchi. Manashaga shamungarauc causaiga imashi tucunga nisha tapurinchi. Cai tapuigunata mana yachashaga manachari mascanata munashunzhu.

3. Maican runagunaga imahuata paiguna tapushcata mana mascanaun.

³ Ashca runagunaga balishca tapuigunata ranaun. Chasna ashahuas mana intindinata munanaunzhu. Imaraicu. Maican runagunaga Diosllami yachan nishahuas Diosta mana tapuna ushanchichu ninaun. Imasaibiga profesorguna o iglesiata pushaccunallami yachan ninaun. Shuccunaga pingasha mana mascanallas munanaunzhu. Canga imatata pinsangui.

4, 5. a) Canga imatata tapurishcangui. b) Imahuata can tapurishcata intindinagama mascasha catina angui.

⁴ Tapurishcanguichari: “Causaihuan imata tucunga. Huañushca huasha imashi tucunchi. Imaraicuta ali runagunaga turmintarinaun” nisha. Jesucristoga ali yachachic mara. Chiraicu pai nira: “Canguna Yaya Diosta tapucpi pai cungami, mascasha pai cungaraushcata tupanguichimi” (Mateo 7:7). Chiraicu mana sambayasha, can tapurishcata intindinagama mascasha catipai.

 ⁵ Can tapurishcata intindinagama mascasha catishaga Bibliaibi tupangui (Proverbios 2:​1-5). Biblia yachachishca intindibaglla man. Chasnallata, can yachashcaga cunanllata cushi causaita charingahua yanapai tucungui. Chimandahuas shamuc punzhagunaibi cushi causaita charingui. Cunanga, runaguna tapurishcata yachashun.

6. Runagunaga imaraicuta Diosca ñucanchita mana llaquinzhu ninaun.

⁶ Runagunaga Diosca ñucanchita mana llaquinzhu ninaun. “Dios ñucanchita llaquicpiga alitami causanchima” nisha pinsanaun. Cunanga guerraguna, piñanacui, pugri causai tiyan. Runagunaga ungunaun, turmintarinaun, huañunaunmi. Chiraicu, maicanguna tapurinaun: “Dios ñucanchita sirtu llaquishaga imahuata llaquigunata mana tucuchin” nisha.

7. a) Imaraicuta runagunaga Diosmi turmintachin ninaun. b) Imaraicuta Diosca mana turmintachisha camanzhu ninchi.

⁷ Atun llaquiguna tiyacpiga, iglesiata pushaccunaga imasaibi ninaun: “Camangahua Dios llaquigunata cachai tucushcanchi, pai munacpimi chasna tucushca” nisha. Casna nishaga, Diosmi culpata charin niunguna. Chita uyasha runagunaga Diosca mana ali chashca ninaun. Chasna acpihuas Diosca mana ima uraspas turmintachinzhu. Imaraicuta Dios mana turmintachishcata quirinchi. Bibliaga yachachinmi, Diosca mana pitahuas turmintachinzhu nisha. Job 34:12 nin: ʻDiosca ima mana alita mana ranzhu’. Chimandami, Dios llaquiguna tiyachun saquishahuas paiga llaquigunata mana cachanzhu (Santiago 1:​13 leipai). Caita intindingahua shuc ejemplota ricushun.

8, 9. Ima ejemplota Diosta culpana mana ali ashcata intindichin.

 ⁸ Huahuata yapa llaquic yayata pinsai. Paiga, paiba huahuata ali causangahua yachachin. Cai churi maltayasha, yayata mana casusha huasimanda risha nicpi, yayaga saquinllami. Chihuasha cai maltaga mana alita rasha llaquigunata charin. Imatata ninguima. Cai maltahua llaquigunamanda yayami culpata charin ninguimachu. Yayaga mana culpata charinzhu (Lucas 15:​11-13). Chasnallatami, Yaya Diosta ñucanchi llaquigunamanda yanga culpanaga mana ali chan. Cai yaya shinallata Diosca runaguna mana alita racpi saquishcalla. Chiraicumi, Diosmi turmintachihuan nisha mana pinsana chanchi.

⁹ Diosca llaquiguna tiyachun saquishahuas, paiga yachanmi imaraicu llaquigunata mana tucuchishcata. Biblia, caimanda imata yachachishcata capitulo 11 partibi mas yachangui. Chasna ashahuas, tucui ñucanchi llaquimanda Dios mana culpayuc chan, pai ñucanchita llaquinmi. Chiraicu, paillami ñucanchi llaquigunata tucuchina ushan (Hebreos 4:16).

10. Imaraicuta runaguna huaglichishcata Diosmi alichinga ninchi.

¹⁰ Diosca ucha illac man (Apocalipsis 4:8). Paiga tucuitami alita ran. Chiraicu paita quirina anchi. Randi, runagunaga mana chasna chanaun. Imasaibiga, tucuigunami mana alita ranchi. Maican gubirnu, alita rasha nishahuas, runaguna huaglichishcata mana alichinata ushanzhu. Diosllami tucuita alichinata ushan. Runaguna huaglichishcatas Diosllami alichina ushaita charin. Chimandahuas paiga alichinata munanmi. Diosmi mana ali raigunata huiñai tucuchinga (Salmo 37:​9-11 leipai).

11. Turmintarishcata ricusha Diosca imasata sintirin.

¹¹ Diosca tucui ñucanchi llaquigunata ricusha, imasata sintirin. Bibliaga nin, Diosca alita rac man nisha (Juan 17:25). Paiga mundu intiruibi alita rashcata, mana alita rashcatas ricuunmi. Turmintarishcata ricusha paiga yapacta llaquirin. Callari timpuibi runaguna cai mundui mana alita rashalla causashcamanda Bibliaga nin: Diosca “shungüibi nanarira” nisha (Genesis 6:​5, 6). Diosca mana cambiashcachu (Santiago 1:17). Bibliaga nin, Diosca ñucanchita llaquisha cuiranmi (1 Pedro 5:​7 leipai).

12, 13. a) Runagunata imahuata llaquinchi. b) Munduibi llaquigunata ricusha imasata sintirinchi. c) Imahuata tucui llaquigunata Dios tucuchingaraushcata quirinchi.

¹² Bibliaga ninmi, Diosca pai shina angahua rai tucushcanchi nisha (Genesis 1:26). Chiraicu, Dios shinallata llaquisha, alita ranchi. Por ejemplo, Bibliaga nin “Diosca sirtu llaquic man” nisha (1 Juan 4:​8). Paiga llaquishcamanda imatas ran. Chiraicu, Dios llaquic ashcamanda llaquina shunguta charinchi. Chimandami runaguna turmintarishcata ricushaga llaquirinchi. Diosca runagunamandas mas yalita llaquirin.

¹³ Cunanga caibi pinsai: cai munduibi tucui llaquigunata tucuchina ushaita charishaga, llaquigunata tucuchinguimachu. Indá. Runagunata llaquishcamanda tucuchinguimami. Ñucanchita llaquishcamanda Diosca pai ushaihuan tucui turmintugunata tucuchinga. Punda parti libroibi rimashcata, Dios pactachingaraushcata quiribaglla man. Chasna ashahuas, Dios rimashcata quiringahua, paita mas ricsina manchi.

14. Diosca ima shuti tan. Imahuata Dios paiba shutita rimachun munashcata yachanchi.

¹⁴ Shuc runahuan amigo tucunata munashaga, pundaga imatata ningui. Pundaga camba shutitami rimangui. Chasna acpiga, Diosca shutiyuc chan. Ashca religionguna ninaun Dios o Señor nisha, chasna ashahuas caiga mana quiquin shuti chan. Chiga alcalde o presidente nishca shina man. Diosca paiba shuti Jehova man nin. Bibliaga nin: “Runaguna yachanauchun, camba shuti Jehova acta, canllami tucui allpamanda Astahuan Atun Dios angui” (Salmo 83:18 [shuc Bibliagunaibiga Salmo 82:19bi tiyan]). Diosca paiba shutita ricsisha rimachun munan. Imasata yachanchi. Bibliata quillcaccunaga 7mil yalita Diospa shutita quillcanaura (Exodo 3:15; 6:3). Diosca paiba amigo tucungahua pai shutita rimai tucunchi.

15. Jehova shutiga imatata nisha nin.

¹⁵ Jehova shutiga imata nisha nin. Cai shutiga Dios ima munashcata rasha pactachicta nin. Pai rasha nishcata mana pihuas arcana ushanzhu. Jehovallami cai shutita charina ushan. *

16, 17. a) Jehovaga imahuata Tucui Ushayuc an. b) Jehovaga imahuata Huiñai Causac an. c) Jehovaga imahuata Tucuita Rac an.

 ¹⁶ Ña ricushca shina, Salmo 83:18 Jehovamanda nin: “Canllami Atun Dios angui” nisha. Bibliaga Jehova imasa ashcata yachachin. Por ejemplo, Apocalipsis 15:​3 nin: ʻTucui ushayuc Dios, can rashcagunaga manzhanayacta ricurishca maunguna’. ʻTucui ushayuc’ nishaga Jehova astahuan yali ushaita charishcata nin. Chasnallata 1 Timoteo 1:17 Jehovata nin: “Tucuita mandac Diosca huiñai causac man” nisha. Caita yachashaga  Jehova huiñai tiyashcata intindinchi. Chimandahuas, Apocalipsis 10:6 Diosca huiñaigama causangami nin. Caita yachashaga cushiyanchimi.

¹⁷ Chasnallata Bibliaga nin, Diosca Tucuita Rac man nisha. Apocalipsis 4:11 nin: ʻÑucanchi atun Dios can tucuita rashcanguimi, chiguna can munashcamanda tucushcauna chasnallata cunanbas aungunami. Chiraicumanda balic mangui, tucuimanda yali ahuayachishca mangui, tucui ushaita charingui’. Chiraicumi: angelgunata, estrellagunata, yacu aichata, allpaibi tucui tiyaccunatas, Jehovami rashca ninchi.

18. a) Maican runagunaga imahuata Diospa amigo tucuna mana ushanchichu ninaun. b) Bibliaga Diospa amigo tucunamanda imatata nin.

¹⁸ Maican runagunaga Jehova Dios imasa ashcata yachasha manzharinaun. Yapa ushaiyuc man, ñucanchimanda caruibi asha mana llaqui tucunchichu ninaun. Diosca ñucanchi chasna sintirinata mana munanzhu. Paiga ñucanchi amigo tucunata munan. Bibliaga nin: ʻDios ñucanchimanda mana caruibichu tiyaun’ nisha (Hechos 17:27). Diosca paita ricsichun munan. Can Diosma caillayacpiga, paiga canma “caillayangami”. Jehovahua amigo tucunata ushanguimi (Santiago 4:​8).

19. a) Diospa amigo tucungahua imatata rana angui. b) Jehova imasa ashcamanda imatata mas gustangui.

¹⁹ Diospa amigo tucungahua imatata rana ushangui. Jesusca nirami: ‘Huiñai causanaga Yaya Diosta, Jesucristotahuas ricsisha quirina man’ (Juan 17:​3). Jehovamanda, Jesusmanda mas yachashaga paigunata ricsisha, amigo tucuna ushangui. Chasnallata, huiñai causaita charina ushangui. Caigamaga, “Diosca llaquic” ashcata yachashcangui (1 Juan 4:16). Chasnallata pai imasa ashcata mas yachana ushangui. Bibliaga yachachinmi “llaquisha yanapac, ali Dios, mana ucta piñaric, mana saquic, mana llullac Dios” nisha (Exodo 34:​6). Bibliaga yachachinmi “alita rasha perdonaclla Dios man” nisha (Salmo 86:​5). Chimandahuas, Diosca chapac, pactachic man (2 Pedro 3:​9; Apocalipsis 15:​4). Bibliata estudiasha Jehova imasa ashcata mas yachangui.

20, 21. Diosta mana ricushahuas imasata paiba amigo tucuna ushangui.

²⁰ Diosta mana ricushaga imasata paiba amigo  tucuna ushangui (Juan 1:18; 4:24; 1 Timoteo 1:17). Bibliata leisha, Jehova sirtu Dios ashcata intindingui (Salmo 27:​4; Romanos 1:20). Jehovamanda mas yachashaga paima caillayasha astahuan llaquingui.

²¹ Chasnallata, Jehova ñucanchita llaquic yaya ashcata yachangui (Lucas 11:2). Jehovami causaita cushca, chimandami ñucanchi ali causanauchun munan. Huahuagunata llaquic yaya shina man (Hechos 17:28). Bibliaga Diospa amigo tucuna ushanguimi nin (Santiago 2:23). Yuyari, Tucuita Rac Dios camba amigo tucunata munan.

22. Bibliata estudianata saqui nicpiga, imatata rana angui.

²² Imasaibiga maican runagunaga Bibliata estudianata saqui ni tucunguimi. Religionmanda cambiaringami nisha chari pinsanaun. Chasna ashahuas, Diospa amigo tucunata runaguna mana munacpiga imatata rana angui. Jehovata ama saquinguichu. Diospa amigo anaga yapa balishca man.

23, 24. a) Imaraicuta tapusha catina angui. b) Catic capituloibiga imatata yachashun.

²³ Bibliata estudiaushaga, maicanbiga mana tucuita intindinguichu. Mana intindishaga tapunguilla. Jesusca huahuaguna shina mansu shunguyuc ana manguichi nira. Punda partibi ricushca shinaga huahuagunaga ashca tapuigunata ranaun (Mateo 18:​2-4). Diosca can tapushcata intindichun munan. Chiraicu Bibliata alita intindina yuyaihuan yachai. Chasnallata can yachaushca sirtu ashcata riparasha ricui (Hechos 17:11 leipai).

²⁴ Jehovata mas ricsina munashaga Bibliata estudiana man. Catic capituloibiga, imaraicu Biblia yapa ali libro ashcata yachashun.