Oui, lo Diab i égzis an vré. Li lé « lo chèf lo monn ». Sé in lèspri k’lé vnu mové é k’la drès ali kont Bondié (Jan 14:30 ; Éfézien 6:11, 12). La Bib i done lo Diab détroi ti non pou fé mont kisa li lé vréman :

•   Satan, k’i vé dir « opozan » (Job 1:6).

•   Diab, k’i vé dir « kalomniatèr » (Révélasion 12:9).

•   Sèrpan, dan la Bib, k’i vé dir« in moun ruzé pou fé lo mal » (2 Korintien 11:3).

•   Sak i tant domoun pou fé lo mal (Matié 4:3).

•   Mantèr (Jan 8:44).

Èské lo Diab sé jus lo mal ké néna dédan chak moun

 Désèrtin i pans ké lo Diab sé lo mal ké néna dédan chakèn an parmi nou. Mé dan la Bib, néna in ti kozé ant Bondié é Satan. Kom Bondié lé parfé, lé pa posib ké li la koz èk in zafèr mové k’i sré anndan li (Détéronom 32:4 ; Job 2:1-6). An plis ké sa, Satan la tant Jézu. Pourtan Jézu « na poin okin péché » (Matié 4:8-10; 1 Jan 3:5). La Bib i amont bien ké lo Diab i égzis an vré, é ké sé pa jus lo mal ké lé anndan nou.

 In bonpé domoun i kroi pa ké lo Diab i égzis an vré. Èské sa i étone anou ? Non, parské la Bib i di, Satan i tronp bann domoun pou fé sak li, li vé (2 Tésalonisien 2:9, 10). Inn an parmi son bann manigans k’i march bien, sé fé kroir domoun li égzis pa (2 Korintien 4:4).

Sak domoun i pans : Lusifèr sé in not non lo Diab.

 An vré : Dan désèrtin Bib, i trouv lo mo « Lusifèr » k’i vé dir « k’i briy ». (Izai 14:12) Dapré bann vèrsé k’i vien avan é apré, i ansèrv mo la pou koz su bann roi Babilone, ké Bondié té sa mèt plibaktèr parské zot té pran azot tro su la otèr (Izai 14:4, 13-20). Lo bann mo « k’i briy » i ansèrv pou mok bann roi Babilone kan zot té fine ariv atèr.

Sak domoun i pans : Satan i travay pou Bondié in pé kom in « prokurèr ».

 An vré : Lo Diab i sèrv pa Bondié, mé sé son lènmi. Satan lo Diab i drès ali kont sak i sèrv Bondié é li akuz azot bann zafèr k’lé fo. (1 Pièr 5:8; Révélasion 12:10)