1. Mundu tucurinamanda imatata yachanchi.

NOTICIATA ricusha tapurishcanguichari: “Cai munduga imashi tucunga”. Manzhanaita llaquiguna, mana alita rasha turmintachic runaguna tiyashcamanda, Diospa huañui shamusha ñami mundu tucuringaraun ninaun. Chiga sirtu chan. Shamungarauc punzhaibi ima tucungaraushcata yachana ushanchimi. Runaguna cai mundu ima tucungaraushcata mana yachacpihuas Jehova Diosca yachanmi. Bibliaibiga ñucanchi causai ima tucungaraushcata, Allpa ima tucungaraushcatas rimanmi (Isaias 46:10; Santiago 4:14).

2, 3. a) Jesuspa discipulogunaga imatata yachana munanaura. b) Jesusca imatata nira.

² Bibliaibi Diospa huañui shamusha mundu tucuringaraun nishcaga mana cai Allpa tucurinatachu nin, randi mana alita rana tucuringaraushcata nin. Caiga imasata pactaringa. Jesusca nirami, Diospa Reino cai Allpata mandanata (Lucas 4:43). Paiba discipulogunaga cai Reino ima uras shamunata yachana munasha Jesusta tapunaura: ‘Ima urasta can ñucanchita rimashcaga pactaringa. Cai pacha tucuriushcai can shamuna uras pactariupiga ima tunuta ricuringaraun’ (Mateo 24:​3). Jesusca ima fechaibi shamunata mana rimarachu. Chasna acpihuas, cai mana ali mundu chara mana tucurigllaita ima pasangaraushcata nira. Jesus rimashcaga cunan ña pactariunmi (nota 24​ta ricui)

³ Cai capituloibiga cai mana ali mundu tucurina punzhai  causaushcata ricushun. Chasna ashahuas, cai mundu imaraicu mana ali aucta intindingahuaga cieloibi guerra tiyashcata intindina anchi.

4, 5. a) Jesus cieloibi mandai callarishca huashallaga imata tucura. b) Apocalipsis 12:​12 nishca shinaga Supaita binsicpiga Allpaibi imata tucura.

⁴ Capitulo 8ibiga Jesus 1914 huataibi mandai callarishcata yacharanchi (Daniel 7:​13, 14). Apocalipsis libro chi huata huashahualla ima tucushcata riman: ‘Shuc atun macanacuna ahuapachaibi tiyara. Mandauc angel Miguelmi paihua angelgunandi dragonhuan macanacunaura. Chasnallata dragonbas paihua angelgunandi Diospa angelgunahuan macanacunaura’. Miguelga Jesus man. Dragonga Satanas man. * Supaita paiba demoniogunatahuas Jesus binsisha Allpama tucsira. Chiraicu, angelgunaga ashcatami cushiyashca angauna. Randi, Allpaibi causac runagunaga imashi tucuna anaura. Bibliaga nin, Supai yapa piñarisha Allpama shamushcamanda runaguna yapa turmintarinata. “Supaiga pai munashcata rana uras ña tucuriushcata” yachanmi (Apocalipsis 12:​7, 9, 12).

⁵ Supai rashcagunata Jehova nalla tucuchingaraushcata yachasha, yapacta piñarisha runagunata turmintachiun. Tucuric punzhagunai ima tucunata Jesus rimashcata yachashun.

6, 7. Guerramanda, raicaimanda imatata yachanchi.

⁶ Guerraguna. Jesusca nirami: “Shuc llacta shughuan piñanacungaunami, chasnallata shuc partimanda runaguna shuccunahuan macanacungaunami” (Mateo  24:​7). Mana ima uraspas guerramanda cunan shina ashca runaguna huañushcaunachu. Mundu intiruibi ima tucuushcata estudiac organizacionga, 1914 huatamanda 100 millon yali runagunami guerraibi huañushcauna nira. 1900manda 2000 huatagama guerramanda manacailla ashca runagunachu huañunaura. Ashca huaranga runagunami cai guerramanda shungu nanarisha turmintarishcauna.

⁷ Raicai. Jesusca nira: ‘Raicaiguna tiyangami’ nisha (Mateo 24:​7). Cunan timpuibi, micuna ashca tiyacpihuas, runagunaga caran punzha raicaihuan causanaun. Imaraicu. Cullquita mana charishcamanda o tarpuna allpata mana charishcamanda. 1.000 millon yali runaguna shuc punzha micungahua shuc dolarllahuas mana charinaunzhu. La Organizacion Mundial de la Salud nishcaga ashca huaranga huahuagunami raicaimanda caran huataibi huañunaun nin.

8, 9. a) Allpa cuyunamanda Jesus rimashcaga imasata pactarishca. b) Ungüigunamanda imatata yachanchi.

⁸ Allpa cuyuiguna. Jesusca nirami: “Ashca cutin allpa sinzhita  cuyungami” (Lucas 21:11). Caran huataibi, ashca allpa cuyuita chapanchi. 1900 huatamanda ishcai millon yali runagunami allpa cuyuibi huañushcauna. Allpa ima uras cuyunata musiachun aparatogunata rashca acpihuas, allpa cuyuimanda ashca runaguna chara huañuunguna.

⁹ Ungüiguna. Jesusca ‘huañuna ungüiguna’ tiyangami nira. Manzhanaita ungüi mirarishami ashca runagunata huanchishca (Lucas 21:11). Doctorguna ashca ungüigunata ambic acpihuas, mana huingunatachu ambina ushanaun. Astahuanbas, shuc informe nishcaibi, tuberculosis, colera, malaria, paludismo ungüimanda caran huataibi ashca huaranga runaguna huañunaun nira. Chasnallata, cai 40 huataguna pasashcaibi, chican sami 30 ungüiguna llucshishca, maican ungüigunaga mana ambibac chanaun.

10. 2 Timoteo 3:​1-5ibi nishca shinaga, tucurina punzhagunaibi runaguna imashina tangauna.

¹⁰ 2 Timoteo 3:​1-5ibi Bibliaga nin: ‘Tucurina punzhaguna  caillayamucpi yapa turmintarina tucungaʼ. Apostol Pabloga tucuric punzhagunaibi casna runaguna tiyangauna nira:

• Amullaibi yuyaringauna.

• Cullquita yapa munangauna.

• Yaya, mamata mana casungauna.

• Dios munashcata mana yuyaric tucungauna.

• Ailluta mana llaquingauna.

• Aicha munashcata rasha causangauna.

• Yapa piñasha macac tucungauna.

• Diosta llaquina randiga, mana imaibis balicta rasha causangauna.

• Diosta llaquinimi nishahuas, paita mana casungauna.

11. Salmo 92:​7 nishca shinaga, mana ali runagunahuan imata tucunga.

¹¹ Can causashcaibi runaguna chasna chanaun. Mundu intiruibi chasna runaguna tiyanaun. Chasna acpihuas, Jehovami alichingaraun. Paiga ninmi: “Mana alita rac runaguna quihua  shina huiñacpi, tucui huaglichiccuna sisa shina ricuricpi, huiñai chingaringahua manga”. Chiga mana ali runaguna huiñai chingarinata nin (Salmo 92:​7).

12, 13. Jehovaga tucuric punzhagunaibi imatata yachachi tucushcanchi.

¹² Bibliaga ultimo punzhagunaibi turmintu causai tiyanga nin. Chasna acpihuas, chi punzhagunaibi ali gustu cuintaiguna tiyangami nira.

¹³ Bibliata pasacta intindishun. Profeta Daniel tucuric punzhagunamanda quillcashaga nirami: “Sirtu yachaiga yapacta miraringami” (Daniel 12:​4). Diosca paita sirviccuna Bibliata pasacta intindingahua yanapanga. 1914 huatamanda caiga pactarishcami. Cunan, Diosca paiba shuti imaraicu balic acta, Allpata imata rana munashcata yachachi tucushcanchi. Chasnallata, Jesus paiba causaita cusha quishpichishcata, huañusha ima tucushcata, huañushcaguna causarinatas Dios yachachishca. Chimandahuas, Diospa Gobiernolla tucui ñucanchi llaquigunata tucuchinata yachashcanchi. Astahuanbas, Dios munashca shina causasha, cushi anata yachashcanchi. Chasna acpihuas, Diosta sirviccunaga paiguna yachashcahuan imatata ranaun. Shuc profecia caita cutichin (nota 21 y 25​ta ricui).

14. Maibita Diospa “cushi shimita” yachachiunguna, pigunata caita raunguna.

¹⁴ Mundu intiruibi Bibliamanda cuintangauna. Tucuric punzhagunamanda cuintasha Jesus nira: “Tucui mundui chi cushi shimita camachishca tucungami” (Mateo 24:​3, 14). Diospa Reinomanda ali gustu cuintaigunataga 240 llactagunaibi, 900 yali shimigunaibi yachachiunguna. Mundu intiruibi “tucui runa muntunmanda,  [...] tucui llactagunamandas” Jehovahua testigoguna, Diospa Reino runagunamanda imata rangaraushcata yachachiunguna (Apocalipsis 7:​9). Jehovahua testigogunaga shungumanda yachachisha mana cobranaunzhu. Jesus nishca shina, ashca runaguna piñasha llaquichinaun. Chasna acpihuas, Bibliamanda cuintanata mana saquinaunzhu (Lucas 21:17).

15. a) Tucuric punzhagunaibi causaushcata quiringuichu, imahuata chasna pinsangui. b) Yaya Diosta mana casuccunahuan, paita casuccunahuan imata tucunga.

¹⁵ Tucuric punzhagunaibi causaushcata quiringuichu. Biblia tucuric punzhamanda rimashcaga pactarisha riun. Ñalla Jehovaga Bibliamanda gustu cuintanata saquichinga, chihuasha cai mana ali mundu “tucurina uras pactarimungami” (Mateo 24:14). Tucurina urasca ima tan. Armagedon guerra man. Chibi Diosca tucui mana aligunata tucuchinga. Jehovaga Jesushuan paiba ushayuc angelgunahuan mana casuccunata huin tucuchingaraun (2 Tesalonicenses 1:​6-9). Armagedon huashaga, Supai paiba demoniogunahuan runagunata mana umachinata ushangaunachu. Yaya Diosta huin casuccuna, paiba Reinota mana saquiccuna Dios rimashca imasa pactarishcata ricungauna (Apocalipsis 20:​1-3; 21:​3-5).

16. Supai mandana tucuriushcata yachashaga imatata rana angui.

¹⁶ Supai mandana tucurina uras ña pactarimuunmi. Chiraicu imata ranata pinsarina angui. Jehovaga Bibliamanda can masta yachachun munan. Chimanda pactachina yuyaihuan estudiapai (Juan 17:​3). Chimandahuas, Jehovahua testigogunaga caran semanaibi tandarinaun. Chi tandarinaibi runaguna Bibliamanda mas intindingahua yanapanaun. Cai tandarinama  shamupangui (Hebreos 10:​24, 25 leipai). Can raushca mana ali acta musiashaga, ama chillatata rasha catinguichu. Alita rasha catishaga, Dioshuan alita apanacusha paiba ali amigo tucungui (Santiago 4:​8).

17. Tucuric punzha pactamucpiga imahuata runaguna manzharingauna.

¹⁷ Apostol Pabloga mana ali runaguna tucurina punzhaga “shuhuac runa” shina, cungaimanda mana pihuas chapaushcai shamunata nira (1 Tesalonicenses 5:​2, NM). Jesusca tucuric punzhaibi causaushcata runaguna mana quiringaunachu nira. Chita yuyasha Jesus nira: ‘Ñuca shamuna punzhaibi Noe causashca punzhacuinta tucungami. Chi punzhagunaibi ashca tamia urmashca punzhagama runaguna micuunaura, upiunaura, casaraunaura. Noe atun barcoibi [o arcaibi] yaicuna punzhagamami chasna causanaura. Cungaimanda, runaguna mana yachashcaibi ashca yacu shamusha tucuigunatas apara. Chi cuintallata ñuca Runa Tucuc asha ñuca shamuna punzhaga cungaimanda tucungami’ (Mateo 24:​37-​39).

18. Jesusca imata mana ali an nira.

¹⁸ Jesusca “yapacta micusha, yapacta upisha machasha” o “camba causaita yapacta yuyarisha” causanaga mana ali chan nira. Tucurina punzhaga “mana yachashca uraspi” tucui Allpaibi causaccunama pactamunga. Chi huasha nira: “Yuyarishalla chapaichi. Tucui uras Diosta mañasha causana manguichi tucui cai pactamuc turmintarinamandas quishpishca tucungahua nisha, Runa Tucuc ñuca ñaupacpi ima manzhanahuas illac shayaringahua nira” (Lucas 21:​34-36). Jesus nishcata imahuata casuna anchi. Nallami Supaiba mana ali mundu tucuringaraun. Jehovata, Jesusta casuccunallami quishpirisha Paraisoibi huiñai causangauna (Juan 3:16; 2 Pedro 3:13).