1. Cai capituloibiga ima ricsishca oracionmandata yachashun.

ASHCA huaranga runagunami padrenuestro oracionda ricsinaun. Jesusca cai padrenuestro oracionda rimasha paiba apostolgunata Diosta mañanata yachachira. Cai mañashcaibiga Jesusca imata tapura. Imaraicuta cai mañashcata alita intindina anchi.

2. Jesusca ñucanchi mañausha imata mañachunda yachachira.

² Jesus nirami: ‘Yaya Dioshuan cuintausha casna rimana manguichi: ‘Ñucanchi ahuapachaibi tiyac Yaya, camba shuti balichishca achun. Camba ali mandana shamuchun. Ahuapachaibi can munashcata rashcacuinta cai pachaibihuas chasnallata rashca achunʼ’ (Mateo 6:​9-​13 leipai). Jesusca imahuata cai quimsa rimashcata mañachun yachachira (nota 20​ta ricui).

3. Cai capituloibi imata yachashun.

³ Yaya Diospa shuti Jehova acta yachashcanchi. Chasnallata, imaraicu Dios cai Allpata, runagunatas rashcata yachashcanchi. Chasna ashahuas, “camba ali mandana” shamuchun nishaga ima nishata chasna nira. Cai capituloibiga Diospa Reino ima acta, Diospa shutita cai Reino imasa alichingarauta yachashun.

4. a) Diospa Reinoga ima tan. b) Reinoibi mandac Reyga pi tan.

⁴ Diospa Reinoga Jehova cieloibi churashca gubirnu man. Diosmi Jesusta chi Reinoibi mandac Reyta  shina churashca. Bibliaga nin Jesusca ‘tucui mandac gubirnugunamanda, mas yali Atun Mandac amu man. Tucui mandac runagunata Mandac manʼ (1 Timoteo 6:15). Jesusca runa gubirnumandas mas yalita ñucanchita yanapanga. Chasnallata, Jesusca tucui gubirnugunamandas mas yali ushaita charin.

5. a) Diospa Reinoga imatata mandanga. b) Cai Reinoga maimandata mandangaraun.

⁵ Jesusca causarisha 40 punzhaguna huasha cieloma tigrara. Unaimaga Jehova cai Mandanaibi Jesusta Reyta shina churara (Hechos 2:​33). Diospa Reinoga cielomanda cai Allpata mandanga (Apocalipsis 11:15). Chiraicu, Bibliaga nin Diospa Reinoga ‘ahuapachama pai mandanaʼ nisha (2 Timoteo 4:18).

6, 7. Jesusca imahuata tucui gubirnumandas mas ali gubirnu an.

⁶ Bibliaga nin, Jesusca tucui gubirnumandas mas ali mandac man. Chiraicu ‘mana cuti huañungachuraunʼ (Romanos 6:9). Tucui runa gubirnugunaga huañusha tucurinaun. Jesus randiga huiñai causanga. Chiraicu tucui Jesus ñucanchiraicu rangaraushcaga mana ima uraspas tucuringachu.

⁷ Chasnallata, Bibliaga nin Jesusca ali mandac, llaquisha ricuc Rey manga nisha. Shuc profeciaga Jesusmanda caita nin, Jesusca “Jehovahua espirituta, ali yuyaita, ali yachaita, alita yachasha causanata, ali cunaita, ushaitahuas charinga”. Chimandahuas ninmi: “Paiga ñahui ricushcamandalla mana taripangachu, rinrihuan uyashcamandalla mana piñangachu. Mansu shunguyuc runagunata alita taripanga” (Isaias 11:​2-4). Chasna ali mandac Reyta charina munanguichu.

8. Jesus mana pai sapalla mandangaraushcata imasata yachanchi.

 ⁸ Bibliaga nin Diosca maican runagunataga Jesushuan cielomanda mandangahua anllashcata. Por ejemplo, apostol Pabloga Timoteota nira: ‘Ahuantasha catishaga Jesushuan pariu mandangaraunchiʼ (2 Timoteo 2:12). Masna runagunata Jesushuan mandangauna.

9. a) Masna runagunata Jesushuan mandangauna. b) Jehovaga 144.000 runagunata ima urasta anllai callarira.

⁹ Capitulo 7bi yachashca shina, apostol Juanga Jesusta Rey tucusha 144.000 runagunahuan aucta muscuibi shina ricura. Cai 144.000 runagunaga piguna tanaun. Juanllata rimai tucunchi: “Paigunaga Oveja [o Jesus] maita ricpihuas paihuan pariulla puriunguna”. Chasnallata nirami paiguna ‘tucui quishpichishca runagunamanda punda anllashca manauraʼ (Apocalipsis 14:​1, 4 leipai). Cai textoibi oveja nishcaga Jesus man. Chasnallata 144.000 Diosta casuc runagunaga, Jesushuan cai Allpama mandangahua Dios anllashca manaun. Paiguna huañushaga espiritu shina cieloibi causarinaun (Apocalipsis 20:​4, 6). Jehovaga 144.000 runagunata apostolguna punzhamanda anllai callarishca.

10. Jehovaga imasata ñucanchita llaquishcata ricuchira.

¹⁰ Jehova ñucanchita yapacta llaquishami, anllashca runaguna Jesushuan mandachun saquishca. Chasnallata, Jesusca runa shina turmintaric asha ali mandac anga. Apostol Pabloga ñucanchi “turmintarishcata” Jesus yachasha intindinmi nira (Hebreos 4:15; 5:​8). Chasnallata, 144.000 runagunahuas uchamanda, ungüigunamanda turmintaric asha ñucanchi imasa sintirishcata intindinaun. Chiraicu, Jesus y 144.000  runagunahuas ñucanchi llaquigunamanda imasa sintirishcata intindingaunami ninchi.

11. Jesusca imahuata cieloibi Diospa munai pactarichun nisha mañanata yachachira.

¹¹ Jesusca paiba discipulogunata Diospa munai cai Allpaibi, cieloibihuas pactarichun nisha mañanata yachachira. Imahuata Diospa munai cieloibi pactarichun nisha mañana anaura. Capitulo 3​pi Supai Diospa enemigo tucushcata yacharanchi. Jehovaga Supai paiba demoniogunatahuas cieloibi anauchun nisha shuc ratuta saquiralla. Chiraicu, cieloibi mana huingunachu Diospa munaita pactachic anaura. Capitulo 10​pi Supai paiba demonioguna ima acta mas yachashun.

12. Apocalipsis 12:10​pi ima tucungaraushcata riman.

¹² Bibliaga ninmi, Diospa Reinoibi Jesus Rey tucushca huasha Supaihuan macanacunata (Apocalipsis 12:​7-​10 leipai). Apocalipsis 12:10​pi ishcai balishca yuyaigunata riman. Pundaga Jesucristo mandangahua callarira. Chihuasha Supaita cielomanda surcusha cai Allpama cachara. Cai ishcai rimashcaga ña pactarishcami.

13. Supaita cielomanda llucshichicpiga imata tucura.

¹³ Supaita paiba demoniogunata cielomanda llucshichicpiga angelgunaga ashcata cushiyanaura. Bibliaga ninmi: “Ahua pachaibi causaccuna cushiyaichi” (Apocalipsis 12:12). Cunanga Diospa munaita pactachisha cieloibi tucuiguna tandarisha cungailla causanaun.

14. Supaita cielomanda llucshichisha cachashca huasha cai Allpaibi imata tucushca.

¹⁴ Chasna ashahuas, Allpaibi causanaga yapa llaqui  causana man. “Supaiga pai munashcata rana uras ña tucuriushcata yachasha yapa piñarishca” an (Apocalipsis 12:12). Supaiga cielomanda llucshichisha cachashca asha, huañungaraushcata yachasha yapacta piñarishca an. Chiraicu tucui runagunata llaquichisha turmintachin.

15. Diosca Allpaibi imatata rangaraun.

¹⁵ Diosca Allpaibi pai munashcata rasha nishcataga mana cambiashcachu. Jehovaga Allpata sumac paraisota rashcaibi runaguna ucha illac tucusha huiñai causanauchun munan (Salmo 37:29). Diospa Reinoga imasata cai tucuita pactachinga.

16, 17. Daniel 2:44 nishca profeciaga Diospa Reinomanda imata yachachi tucunchi.

¹⁶ Bibliaibi Daniel 2:44 profecia nin: “Chi reygunahua punzhagunaibiga, ahua pachamanda Diosmi shuc Reinota churanga, mana ima urashuas tucuringachu. Chi Reinoga mana maican llactamas pasachishca angachu. Chi tucui reinogunata cutasha chingachinga, paillatami huiñaibac tiyasha catinga”. Cai profeciaga Diospa Reinomanda imata yachachi tucunchi.

¹⁷ Pundaga, Diospa Reino “chi reygunahua punzhagunaibi” mandai callarinata yachachi tucunchi. Chiga nisha ninmi Diospa Reino mandai callarishcaibiga, Allpaibi runa gubirnuguna chara tiyanata. Chasnallata Diospa Reinoga mana ima uraspas tucuringachu, mana maican gubirnugunahuas paita binsingaunachu. Chimandahuas nin, cai munduibi tiyac gubirnuguna Diospa Reinohuan macanacunata. Diospa Reino runa gubirnugunata binsisha, pailla cai Allpata mandanga.  Cai rimashca profecia pactaricpiga tucui runaguna ali mandac gubirnuta charingauna.

18. Diospa Reino, runa gubirnugunahuan macanacuna guerraga ima shuti tan.

¹⁸ Runa gubirnuguna Diospa Reinohuan, chara mana guerra callarigllaita imata tucunga. Demonioguna “cai mundui mandauc amugunata tandachingauna yapa ushac Dios turmintachina guerraibi” pandachingahua. Cai guerraga Armagedon nishca man, cai guerraibi runa gubirnuguna Diospa Reinohuan macanacungauna (Apocalipsis 16:​14, 16; nota 10​ta ricui).

19, 20. Diospa Reinotaga imaraicuta minishtinchi.

¹⁹ Diospa Reinotaga imaraicuta minishtinchi. Cunan punzhaibiga uchayuc asha ungusha huañunchi. Diospa Reinoibiga huiñaimi causashun. Bibliaga ninmi: “Yaya Diosca cai pachai causac runagunata yapa llaquishcamandami paihua sapalla churita caima cachara, tucui paita quiric runaguna ama [...] chingarinauchun, astahuanbas huiñai causaita charinauchun” (Juan 3:16).

²⁰ Cai munduibiga yapa mana ali runaguna causanaun. Ashca runaguna llullasha, umachisha, mana ali causaita charinaun. Chita ricusha mana imatas rana ushanchichu. Chasna ashahuas, Jehovaga cai runaguna mana cambiacpiga Armagedon guerraibi tucuchinga (Salmo 37:10 leipai). Chasnallata runa gubirnugunaga ñucanchita yapa llaquichisha, llullasha, runaguna llaquigunata mana alichina ushanaunzhu. Chimandahuas gubirnugunaga runagunata Diosmanda caruyachinaun. Chiraicumi Bibliaga nin, “runaga runallatata dañungahua mandashca” (Eclesiastes 8:​9).

21. Cai Reinoga imasata Diospa munaita Allpaibi pactachingahua yanapanga.

 ²¹ Armagedon Guerra huasha, cai Reino Diospa munaita cai Allpaibi pactachingahua yanapanga. Por ejemplo, Supai paiba demoniogunahuan tapashca tucungauna (Apocalipsis 20:​1-3). Unaimaga mana pihuas ungusha huañungaunachu. Jesus quishpichishcamanda, tucui Diosta casuc runaguna sumac paraiso Allpaibi huiñai causashun (Apocalipsis 22:​1-3; nota 21​ta ricui). Chasnallata cai Reinoga runaguna Diospa shutimanda mana ali rimashcata alichingaraun. Cai Reino cai Allpata mandacpiga tucui runagunami Diospa shutita respetangauna.

22. Jesus cai Allpai aushcaibi, cieloma rishca ratu mana mandai callarishcata imasata yachanchi.

²² Jesus Allpai aushcaibiga paita caticcunata, “camba ali mandana” shamuchun nisha mañanata yachachira. Chi timpuibi Diospa Reinoga chara mana shamushca chara. Pundaga Jehova chi gubirnuta churasha Jesusta Rey shina shutichina mara. Jehovaga Jesusta cieloma  tigrashca ratuchu Reyta shina shutichira. Mana. Jesusca chapana mara. Jesus causarishca huashalla Apostol Pedro y Pablo caita intindichinaura. Paigunami Salmo 110:1 nishca Jesuspi pactarishcata intindichinaura. Cai profeciaibiga Jehova nirami: “Ñuca ali maqui partibi tiyarilla canda piñaccunata binsinagama” (Hechos 2:​32-35; Hebreos 10:​12, 13). Jesusca Jehova Dios Reyta shina shutichinagama chapana ara.

23. a) Jesusca ima urasta Diospa Reinoibi Rey shina mandai callarira. b) Catic capituloibi imatata yachashun.

²³ Jesusca ima urasta mandai callarira. 1914 huataibi mandai callarira. Ashca huataguna huashama, Jesusta caticcuna 1914 huataibi balishca profecia pactarinata intindinaura. 1914 huatamanda ima tucushcata yachasha, Jesusta ñaupa caticcuna sirtuta rimashcata intindinchi. Jesusca chi huataibimi mandangahua callarira (Salmo 110:​2; nota 22​ta ricui). Chi huashalla Supaita Allpama shitai tucura. Cunanga “pai munashcata rana uras ña tucuriunmi” (Apocalipsis 12:12). Catic capituloibi tucuriu punzhagunaibi causaushcata mas yachashun. Chasnallata cai Reino nalla Diospa munaita cai Allpaibi pactachingaraushcata yachashun.