Bondieu i fé anou in loneur kan li donn anou la libèrté fé bann choi, la kapasité pran nout désizion par nou mèm. Lé pa Bondieu, lé pa le déstin i désid a lavans sak nou fé. Kosa la Bib i di su sujé la ?

•   Bondieu la kré domoun a son resanblans (Jenèz 1:26). Alork bann zanimo i march rienk èk zot linstin, anou, nou resanm nout Kréateur : nou gingn fémont bann joli manièr kom lamour oubien la justis. É kom Bondieu, nou néna la libèrté fé bann choi.

•   Le plu souvan nou désid par nou mèm kèl lavnir nou nora. Dan la Bib, Bondieu i ankouraj anou « choizi la vi [...] kan nou ékout son voi », sétadir kan nou choizi obéi son bann komannman (Detéronom 30:19, 20). Si nou té pa lib fé bann choi, konsèy la noré sèrv aryin, é sré mèm kruèl. Olèrk fors anou fé son volonté, Bondieu i invit anou gran keur : « Si omoin ou té fé atansion mon bann komannman ! Out pé i sré kom in rivièr, é out justis parèy bann lam la mèr » (Izai 48:18).

•   Lé pa le déstin i désid a lavans si nou gingn bon rézulta dan nout vi ou si nou pèrd. Kan i komans fé in nafèr, i fo fé zéfor pou gingn bon rézulta. La Bib i di : « Tout sak out min i trouv pou fé, fé ali èk tout out fors » (Éklézias 9:10). Dedan i di osi : « Bann projé in moun i travay dur i ariv obout » (Provèrb 21:5).

 La libèrté fé bann choi lé in kado Bondieu, sa na in bonpe la valeur. Li pèrmèt anou èm ali « èk [nout] keur an antié » — parske nou la fé le choi èm ali (Matieu 22:37).

 La Bib i aprann anou ke Bondieu lé toupuisan é apark li na poin pèrsonn i gingn anbar son pouvoir (Job 37:23 ; Izai 40:26). Malgrésa, li ansèrv pa son fors pou kontrol tout. Par égzanp, la Bib i di ke Bondieu « lavé kontrol [ali] » pou pa atak in lènmi son peup, le gran téritoir Babilonn (Izai 42:14). Pou linstan lé parèy, li désid suport èk pasians sak i ansèrv zot libèrté pou fé domoun le mal. Mé Bondieu i lèsra pa zot fé sa pou toultan (Psom 37:10, 11).