Sak i fo fé pou viv dan le monn nouvo
Nou la vu, dan bann zartik jus avan, i tard pa, Bondieu va détrui le monn mové koméla é tout bann problèm ke néna. Nou lé sur ke sa va arivé. Poukosa ? Parske la Bib i asur anou :
« Se monn la, lé antrèn disparèt » (1 JAN 2:17).
Nou pe èt sur osi, ke nora bann domoun va rès vivan, parske vèrsé la Bib la, i promèt anou :
« Sak i fé la volonté Bondieu va viv pou toultan. »
Donk, sak i ve rès vivan i doi fé la volonté Bondieu. É pou konèt kosa i lé la volonté Bondieu, i fo dabor, aprann konèt Bondieu li mèm.
POU RÈS VIVAN, LÉ OBLIJÉ « APRANN KONÈT BONDIEU »
Jézu la di : « Ala kosa i ve dir la vi pou toultan : ke zot i aprann konèt aou, aou, le seul vré Bondieu » (Jan 17:3). Pou rès vivan kan la fin i ariv é viv pou toultan, i fo nou ‘aprann konèt’ Bondieu. Sa i ve pa dir kroir seulman ke li égzis oubien konèt detroi zafèr desu li. I fo nou très in lamitié solid èk li. Kom pou in lamitié ke nou ve gardé é rann plu for, nou doi pran le tan pou très in lamitié èk Bondieu. Alon voir detroi vérité inportan ke i sort dan la Bib, pou èd anou très ansanm Bondieu in lamitié ke lé for.
LIR LA PAROL BONDIEU, LA BIB, TOU LÉ JOUR
Pou rès vivan la fin le monn la, pri Bondieu pou ke li èd aou aji in fason ke li ièm.
I fo nou manj pou nou rès vivan. Mé Jézu la di : « Lom i doi pa viv rienk avèk de pin, mé avèk tout bann parol ki sort dann la bouch Jéova » (Matieu 4:4).
Zordi, nou retrouv bann parol Jéova dan la Bib. Furmezur ke zot va étudié se liv sakré, zot va dékouv sak Bondieu la fé, sak li fé koméla mèm, é sak li va fé dan lavnir.
PRI BONDIEU POU ÈD AZOT
Kosa zot i pe fé si zot i ve suiv bann konsèy Bondieu, mé ke lé difisil pou zot arèt fé bann zafèr ke li ièm pa ? Si sé zot ka, aprann konèt Bondieu i pe vréman èd azot.
In madam, ke té i apèl Sakura, té viv dan le péché. Kan li la étudié la Bib, li la dékouv sak Bondieu i di : « Rejèt tout bann konportman ke lé in péché séksuèl » (1 Korintien 6:18). Alor li la pri Bondieu pou donn ali la fors, pou arèt avèk bann mové pratik la. Mé li doi toultan sobat kont bann tantasion. Li di : « Kan mi néna bann pansé sal, mi koz a keur ouvèr ansanm Jéova dan la priyèr. Mi koné bien ke mon touseul, mi sra pa kapab konbat tousa. Le pouvoir la priyèr la èd amoin kos koté Jéova. » Kom Sakura, bann domoun par milion i aprann konèt Bondieu. É Bondieu i donn banna la fors pou fé bann chanjman ki fo, pou viv in fason ke li ièm (Filipien 4:13).
Plus zot va aprann konèt Bondieu, plus li va ‘konèt azot’ é plus zot lamitié avèk li sra solid (Galat 4:9 ; Psom 25:14). Gras sa, zot va gingn rès an vi la fin le monn la é zot va rant dan le monn nouvo Bondieu. Mé koman i sra le monn nouvo la ? Lartik i vien apré i ésplik sa.
a La Bib i di anou ke le non Bondieu sé Jéova.
