Jézu lé mor pou ke bann zumin i gingn le pardon zot bann péché é la vi pou toultan (Romin 6:23 ; Éfézien 1:7). An plus ke sa, la mor Jézu la mont din fason klèr ke mèm kan in moun i souf in ta, li lé kapab rès fidèl Bondieu (Ébreu 4:15).

 Koman avèk la mor in seul moun la gingn in rézulta osi joli ?

1.   Jézu lé mor pou « le pardon nout bann péché » (Kolosien 1:14).

    Adam, Le premié bonom la été kréé parfé, èk okin péché. Kan mèm sa, li la choizi dézobéi Bondieu. Akoz li la dézobéi, oubien péché, tout son bann désandan la gout la sos. La Bib i ésplik : « Par la dézobéisans se seul bonom in bonpe lé devnu pécheur » (Romin 5:19).

    Jézu ali osi lété parfé, mé li la jamé péché. Sépousa li té pe èt « in sakrifis pou fé la pé èk Bondieu pou nout bann péché » (1 Jan 2:2). Kan Adan la dézobéi, li la pas son péché tout bann zumin, parèy kan Jézu lé mor, li la donn le remèd pou le péché pou tout sak i mèt la foi an li.

    Anfin d’kont Adan la vann tout bann zumin o péché. Kan li la aksèp mor pou nou, Jézu la rachèt bann zumin. Rézulta : « Si in moun i fé in péché, nou néna in lèd ke lé koté le Papa, sé Jézu Kris, in moun ke lé droit » (1 Jan 2:1).

2.   Jézu lé mor « pou ke tout sak i mèt la foi an li lé pa détrui mé i gingn la vi pou toultan » (Jan 3:16).

    Mèm si Adan la été kréé pou viv pou toultan, akoz son péché li la été kondané a mor. Akoz Adan, « le péché lé rantré dan le monn é le péché la amèn la mor, é donk tout domoun i mor parske tout lavé péché » (Romin 5:12).

    Olèrksa, la mor Jézu la pa seulman éfas le tach ke le péché la lésé, mé li la anlèv la pèn de mor pou tout sak i mèt la foi an li. La Bib i rézum le zafèr komsa : « Kom le péché la règn ansanm la mor, lé parèy pou le gran faveur ke pèrsonn i mérit pa, li mèm li règn par le moiyin la justis ki amèn vèr la vi pou toultan par Jézu Kris nout Sénieur » (Romin 5:21).

    Lé vré, zordi bann zumin i gingn pa viv tro lontan. Kan mèm sa, Bondieu i promèt ke li va donn la vi pou toultan bann zumin ki march droit é ke li va résusit bann mor komsa banna osi va gingn profit le bann bienfé le sakrifis la mor Jézu (Psom 37:29 ; 1 Korintien 15:22).

3.   Jézu « la mont son lobéisans juska la mor » é li la mont din fason klèr ke devan ninport kèl difikulté in moun i gingn rèt fidèl Bondieu (Filipien 2:8).

    Mèm si son léspri èk son kor lété parfé, Adan la dézobéi Bondieu parske li té ve rienk pou li touseul in nafèr té apartien pa li (Jenèz 2:16, 17 ; 3:6). Aprésa, Satan le plu gran lénmi Bondieu, la di èk konfians ke in moun va pa gingn obéi Bondieu san ke li gingn in nafèr an retour, surtou si li pe pèrd son vi (Job 2:4). Pourtan, Jézu ke té in om parfé, li la obéi é li la rès fidèl Bondieu, mèm si li lé mor din fason ke la fé pèrd ali son loneur é ke té kruel (Ébreu 7:26). Ala koman la réponn la késtion : in moun i gingn rès fidèl Bondieu devan ninport kèl difikulté.

Bann késtion su la mor Jézu

•   Poukosa Jézu té doi konèt la soufrans é té doi mor pou rachèt bann zumin ? Poukosa Bondieu la pa jus anlèv le kondanasion a mor ?

   Bondieu la mèt an plas se loi la : « Le salèr péyé par le péché, sé la mor » (Romin 6:23). Bondieu la jamé kachièt Adan se loi la, li la prévnu ali ke si li té dézobéi, noré amèn ali a la mor (Jenèz 3:3). Kan Adan la péché, Bondieu, « ki pe pa ramas manteur », la tenir son parol (Tit 1:2). La pa rienk le péché ke Adan la donn son bann désandan, mé li la donn osi le salèr le péché, la mor.

   Mèm si bann zumin ke lé pécheur lé kondané a mor, Bondieu i donn azot « le richès de [son] plu gran faveur ke pèrsonn i mérit pas » (Éfézien 1:7). Le moyien ke li la pran pou rachèt tout demoun, sétadir ke li la anvoy Jézu pou ke li donn son vi parfé an sakrifis, lété vréman jus é té i fémont din fason inkroiyab son pitié pou akord le pardon.

•   Kansa Jézu lé mor ?

   Jézu lé mor « 3 zeur laprémidi apepré » le jour la Pak juiv (Mark 15:33-37). Dapré bann kalandrié modèrn, se jour la i akord èk le vandredi 1^é avril 33 de nout tan.

•   Ousa Jézu lé mor ?

   Jézu la été tué dan « landroi ke nou apèl la plas le Crâne, ke lé apelé Golgotha dan lang bann zébreu » (Jan 19:17, 18). Dan lépok la ,se landroi lété « an deor Jéruzalèm » (Ébreu 13:12, Parole de Vie). Riskab li té trouv ali desu in kolinn, car la Bib i rakont ke navé detroi moun té i gard la mor Jézu « de loin » (Mark 15:40). Seulman, i gingn pa di vréman ousa Golgotha té i trouv.

•   Koman Jézu lé mor ?

   Mèm si néna in ta i pans ke Jézu lé mor desu in croi, la Bib i di bien ke : « Li la port li mèm nout bann péché dan prop kor su le poto[ou : larb] » (1 Pièr 2:24, note). Pou koz desu le linstruman d’soufrans Jézu, sak la ékri la bib, la utiliz bann mo grèk stauros é xulon. Na in ta spésialis la Bib la ariv desu le konkluzion ke se bann mo la i ve dir in pout oubien in poto droit ki mont é ke té fabriké rienk èk in morso d’boi.

•   Koman souvnir a nou la mor Jézu ?

   Le soir la Pak juiv, Jézu la mèt an plas in sélébrasion simp avèk son bann disip é li la demann bana : « Kontinué fé sa pou rapèl a zot de moin » (1 Korintien 11:24). Jézu la été tué detroi zeur plu tar.

   Sak la ékri la Bib la kompar Jézu èk le ti mouton ke té ofèr an sakirfis le jour la Pak (1 Korintien 5:7). Kom le sélébrasion la Pak té i rapèl bann Juif ke bana la été libéré lésclavaj, le Mémoryal la mor Jézus Kris i rapèl bann krétien ke bana la été libéré le péché é la mor. La Pak, ke i éspas le 14 nizan dapré le kalendrié ki suiv la lunn, lété in sélébrasion ke té i fé tou lé zan. Lé parèy, bann premié krétien té i sélèb le Mémoryal in foi par an.

   Tou lé zan, kan i ariv le jour ke i akord ansanm le 14 nizan, néna domoun par milion i souvien a zot la mor Jézu partou desu la tèr.