1. Pou kosa i fo konèt kisa i lé bann zanj ?

 JÉOVA i ve nou koné kisa i lé son fami. É bann zanj lé anparmi se fami la (regard la not n^o 8). La Bib i apèl banna « bann garson Bondieu » (Job 38:7). Kosa bann zanj i fé ? Koman zot la èd bann domoun dann tan lontan ? Èske zot i pe èd a nou ojourdui ?

2. a) Kisa la kré bann zanj ? b) Konbien d’zanj néna ?

² Dabor, i fo konèt ke bann zanj la été kréé par Jéova. Jéova la kré Jézu an premié. Aprésa, dapré Kolosien 1:16, « tout lé zot zafèr la été kréé dann sièl é su la tèr ». La Bib i di ke néna bann zanj par santèn de milion (Psom 103:20 ; Révélasion 5:11).

3. Kosa nou aprann dann Job 38:4 juska 7 su bann zanj ?

³ La Bib i ansègn a nou osi ke Jéova la kré bann zanj, avan li la kré la tèr. Kosa banna la resanti kan zot la vu la tèr ? Le liv Job i di zot lété vréman kontan. Dann tan la, zot lété in fami uni é zot té i sèrv Jéova zot tout ansanm (Job 38:4-7).

4. Koman nou koné ke bann zanj i fé in kont avèk domoun ?

⁴ Bann zanj la toultan fé in kont èk bann domoun. É zot i intérès a zot osi pou le projé ke Jéova néna pou la tèr é pou bann zumin (Provèrb 8:30, 31 ; 1 Pièr 1:11, 12). Kan Adan é Èv la rebèl a zot, surman bann zanj lété vréman malereu. É ojourdui, lé sur ke banna lé  ankor plu malereu, kan zot i voi ke in bonpe domoun i obéi pa Jéova. Mé kan in moun i regrèt son bann péché, ke li chanj son konportman é ke li arvien devan Jéova, bann zanj lé vréman kontan (Luk 15:10). Zot i fé vréman in kont avèk bann domoun ke i sèrv Bondieu. Jéova i ansèrv a zot pou èd é pou protèj son bann sèrviteur su la tèr (Ébreu 1:7, 14). Alon voir detroi légzanp.

5. Koman bann zanj la èd bann sèrviteur Bondieu ?

 ⁵ Avan détrui bann vil Sodom é Gomor, Jéova la anvoiy 2 zanj pou sov Lot é son fami (Jenèz 19:15, 16). In tralé d’zané aprésa, la jèt le profèt Danièl dan in gran trou ousa lavé bann lion. Mé li té pa blésé parske « Bondieu la anvoiy son lanj é la fèrm la geul bann lion » (Danièl 6:22). Lontan aprésa, kan lapot Pièr lété an prizon, Jéova la anvoiy in lanj pou libèr a li (Akt 12:6-11). Bann zanj la èd Jézu osi kan li lété su la tèr. Par égzanp, apré son batèm, bann zanj la sèrv a li (Mark 1:13). É jus avan son mor, in lanj lé vnu ankouraj a li (Luk 22:43).

6. a) Koman nou koné ke bann zanj i èd bann sèrviteur Bondieu ojourdui ? b) Kèl késtion nou sar réponn ?

⁶ Ojourdui, bann zanj i aparèt pu devan bann domoun. Mé Bondieu i ansèrv a zot ankor pou èd son bann sèrviteur. La Bib i di : « Lanj Jéova i kanp autour sak na la krint pou li, é li déliv a zot » (Psom 34:7). Pou kosa nou la bezoin i protèj a nou ? Parske nou na bann zènmi puisan ke i ve fé mal a nou. Kisa zot i lé ? Kèl koté zot i sort ? Par koman zot i ésèy fé mal a nou ? Pou réponn bann késtion la, alon voir sak la éspasé in pe apré la kréasion Adan é Èv.

7. Pou kosa Satan i tronp bann domoun ?

⁷ Dann chapit 3, nou la aprann ke in lanj la rebèl a li kont Bondieu. Li té i ve dominn lé zot. La Bib i apèl a li Satan le Diab (Révélasion 12:9). Li té i ve osi ke bann zumin i rebèl a zot kont Bondieu. Li la komans par tronp Èv, aprésa li la tronp in bonpe bann  domoun. Mé désèrtin moun, kom Abèl, Énok é Noé, la rès fidèl anvèr Bondieu (Ébreu 11:4, 5, 7).

8. a) Koman désèrtin zanj lé devnu bann démon ? b) Kosa bann démon la fé pou rès vivan kan le Déluj la arivé ?

⁸ Dann lépok Noé, désèrtin zanj la rebèl a zot. Zot la kit le sièl, pou viv kom bann zumin su la tèr. Pou kosa zot la fé sa ? La Bib i di ke banna té i ve prann bann madam (lir Jenèz 6:2). Mé lété pa bien ke bann zanj i fé bann zafèr komsa (Jud 6). Kom bann mové zanj la, néna in bonpe domoun dann tan la osi la fé bann mové zafèr, é zot lé devnu violan. Alor, Jéova la désid détrui a zot, kan li la noiy la tèr par in déluj. Mé li la sov son bann sèrviteur fidèl (Jenèz 7:17, 23). Pou rès vivan, bann mové zanj la artourn dann sièl. La Bib i apèl a zot bann démon. Banna la choizi suiv Satan dan la rébélion, é li lé devnu zot chèf (Matieu 9:34).

9. a) Kan bann démon la artourn dann sièl, kosa la ariv a zot ? b) Kosa nou sar voir dan bann paragraf i vien apré ?

⁹ Kom bann démon la rebèl a zot, Jéova té ve pa ke zot i artourn dan son fami (2 Pièr 2:4). Zot i pe pu prann in kor parèy sak domoun, mé zot i kontinué « tronp le monn an antié » (Révélasion 12:9 ; 1 Jan 5:19). Alon voir koman banna i fé pou tronp in bonpe domoun (lir 2 Korintien 2:11).

10. Koman bann démon i tronp bann domoun ?

¹⁰ Bann démon i tronp bann domoun diféran fason. Bann domoun ke néna kontak avèk bann démon i fé sa dirèkteman oubien par le moiyin in not moun, par égzanp par in sorsié ou in médiom. Le kontak avèk bann démon i apèl le spiritism (regard la not  n^o 26). La Bib i donn a nou lord may pa dutou sak néna in lien avèk bann démon (Galat 5:19-21). Pou kosa ? Parske, kom in chaseur i utiliz in pièj pou trap in zanimo, bann démon i utiliz bann moiyin diféran pou piéj bann domoun é gard le kontrol su zot.

11. a) Kosa in devineur i fé ? b) Akoz nou doi rejèt sak bann devineur i fé ?

¹¹ Par égzanp, bann démon i utiliz bann devineur pou tronp bann domoun. In devineur, sé kan in moun i devinn lavnir ou i ésèy dékouv kékchoz ke zot i koné pa avèk le pouvoir bann démon. Sèrtin i ésèy konèt lavnir avèk bann kart taro, bann rèv, in boul kristal, lastroloji (i regard bann zétoil) ou i lir bann lign dan la min. In bonpe domoun i pans ke tousa na okin danjé, mé lé pa vré ! Sa lé vréman danjereu. La Bib i mont ke bann démon é bann devineur i travay ansanm. Akt 16:16 juska 18 i parl su in jeun fiy ke té i devinn lavnir gras in « démon ke néna pouvoir devineur ». Kan Pol la chas le démon, èl la pèrd son pouvoir.

12. a) Akoz lé danjereu ésèy rant an kontak avèk bann mor ? b) Pou kosa bann sèrviteur Bondieu i mèl pa zot jamé dan bann koutum ke na in lien avèk bann pratik démoniak ?

¹² Bann démon i ésèy osi tronp a nou, pou fé kroir a nou ke lé posib koz avèk bann mor. Zot i ve fé kroir a nou ke bann mor lé ankor vivan dan in landroi, é ke zot i gingn rant an kontak avèk nou, èd a nou oubien fé mal a nou. Par égzanp, kan sèrtin la pèrd in kamarad ou in moun dan zot fami, zot i sar voir in médiom ou in sorsié, ki di ke li gingn koz avèk bann mor. Li va petèt donn a zot in ransègnman ke lé vré su le moun mor, é mèm imit son voi (1 Samuèl 28:3-19).  An plus, in bonpe koutum su bann mor lé bazé su la kroiyans ke banna lé ankor vivan dan in landroi (par égzanp : bann fèt pou bann mor, bann zanivèrsèr pou le mor, bann sakrifis pou bann mor, bann sérémoni pou bann veuv é la véyé). Parfoi, kan bann krétien i ve pa fé bann koutum la, zot fami ou bann domoun dan le vilaj i koz an mal su zot, i donn a zot mové kozman oubien i rejèt a zot. Mé bann krétien i koné ke bann mor i kontinué pa viv dann okin landroi. Lé pa posib rant an kontak avèk banna, é zot i pe pa fé a nou du mal ni èd a nou (Psom 115:17). Fé vréman atansion ! Ésèy jamé rant an kontak avèk bann mor ou bann démon. É mèl pa ou jamé dan bann koutum ke na in lien avèk bann pratik démoniak (lir Detéronom 18:10, 11 ; Izai 8:19).

13. Kosa bann domoun lavé peur bann démon la gingn fé ?

¹³ Bann démon i tronp bann domoun, mé an plus ke sa, zot i fé peur banna in bonpe. Ojourdui, Satan é bann démon i koné ke « i rès pa [zot] bonpe d’tan » parske i tard pa, Bondieu va fé disparèt a zot su la tèr (Révélasion 12:12, 17). Sé pousa ke par rapor avan, banna lé ankor plu violan. Domoun par milié ke lavé peur bann démon avan, la pu peur de zot dutou ojourdui. Kosa zot la fé pou pu avoir peur ?

14. Kom sèrtin krétien a Éfèz, koman nou pe libèr a nou du pouvoir ke bann démon néna su nou ?

¹⁴ La Bib i di koman opoz a nou kont bann démon, é kosa i fo fé pou pa rès sou zot pouvoir. Par égzanp, avan devnir krétien, sèrtin zabitan dan la vil Éfèz té  rant an kontak avèk bann démon. Koman banna la libèr a zot le pouvoir bann démon lavé su zot ? La Bib i di ke in bonpe parmi « sak té i fé la maji la rasanm zot liv é la brul tout devan toulmonn » (Akt 19:19). Parske banna té i ve devnir krétien, alor zot la détrui tout zot liv su la maji. I fo fé le mèm zafèr ojourdui. Sak i ve sèrv Jéova i doi jèt tout sak néna in lien avèk bann démon. Sa i pe èt bann liv, bann magazinn, bann zoroskop, bann fim, la muzik, bann jeu ou mèm bann postèr : an deu mo, tout bann zafèr ke néna in lien avèk la maji, la sorsèlri, bann démon ou bann bann zafèr ke lé pa normal, ke na lèr san danjé ou ki fé rir. Sa i pe èt osi bann garanti ke nou port su nou pou protèj a nou kont le mal (1 Korintien 10:21).

15. Kosa nou doi fé an plus pou opoz a nou kont Satan é bann démon ?

¹⁵ Kèlke zané apré ke bann krétien Éfèz la détrui zot liv maji, lapot Pol la di a zot ke zot té i doi kontinué luté « kont bann mové zéspri » (Éfézien 6:12). Mèm si banna lavé brul zot liv, bann démon la ésèy ankor fé a zot le mal. Alor kosa zot té i doi fé an plus ? Pol la di a zot : « Ansèrv la foi kom in gran boukliyé, avèk sa, zot i poura étèn bann flèch de fe ke le méchan i anvoiy » (Éfézien 6:16). Kan li konbat, in solda lé protéjé par son boukliyé. Lé parèy, nout foi i pe protèj a nou. Si nou lé sur ke Jéova i pe protèj a nou, nou poura opoz a nou kont Satan é bann démon (Matieu 17:20).

16. Koman nou pe rann nout foi an Jéova plu for ?

¹⁶ Koman nou pe rann nout foi an Jéova plu for ? Nou doi lir la Bib tou lé jour. Nou doi osi aprann fé konfians Bondieu é èt sur ke li va protèj a nou. Si nou  na vréman konfians an Jéova, Satan é bann démon i poura pa fé a nou le mal (1 Jan 5:5).

17. Pou èt protéjé kont bann démon, kosa nou doi fé ankor ?

¹⁷ Bann krétien Éfèz té i doi fé dot zafèr ankor. Kom zot té i viv dan in vil ranpli avèk bann domoun ke té i ièm rant an kontak avèk bann démon, alor, Pol la di avèk zot : « Pri dan tout lokazion » (Éfézien 6:18). Dan ninport kèl lokazion, zot té i doi demann Jéova protèj a zot. A nou osi, nou viv dan in monn ranpli avèk bann domoun ke i ièm rant an kontak avèk bann mové zéspri. Donk, nou doi demann Jéova protèj a nou. É kan nou pri, nou doi utiliz son non (lir Provèrb 18:10). Si nou kontinué demann Jéova déliv a nou de Satan, li va réponn nout bann priyèr (Psom 145:19 ; Matieu 6:13).

18, 19. a) Koman nou pe ranport la batay kont Satan é bann démon ? b) Kèl késtion le chapit i vien apré va réponn ?

¹⁸ Si nou jèt tout sak néna in lien avèk bann pratik démoniak é si nou fé konfians Bondieu pou protèj a nou, nou poura opoz a nou kont Satan é bann démon. Nou doi pa avoir peur de zot (lir Jak 4:7, 8). Jéova lé bokou plu puisan ke bann démon. Li la puni banna dann lépok Noé, é dan lavnir, li va détrui a zot (Jud 6). Oubli pa ke nou lé pa touseul pou luté kont Satan é bann démon. Jéova i utiliz bann zanj pou protèj a nou (2 Roi 6:15-17). Nou pe èt sur ke avèk lèd Jéova, nou va ranport la batay (1 Pièr 5:6, 7 ; 2 Pièr 2:9).

¹⁹ Kom Satan é bann démon i provok in bonpe soufrans su la tèr, akoz Bondieu la pa ankor détrui a zot ? Nou va réponn késtion la dann chapit i vien apré.