Kada pisinďa o Marek 13:1-37
13 Sar o Ježiš džalas het andal o chramos, jekh le učeňikendar leske phenďa: „Učiťeľina, dikh, save šukar bara the calo chramos!“
2 Aľe o Ježiš leske phenďa: „Dikhes kala bare stavbi? Phenav tumenge, hoj adaj na ačhela bar pre bareste. Savoro ela arado tele.“*
3 O Ježiš bešelas pro Olivovo vrchos kavka, kaj te dikhel pro chramos. Avle pal leste ča o Peter, o Jakub, o Jan the o Andrej. Phučle lestar:
4 „Phen amenge, kana oda ela a sar pes sprindžarela o časos, hoj imar avel o agor kale svetoske?“
5 Akor lenge chudňa o Ježiš te vakerel: „Den tumenge pozoris, kaj tumen vareko te na oklaminel.
6 Butdžene avena andre miro menos a phenena: ‚Me som o Kristus.‘ A kaleha butdženen oklaminena.
7 Sar šunena, hoj pro but thana hine o maribena, ma daran olestar. Kada pes mušinela te kerel. Aľe oda mek na ela o koňec.
8 O narodos džala proťi o narodos a o kraľišagos proťi o kraľišagos. E phuv razisaľola pro but thana a ela bokh. Kaleha savoreha chudena o bare pharipena.
9 Aľe tumen tumenge den pozoris! Bo o manuša tumen dena pro sudi a marena tumen andro sinagogi. Anena tumen anglo vladara the kraľa, kaj the lenge te vakeren pal oda, andre soste paťan.
10 Aľe sigeder, sar avela o koňec, pes mušinel savore narodenge te vakerel pal e lačhi sprava.
11 Sar tumen anena pro sudos, ma keren tumenge pharo šero oleha, so vakerena. Akor džanena, so kampel te phenel. Bo na vakerena ča tumen korkore, aľe pomožinela tumenge e zor* tumare ňebeskone Dadestar.
12 O phral dela te murdarel le phrales a o dad peskere čhavores. A o čhave džana proťi peskeri daj dad a dena len te murdarel.
13 Savore manuša tumen nanavidzinena vaš oda, hoj san mire učeňika. Aľe ko ľikerela avri dži andro agor, ela zachraňimen.
14 Vaš oda, sar dikhena o džungaľipen, savo pal peste savoro aravel a terďol odoj, kaj na majinel (kaj te achaľos, so genes, mušines te rozmišľinel), paľis ola, so hine andre Judeja, mi denašen andro veša.
15 Ko ela pro pados* le khereske, te na avel tele andro kher peske vareso te lel.
16 A ko ela pre maľa, te na avel pale te lel peske o upruno uraviben.
17 Sar phares ela andre ola ďivesa le khabňenge the olenge, so dena te pijel!
18 Modľinen tumen, kaj oda te na avel jevende.
19 Bo akor ela igen baro trapišagos, savo mek na sas, kanastar o Del kerďa o svetos dži doakana. A savo imar ňigda na ela.
20 Te bi o Jehovas* na scharňarelas ala ďivesa, ta bi na elas zachraňimen ňiko. Aľe angle* ola, saven peske kidňa avri, ola ďivesa scharňarela.
21 Te tumenge vareko phenela: ‚Dikhen, adaj hino o Kristus!‘, abo ‚Odoj hino!‘, ma paťan oleske.
22 Bo avena falošna proroka a o manuša pestar kerena le kristus. Kerena bare znameňa the zazraki. A oleha kamena te oklaminel the olen, kas peske o Del kidňa avri.
23 Vaš oda pre tumende merkinen! Phenďom tumenge savoro anglal, ňič anglal tumenge na garuďom.
24 Pal koda igen baro trapišagos, savo ela andre ola ďivesa, pes zacmavinela o kham, preačhela te švicinel o čhon,
25 pal o ňebos perena o čercheňa* a o zorale veci andro ňebos razisaľona.
26 Akor dikhena le Čhas le manušeskeres* sar avel pro chmari bara zoraha the ašaribnaha.
27 Paľis bičhavela peskere aňjelen a skidela olen, kas peske kidňa avri, pal savore štar seri le svetoskere, jekhe agorestar la phuvake dži ko agor le ňeboske.
28 Sikhľon le figovňikostar: Sar skovľon leskere konarici a barona upre o prajta, džanen, hoj o ňilaj* hino pašes.
29 Avka isto the tumen. Te dikhena, hoj pes kada savoro kerel, šaj džanen, hoj o Čhavo le manušeskero maj avela.
30 Phenav tumenge, hoj ala manuša na merena, medik* pes kada savoro na ačhela.
31 O ňebos the e phuv našľona, aľe mire lava ačhena pro furt.
32 Ole ďivesestar aňi ola oratar na džanel ňiko, aňi o aňjela andro ňebos, aňi o Čhavo, ča o Dad.
33 Vaš oda merkinen a ma soven, bo na džanen, kana oda avela.
34 Hin oda avka, sar o manuš, savo džal andre aver phuv a peskero kher del andro vasta peskere otrokenge. Sakoneske phenela, so majinel te kerel a oleske, so phuterkerel* o vudar phenela, hoj našťi zasovel.
35 Vaš oda ma soven, bo na džanen, kana avela o raj upral o kher. Či avela raťi, či pal jepaš rat, či sigeder sar avela avri o kham, či sig tosara,
36 kaj tumen te na arakhel te sovel. Bo avela akor, sar oda tumen na užarena.
37 Oda, so phenav tumenge, phenav savorenge: Ma soven!“
Poznamki tele čijarkica
^ Abo čhido tele, zburimen.
^ Doslovňe: o svato duchos.
^ Abo pro dachos, pre strecha.
^ Dikh o dodatkos A5.
^ Abo vaš, aščal, bijal, predal.
^ Abo o hvjezdi.
^ Dikh tuke buter adaj andro Slovňikos.
^ Abo linaj.
^ Abo pokim.
^ Abo phundravel, odkerel.
