Peršo Korinťanenge 1:1-31
1 Me, o Pavol, saves o Del kidňa avri, kaj te avav apoštolos le Ježišoskero Kristoskero the amaro phral o Sostenes,
2 bičhavas ada ľil le Devleskere zboroske, savo hino andro foros Korint. Bičhavas les tumenge, savendar o Del kerďa svatonen a save san zajekh le Ježišoha Kristoha. Tumen kidňa avri, kaj te en svata. Tiš les bičhavas savorenge, save pre dojekh than ašaren o menos amare Rajeskero le Ježišoskero Kristoskero, savo hino lengero the amaro Raj:
3 Mi del tumen o Del, amaro Dad the o Raj o Ježiš Kristus baro lačhipen the mi el tumen o smirom.
4 Furt vaš tumenge paľikerav le Devleske, sar mišľinav pre leskero baro lačhipen, savo tumenge presikaďa sar olenge, save keren oda, so o Ježiš Kristus.
5 Vaš oda, hoj san zajekh le Kristoha, ta chudľan sa ke kada, kaj mište te džanen te vakerel le Devleskere lava a mište te prindžaren leskero lav.
6 Dičhol olestar, hoj o čačipen, savo šunďan pal o Kristus, tumenge igen iľan ko jilo.
7 Vaš oda hin tumen savoro, so kampel, medik* igen užaren, kaj amaro Raj o Ježiš Kristus te sikavel peskeri zor.
8 O Del tumen zoraľarela, kaj pre tumende te na phenen ňič nalačho koda ďives, sar avela amaro Raj o Ježiš Kristus.
9 O Del, savo tumen kidňa avri, kaj te en zajekh leskere Čhaha le Ježišoha Kristoha amare Rajeha, hino verno.
10 Phralale mire, phenav tumenge andro menos amare Rajeskero le Ježišoskero Kristoskero, kaj te aven zajekh andre oda, so vakeren, sar premišľinen the andre tumare nazori. Ľikeren tumen jekhetane a ma keren skupinki.
11 Phralale mire, le manušendar, so dživen andre jekh kher la Chlojnaha man dodžanľom, hoj tumen maškar tumende na ľikeren jekhetane.
12 Mišľinav pre ala tumare lava: „Me som le Pavloha! Me le Apoloha! Me le Kefasoha!* A me le Kristoha!“
13 Aľe hino o Kristus ča varesavenca? Sas vaš tumenge primardo pro drukos o Pavol? Sanas bolde andro Pavloskero menos?
14 Paľikerav le Devleske, hoj na bolďom ňikas tumendar ča le Krispus the le Gajus.
15 Avka ňiko našťi phenel, hoj sanas bolde andre miro menos.
16 A mek bolďom olen, so bešen andre jekh kher le Šťefanoha. Aľe imar na džanav či mek bolďom varekas avres.
17 Bo o Kristus man na bičhaďa te bolkerel, aľe te vakerel e lačhi sprava. Aľe na kavka, kaj te vakerav sar ajse, saven hin bare školi. Aľe kaj sako te achaľol, so baro anďa koda, hoj o Kristus muľa pro drukos.*
18 O čačipen pal o Kristoskero meriben pro drukos* hino diliňipen predal ola, saven užarel o meriben. Aľe predal amende, so sam zachraňimen, amenge oda sikavel, savi bari hin zor le Devles.
19 Sem hin pisimen: „Lava e goďi olendar, so peske mišľinen, hoj hine goďaver. A kolendar, so peske mišľinen, hoj hine sikhľarde avri, mange na kerava ňič.“
20 Ta akor, kaj hino oda goďaver, oda, savo sikhľarel andal o zakonos a oda baro filozofos? Na sikaďa o Del, hoj e goďi, so sikhľarel ada svetos, hin diliňipen?
21 O manuša andre kada svetos na prindžaren le Devles, bo pes zmukhen ča pre peskeri goďi. E lačhi sprava, so amen vakeras, predal lende na mol ňič. Aľe o Del peske phenďa, hoj prekal kadi lačhi sprava zachraňinela olen, save paťan. A andre kada pes sikaďa le Devleskeri goďi.
22 O Židi kamen ča zazraki a le Grekenge džal ča pal e goďi.
23 Aľe amen vakeras pal o Kristus, saves primarde pro drukos. Kada le Židenge podmarďa o pindre a predal aver narodi hin oda diliňipen.
24 Aľe predal ola Židi the Greki, save hine kidne avri, hino o Kristus koda, prekal savo o Del sikavel, savo hino goďaver the zoralo.
25 O manuša pre oda, so kerďa o Del, šaj dikhen, hoj hino oda diliňipen a hoj oda nane ňič. Aľe andre kada, so kerďa o Del, hin o keci bareder goďi the zor sar hin le manušen.
26 Phralale, sem the korkore džanen, hoj o Del peske na kidňa but olen, save hine goďaver andre manušeskere jakha. Aňi but kajsen, save hine bare raja a aňi but kajsen, save hine andal ajsi fajta, so bi enas vareko.
27 O Del peske kidňa avri kajsen, pre save o manuša dikhen sar pro diline, kaj te zaladžal le goďaveronen. Kidňa peske avri kajsen, pre save o manuša dikhen, hoj na mon ňič, kaj te zaladžal le bare rajen.
28 Kidňa peske avri kajsen, pre save o manuša dikhen, hoj na mon ňič a pre save dikhen sar pro rukone. Kaleha odčhiďa oda, so hin predal o manuša igen baro.
29 Kerďa oda, kaj pes ňiko korkoro angle leste te na ašarel.
30 Aľe hino oda o Del, ko tumendar kerďa le Ježišoskere Kristoskere učeňiken. A prekal leste amenge o Del sikaďa, savo hino goďaver the spravodlivo.* A tiš prekal o Ježiš šaj avas svata* a tiš amen cinďa avri andal o binos.
31 Avka pes ačhela oda, so hin pisimen: „Ko pes ašarel, ta mi thovel baripen andro Jehovas.“*
Poznamki tele čijarkica
^ Abo pokim.
^ Aver menos le Peteriskero.
^ Dikh tuke buter adaj andro Slovňikos.
^ Dikh tuke buter adaj andro Slovňikos.
^ Dikh tuke buter adaj andro Slovňikos.
^ Dikh tuke buter adaj andro Slovňikos.
^ Dikh o dodatkos A5.
