So dikhľa o Jan – Zjaveňe 2:1-29
2 Le aňjeloske andro zboros Efez pisin: Ada vakerel koda, savo ľikerel andro pravo vast 7 čercheňa* a phirel maškar o 7 somnakune* svjetňika:
2 ‚Džanav pal tire skutki, pal tiri phari buťi a olestar sar ľikeres avri. A džanav, hoj na domukhes, kaj maškar tumende te en o nalačhe. Chudľal avri olen, save vakeren, hoj hine apoštola, aľe nane apoštola a avľal pre kada, hoj klaminen.
3 Na vzdes tut a but tuke cerpinďal avri angle* miro menos a kada tuke na iľa e zor.
4 Aľe hin man proťi tute kada, hoj tut imar nane ajso kamiben sar tut sas akor, sar sikhľohas pal o Del.
5 Vaš oda rozmišľin, so kaleha našaďal a bajin oda nalačho, so kerehas. A ker skutki, save kerehas, sar sprindžarďal o čačipen. Te na bajineha, avava ke tu a čhivava tele tiro svjetňikos pal leskero than.
6 Aľe keres the vareso lačho: nanavidzines koda, so kerel le Mikulašiskeri sekta, oda so the me nanavidzinav.
7 Sako mište mi šunel, so vakerel o Del prekal peskeri zor le zborenge: Oleske, ko ačhela verno, dava te chal le stromostar, savo del o dživipen, savo hino andro Devleskero rajos.‘
8 Le aňjeloske andro zboros Smirna pisin: Ada vakerel koda Peršo the Posledno, savo sas mulo a odžiďiľa:
9 ‚Džanav olestar sar cerpines the pal tiro čoripen, aľe sal barvalo andro paťaviben. Džanav the olestar sar tumenge rakinen ola, save pal peste vakeren, hoj hine Židi, aľe nane Židi. On hine le Satanoskere manuša.*
10 Ma dara olestar, so tuke mušineha te cerpinel avri. O Beng varesaven tumendar čhivela andre harešta. Kavka pes presikavela, savo zoralo hino tumaro paťaviben a džana pre tumende 10 ďives. Ačh verno dži o meriben a dava tuke e koruna, savi del o dživipen.
11 Sako mište mi šunel, so vakerel o Del prekal peskeri zor le zborenge: Oleske, ko ačhela verno, leske o dujto meriben na kerela ňič.‘
12 Le aňjeloske andro zboros Pergam pisin: Ada vakerel koda, saves hin bari šabľa ostro soduje serendar:
13 ‚Džanav, hoj bešes odoj, kaj hino le Satanoskero tronos. Aľe ačhiľal mange verno* a zorales andre ma paťahas the akor, sar ke tumende odoj, kaj bešel o Satan, murdarde mire vernone svedkos le Antipas.
14 Aľe hin man proťi tute kada: Hin andro zboros manuša, save pes ľikeren olestar, so sikhľarelas o Balam. Ov sikhľarelas le Balak te scirdel le Izraelčanen, kaj te chan o mas obetimen le modlenge a kaj te keren lubipen.*
15 A hin odoj the ajse, save pes ľikeren olestar, so sikhľarel le Mikulašiskeri sekta.
16 Vaš oda bajin oda, so kerehas, bo te na, avava ke tu so neksigeder a džava proťi lende bara šabľaha, savi avel avri andal miro muj.
17 Sako mište mi šunel, so vakerel o Del prekal peskeri zor le zborenge: Oleske, ko ačhela verno, dava la manatar, savi hiňi garuďi a dava les parno baroro. Pre leste ela pisimen nevo menos, savo na prindžarel ňiko, ča koda, ko les chudela.‘
18 Le aňjeloske andro zboros Tijatira pisin: Ada vakerel le Devleskero Čhavo, saves hin jakha, save švicinen sar zoraľi jag a o pindre sar meďos, savo demel andro jakha:
19 ‚Džanav pal tire skutki, save kerehas the pal tiro kamiben, paťaviben, the olestar, so kerehas predal o Del the oda, hoj tut na vzdes. A džanav, hoj keres tiri buťi predal o Del mek feder sar kerehas.
20 Aľe hin man proťi tute ada, hoj sar šaj domukhes andro zboros ajsa romňa, savi hiňi sar e Jezabel, savi pal peste vakerel, hoj hiňi prorokiňa. Oj sikhľarel a scirdel mire služobňiken, kaj te keren lubipen* a kaj te chan o mas obetimen le modlenge.
21 Diňom la časos, kaj te bajinel a te preačhel te kerel o lubipen,* aľe oj na kamel.
22 Vaš oda pre late anava o nasvaľiben. A olenge, so laha keren o lubipen, kerava, kaj igen te cerpinen, te na bajinena ole nalačipnastar, save kerelas oj.
23 Lakere čhaven murdarava ajse nasvaľibnaha, pre savo merena. Avka savore zbori sprindžarena, hoj me dikhav andro jilo the andre goďi oda, so ňiko na džanel. A dava pale dojekheske tumendar pal tumare skutki, save kerenas.
24 Tumenge avrenge andre Tijatira, save na prilen oda, so sikhľarel e Jezabel a na sprindžarďan oda falošno sikhľariben le Satanostar, phenav: Na kamav tumendar ňič ajso pharo,
25 ča dureder džan pal oda lačho drom, pal savo džan, medik* na avava.
26 Oleske, ko ačhela verno a doľikerela dži o agor oda, so phenďom, dava zor upral o narodi.
27 Lela e trastuňi paľica, kaj te marel* le manušen a odčhivela len. A ena sar čikakere kuča, save ena rozmarde pro kotora. The me ajsi zor chudľom mire Dadestar.
28 A dava leske e čercheň, savi avel avri tosara.
29 Sako mište mi šunel, so vakerel o Del prekal peskeri zor le zborenge.‘
Poznamki tele čijarkica
^ Abo hvjezdi.
^ Abo zlata.
^ Abo vaš, bijal, aščal, predal.
^ Doslovňe: le Satanoskeri sinagoga.
^ Doslovňe: ľikeres tut mire menostar.
^ Dikh tuke buter adaj andro Slovňikos.
^ Dikh tuke buter adaj andro Slovňikos.
^ Po grecki porneia. Dikh tuke buter adaj andro Slovňikos.
^ Abo pokim.
^ Abo lela e trastuňi paľica a vladňinela le manušenge.
