« Donk fé atansion, parske zot i koné pa ni le jour ni leur » (MATIEU 25:13).

« Fé atansion, rès évéyé, parske zot i koné pa kansa i sra le moman choizi » (MARK 13:33).

Donk, pèrsonn i koné pa vréman kansa la fin le monn la, va arivé. La Bib i ansègn jus ke Bondieu la choizi in moman, oubien ‘in jour é in leur’ bien prési (Matieu 24:36). Èske sa i ve dir, ke i gingn pa dutou konèt kansa la fin va arivé ? Non ! Jézu la di son bann disip, gèt pluzieur zévènman ki fémont ke la fin i tard pa.

Bann zévènman la, i sré le sign ke le monn lé dann « tan la fin ». Jézu la di : « Nasion va drès kont nasion é roiyom kont roiyom, é nora bann faminn é bann tranbleman d’tèr dan in landroi apré lot » (Matieu 24:3, 7). Li la di osi ke noré bann « zépidémi » (Luk 21:11). Èske zot i voi bann profési la réalizé ?

Koméla, dan le monn néna bann gèr, bann faminn é bann tranbleman d’tèr ke i ravaj tout, é osi bann maladi grav. Par égzanp an 2004, in gran tranbleman d’tèr dan loséan Indien, la déklanch in tsunami ke la tué 225 000 moun. An plus 3 zan, le pandémi Kovid-19 la tué 6,9 milion d’moun dan le monn. Jézu la di ke bann zévènman komsa va montré ke la fin le monn i sré proch.

La Bib i dékri le pèryod jus avan la fin le monn la, kom bann « dèrnié jour » (2 Pièr 3:3, 4). Dann 2 Timoté 3:1-5 i di ke dann bann dèrnié jour, domoun va rekonèt de moin zan moin la diférans ant sak lé bien é sak lé mal (gard le ti kad «  Le pèryod avan la fin le monn la »). Èske zordi zot i voi domoun ke i rod rienk zot prop zintéré, ke i ve gingn toujour plus, ke lé mové é ke i fé pa mont zot lamour pou inn é lot ? Sé in not preuv ke la fin le monn la, lé vréman proch.

Konbien d’tan bann dèrnié jour va duré ? Dapré la Bib, rienk « inn ti pe d’tan ». Aprésa, Bondieu va ‘détrui sak lé antrèn détrui la tèr’ (Révélasion 11:15-18 ; 12:12).

Bondieu la finn choizi le jour èk leur ousa li va détrui se monn mové (Matieu 24:36). É lot gayar nouvèl, sé ke « li ve pa ke mèm in seul [moun] lé détrui » (2 Pièr 3:9). Li ve vréman ke tout domoun i pas vivan la fin se monn la é i viv dan son monn nouvo su in tèr transformé an paradi. Sé pousa li donn tout lokazion aprann kosa i lé son volonté é obéi ali.

Dayeur, li la mèt an plas in program lansègnman su tout la tèr, pou aprann bann domoun kosa i fo fé, pou fé parti bann zumin ke va viv dan le monn nouvo, dirijé par son roiyom. Jézu la di ke le gayar nouvèl konsèrnan le roiyom Bondieu i sré préché « su tout la tèr » (Matieu 24:14). Su tout la tèr, bann Témoin Jéova i pas bann miliar d’zeur, pou préché é ansénié se gayar nouvèl ke néna dan la Bib. Jézu la bien di ke se prédikasion i sré fé partou su la tèr, avan ke la fin i ariv.

Le tan pou ke bann gouvèrnman i dominn, lé prèske fini. Eureuzman bann zumin, i pe rès an vi la fin se monn la, é viv dan le paradi su la tèr ke Bondieu la promèt. Lartik i vien apré i mont kosa zot i doi fé pou viv dan se monn nouvo la.