Rimanenge 13:1-14
13 E zor, savi hin le vladen, hiňi le Devlestar. Vaš oda mušinel dojekh manuš kale vladen te šunel. A kalen, so vladňinen, andre lengere poziciji* thoďa o Del.
2 Vaš oda koda, ko džal proťi kala vladi, džal proťi oda, so kerďa o Del. Ala, so ada keren a džan proťi kala vladi, ena vaš kada sudzimen.
3 Bo le manušendar, save vladňinen, na mušinel te daral koda, savo šunel o zakonos, aľe koda, savo na šunel. Te na kames, kaj tut o vladi vareso te na keren, ta ker oda, so pes tutar užarel a kavka tut e vlada ašarela.
4 O Del thoďa kale vladen pre tiro lačhipen, kaj tuke te pomožinen. Aľe te keres vareso nalačho, dara tut, bo nane jevavalom* la vlada zor pre kada, kaj tut te potrestinel.* O Del domukhľa le vladenge, kaj te den pale olenge, so keren o nalačhipen.
5 Vaš oda amenge igen kampel te šunel kale vladen. Na ča vaš oda, hoj daras olestar, hoj avaha potrestimen. Aľe the angle* kada, bo na kamas, kaj amen te chal amaro svedomje.
6 Vaš oda the poťinen o daňi. Bo kala vladi, saven thoďa o Del, hine le manušenge pre kada, kaj lenge furt te pomožinen.
7 Dojekheske den oda, so leske patrinel. O daňi oleske, kaske kampel te poťinel o daňi. Poťinen sa, so kampel te poťinel. Presikaven e paťiv oleske, kaske kampel te presikavel e paťiv a važinen tumenge olen, kas peske kampel te važinel.
8 Ma len pre tumende ajci, hoj tumen paľis na ela sostar te poťinel. Aľe so mušinen te kerel hin, kaj rado te dikhen jekhe avres. Bo ko rado dikhel avres, sikavel, hoj mištes achaľiľa le Zakonoske.
9 Ala prikazaňa „na džaha avreha, avraha, na murdareha, na čoreha, na kameha oda, so hin avres“ a the aver prikazaňa, hine phende andre jekh zakonos: „Rado dikheha avres sar pes korkores.“
10 Te hin le manušes o kamiben, na kerela avreske ňič nalačho. Avka koda, ko rado dikhel avren, sikavel, hoj mište achaľiľa le Zakonoske.
11 Kada savoro keren the vaš oda, bo džanen andre save ďivesa dživas. Imar avľa o časos, kaj tumen te prekeren andal o soviben. Akana sam imar o keci pašeder oleske, kaj te avas zachraňimen, sar akor, sar chudňam te kerel oda, so o Ježiš.
12 E rat maj džal avri, maj ela o ďives. Vaš oda našťi keras ňič, so hino spojimen le kaľipnaha, aľe mušinas te lel sar te bi o zbraňi, save anen o švetlos.
13 Ďivese hine o manuša slušna. The amen mušinas te el ajse. Na džaha odoj, kaj pes zabavinen bije ladž,* na maťuvaha, na keraha lubipen, na keraha binos bije ladž,* na vesekedinaha* amen a na zavidzinaha amenge.
14 Keren koda, so kerelas amaro Raj o Ježiš Kristus a ma rozmišľinen pal oda sar te kerel oda, pre soste cirdel tumare ťelos.
Poznamki tele čijarkica
^ Hin len cikneder abo bareder postaveňe, aľe ňigda len na ela bareder postaveňe sar le Devles.
^ Abo hijaba.
^ Doslovňe: na hijaba hordinel (phiravel) šabľa.
^ Abo vaš, bijal, aščal, predal.
^ Oda hin: pijel pes odoj but, kerel pes odoj lubipen.
^ Greciko lav aselgeia. Dikh tuke buter adaj andro Slovňikos.
^ Abo na keraha, na halasinaha, na hadinaha.
