I tard pa, kan gouvèrnman Bondieu dann sièl va dirij tout bann zumin, la tèr va ni in landroi ousa i sra gayar pou viv. Nora in bon lantant ant tout domoun, é zot nora in bon travay, é sa va kontant azot. Bondieu la choizi Jézu Kris pou dirij se gouvèrnman la. Jézu lé pa parèy in bonpe dirijan nout lépok, li va mèt tout son keur pou okup bann zumin. Son dominasion i sra bazé su lamour. Li sra in roi plin la bonté, plin la pitié é jus (Izai 11:4).

Bann zumin i sra pa divizé parske zot lé dan tèl péi oubien zot néna in not kultur. Zot va form in seul peup ke lé uni (Révélasion 7:9, 10). Tout sak i viv su la tèr va èm Bondieu é zot prochin. Zot tout ansanm é dan la pé, zot va fé sak Bondieu lavé prévu ke bann zumin i fé dann premié débu : okup bien mèm ousa zot i viv, la tèr (Psom 115:16).

Kan le roiyom Bondieu va gouvèrn la tèr, le Kréateur va reprann le kontrol total su le klima, é li va ékilib se klima la in manièr parfé (Psom 24:1, 2). Kan li lété su la tèr, Jézu la mont inn ti bout la puisans ke Bondieu la donn ali. Par égzanp, té fasil pou li fé arèt in gro tanpèt (Mark 4:39, 41). Kan Kris va rénié, pèrsonn nora pu peur bann katastrof naturèl. Le roiyom Bondieu va osi remèt an plas lantant ke lavé dann premié débu, ant lom é la natur (Ozé 2:18).

Tout domoun nora in santé parfé. Pèrsonn va pu tonm malad, va viéyi oubien va mor (Izai 35:5, 6). Lanvironnman i sra prop é joli, kom lété dann jardin Lédèn. É kom dann jardin Lédèn, dan le monn nouvo, la tèr va donn manjé an gran kantité (Jenèz 2:9). Donk, tout domoun su la tèr nora asé manjé. Kom bann Zisraélit dan Lantikité, tout va ‘manj zot pin juska zot vant lé plin’ (Lévitik 26:4, 5).

Sou gouvèrnman Bondieu, tout bann zumin i sra an pé, é zot va aji anvèr inn é lot avèk bonté é justis. Nora pu la gèr, nora pu bann profiteur, é pèrsonn va batay pou gingn sak li la bezoin pou viv. « Zot sra asiz chakèn sou son pié rézin é sou son pié fig, é na poin in moun va fé peur azot » (Miché 4:3, 4).

Chak fami nora son kaz, é zot nora pa peur ki mèt azot deor. An plus, dan le monn nouvo, tout sak banna va fé, va aport azot kontantman. La Bib i di : « Zot i sar pa fatig azot inutilman », oubien « pou rien » (Izai 65:21-23, ti not).

La Bib i promèt : « La tèr sra ranpli èk le konésans Jéova » (Izai 11:9). Bann zumin ki viv sou le dominasion le roiyom Bondieu, i sra ansénié é gidé par le gran sajès le Kréateur, Jéova, é instrui par son joli kréasion. Bann zom va pa utiliz zot kapasité pou fabrik bann zarm oubien pou fé le mal zot prochin (Izai 2:4). O kontrèr, zot va aprann viv an pé zot tout ansanm é zot va bien okup la tèr (Psom 37:11).

La tèr la été bien fé par Bondieu, pou ke bann zumin i profit la vi chak instan. Depui premié débu, Bondieu té i ve ke bann zumin i viv pou toultan (Psom 37:29 ; Izai 45:18). Pou ariv fé sa, « li va fé disparèt la mor pou toultan » (Izai 25:8). La Bib i promèt : « Nora pu la mor ; nora pu okin deuy, ni okin plint, ni okin douleur » (Révélasion 21:4). Bondieu va donn la vi pou toultan pou tout bann zumin, sétadir sak li va sové kan li va détrui se monn mové é osi tout sak li va résusité dan le monn nouvo (Jan 5:28, 29 ; Akt 24:15).

 Depui koméla mèm, bann domoun par milion i prépar azot pou viv sou le roiyom Bondieu ki tard pa pou arivé. Mèm si zot lé pa parfé, depui koméla, zot i fé zéfor pou èt le bann moun ke Bondieu va aksèp dan son monn é pousa, zot i aprann konèt ali é Jézu Kris (Jan 17:3).

Èske zot i èmré konèt plus su sak i fo fé pou rès vivan la fin le monn la é viv dan le gayar monn nouvo ke lé proch ? Si oui, aksèp in létud la Bib gratuit ansanm bann Témoin Jéova, avèk lo liv Viv ereu pou toultan !