« An mèm tan ké mi té grandi, mon latirans pou bann garson, té inn an parmi bann zafèr vréman difisil pou moin sobat ansanm. Mi té pans ké tousa té rienk pou in tan, mé sa i fatig amoin toujour jordi » (David, 23 an).

 David lé in jèn krétien k’i vé fé plézir Bondié. Mé èské li va gingn fé sa alor ké li néna in latirans pou in moun lo mèm sèks ké li ? Kosa Bondié i pans dési lomosèksualité ?

•  Kosa la Bib i di ?

•  Èské sa i vé dir ké... ?

•  Kosa nou pans... ?

 Sak domoun i pans dési lomosèksualité i pé chanjé, dapré lo kultur oubien lépok ké zot i viv. Mé bann krétien i lès pa sak domoun i pans détinn dési zot ; zot lé pa « sakouyé parsi parla par lo van tout kalité lamontraj » (Éfézien 4:14). Olèrksa, zot fason oir lomosèksualité ou dot fason aji, lé bazé dési bann prinsip k’i sort dan la Bib.

 Sak la Parol Bondié i di dési lomosèksualité lé vréman klèr. La Bib i di :

•  « Ou doi pa dor èk in bonom kom ou dor èk in madam. Sé in zafèr dégoutan » (Lévitik 18:22).

•  « Sé pousa, Bondié la larg azot [...], dapré bann lanvi ké néna dan zot kèr, [...] sou la dominans bann lanvi sèksuèl k’i fé ont, parské zot madam la lès bann rolasion sèksuèl naturèl pou fé sak lé pa naturèl » (Romin 1:24, 26).

•  « Lès pa zot anbobiné : sak i fé bann péché sèksuèl, sak i ador tout kalité zafèr olèrk Bondié, sak i tronp lo moun avèk kisa li lé marié, bann zom k’i pratik lomosèksualité, bann volèr, bann rapiang, bann soular, sak i jur lé zot é bann zèskro va pa érit lo roiyom Bondié » (1 Korintien 6:9, 10).

 An vré, bann prinsip la Bib lé pou tout domoun ; ké nou lé omosèksuèl ou ké nou néna rolasion sèksuèl èk in moun pa mèm sèks ké nou. O final, nout tout, nou doi kontrol anou dèk nou san ké nou néna lanvi d’fé in zafèr k’i fé pa plézir Bondié (Kolosien 3:5).

 Èské sa i vé dir ké la Bib i ankouraj anou aoir pèr oubien détès bann zomosèksuèl ?

 Non. An vré, la Bib i amont ké nou doi pa détès okin moun, kisoi in omosèksuèl ou pa. Olèrksa, li ankouraj anou pou « rod la pé avèk toulmonn », san rogard lo fason zot i amèn zot vi (Ébré 12:14). Sak i atak bann zomosèksuèl, oubien sak i maltrèt banna kinport lo fason, sa lé vréman pa bien dutou.

 Èské sa i vé dir ké bann krétien i doi mont ké zot lé kont bann loi k’i otoriz lo mariaj omosèksuèl ?

 Dapré la Bib, kan Bondié la mèt an plas lo promié mariaj, li la uni in bonom avèk in madam (Matié 19:4-6). Mé parkont, bann sobatkoz dési la loi bann zom su lo mariaj omosèksuèl lé in zafèr politik é pa in zafèr moral. La Bib i domand ké bann krétien i may pa dann zafèr la politik (Jan 18:36). É donk, bann krétien i soutien pa é zot i opoz pa zot kont la loi bann gouvèrnman dési lo mariaj omosèksuèl oubien avèk lo fason aji bann zomosèksuèl.

 Kosa nou pans d’in moun ké lé omosèksuèl ? Èské li pé chanjé ?

 Oui. Sé sa mèm détroi moun I^é sièk la fé ! Apré ké li la di ké sak i pratik lomosèksualité va pa érit lo roiyom Bondié, la Bib i di komsa : « É pourtan sé komsa ké lété désèrtin an parmi zot » (1 Korintien 6:11).

 Èské sa i vé dir ké bann moun la arèt pratik lomosèksualité lavé pu dutou bann zanvi omosèksuèl ? Non. La Bib i di : « Abiy azot avèk lo nouvo tanpéraman, k’i, par la konésans égzak, lé ranplasé » (Kolosien 3:10). I fo lo tan pou chanjé.

 Kosa nou pans d’in moun k’i vé aplik bann vérité biblik mé ké néna ankor bann zanvi omosèksuèl ?

 Kinport son bann zanvi, in moun i pé choizi pa kontinié majine sa toultan oubien kontant son bann zanvi. La Bib i di : « kontinié marché sou la dirèksion lèspri é zot va pa tonb dan okin mové lanvi » (Galat 5:16).

 Èské ou la romarké k’i di pa ké lo moun nora poin okin « mové lanvi » ? Li nora la fors tienbo dovan son bann zanvi, si li lir la Bib é si li pri toultan pou rand ali pli for spirituèlman.

 David, lo moun nou la koz dési dann débu, la bien konpri sa, surtou kan li té fine koz èk son papa momon dési lo féblès ké li té sobat ansanm. Li la di : « Ma la tir in gro fardo su mon do. É si moin lavé koz dé sa ansanm zot avan, mi noré gingn mié profit mon jénès. »

 O final kan nou obéi bann prinsip Jéova, sa i rand anou plis éré. Nou lé sur ké bann prinsip la, lé « jus », « i kontant lo kèr », é ké « rèspèk sa i aport in gran rékonpans » (Psom 19:8, 11).