Èske Bondieu i égzis ?
Sak la Bib i di
Oui lé sur. La Bib i donn anou bann bon preuv ke Bondieu i égzis. Pa bezoin kroir zieu fèrmé tout sak bann relijion i di, mé kom la Bib i ankouraj anou, fémont nou na foi an Bondieu é pousa ansèrv nout « kapasité pou rézoné » é nout « lintélijans » (Romin 12:1 ; 1 Jan 5:20, not). Ala detroi preuv la Bib i donn :
Sé parske na lord èk la vi dan lunivèr, ke sa i prouv ke néna in kréateur. La Bib i di komsa : « Tout kaz lé konstrui par kèlkin, é sak la konstrui tout zafèr sé Bondieu » (Ébreu 3:4). Mèm si ti kozman la lé sinp, bonpe demoun ke néna linstruksion i trouv sa tro for a.
Tout demoun i nèt èk lanvi konprann poukosa zot lé la. É mèm si zot néna tout sak i fo pou viv, lanvi la i fane pa. An fèt, la Bib i koz ladsu kan li koz de « bann bezoin spirituèl », é lanvi konèt Bondieu é ador ali lé konpri ladan (Matieu 5:3 ; Révélasion [oubien Apokalips] 4:11). Bann bezoin spirituèl la lé pa seulman in preuv ke Bondieu i égzis. Mé sa lé la osi, pou mont anou ke li lé in kréateur ki ièm anou é li ve ke nou niabou konèt ali (Matieu 4:4).
Dan la Bib néna bann zévènman bien détayé ke té ékri depui dann tan lontan é ke la réaliz dé sièk apré, égzakteman kom lété di. Bann prédiksion la lé si tèlman fiab é bien détayé, ke lé klèr ke lé pa in moun lé dèryèr tousa, mé Bondieu li mèm (2 Pièr 1:21).
Bann demoun ke la ékri la Bib lété plus kalé dann domèn la sians ke demoun zot jénérasion. Par égzanp dann tan lontan, in ta demoun té kroi ke té in zanimo té tienbo la Tèr (soi in léléfan, soi in sanglié, oubien in beuf, ou in not ankor). Alork la Bib i di Bondieu « i pandi la tèr su rien » (Job 26:7). An plus ke sa, la Bib na rézon kan li dékri la form la Tèr kom in « glob » (Izai 40:22, Ostervald). Koman sasfé ke bann demoun ke la ékri la Bib té koné sa an avans su zot lépok ? Na in ta demoun i pans ke lé klèr, ke sé Bondieu la fé konèt azot tousala.
La Bib i donn la répons bonpe késtion ke lé difisil. É lé vré, i pe arivé ke demoun i arèt kroir Bondieu si zot i trouv pa in répons valab pou bann késtion la. Par égzanp : Si Bondieu lé amour é toupuisan, alor poukosa néna bann soufrans èk le mal ? Poukosa plu souvan la relijion i pous demoun fé le mal olieu d’fé le bien ? (Tit 1:16).
a Par égzanp, Allan Sandage, ke lété astronom dan son vivan, la di konsèrnan lunivèr : « Sanm pou moin lé pa posib in lord komsa la i sort dann in dézord. Té i fo in moun pou organiz tousala. Mèm si pou moin Bondieu lé in mistèr, kan mi voi ke na si tan d’zafèr ki égzis pluto ke na poin rien, na poin dot lésplikasion, sé Bondieu li mèm lésplikasion se mirak la. »
