KAPITOLA DEŠUPANDŽ
Sar o Del kamel, kaj leske te služinas?
1) Ko amenge šaj phenel, sar te služinel le Devleske?
NAŠŤI el čačo, hoj savore naboženstva sikaven čačipen pal o Del. Soske? Nane jednotna andre ada, ko hino o Del, aňi sar leske te služinel. Savo naboženstvo pes pačinel le Devleske? Ča o Jehovas amenge šaj phenel, sar leske te služinas.
2) Sar tut šaj dodžanes, sar mište te služinel le Devleske?
2 O Jehovas amen diňa e Biblija, kaj pes te dodžanas, sar leske te služinel. Študin e Biblija a o Jehovas tuke pomožinela, kaj tut te dodžanes čačipen. Kamel tuke te pomožinel, bo tut rado dikhel. (Izaiáš 48:17)
3) So kamel o Del, kaj te keras?
3 O manuša phenen, hoj o Del rado dikhel savore naboženstva. Ada o Ježiš na sikavelas. Phenďa: „Na sako, ko mange phenel ‚Rajeja, Rajeja‘, džala andro ňebesko kraľišagos, ale ča oda, ko kerel savoro, so kamel miro Dad.“ Kampel, kaj pes te dodžanas, so o Del kamel a paľis ada mušinas te kerel. O Ježiš phenďa, hoj o manuša, so na šunen le Devles, hine sar ola, „so keren o nalačhipen“. (Matúš 7:21–23)
4) Phenďa o Ježiš, hoj ela loko te kerel le Devleskeri voľa?
4 O Ježiš phenďa, hoj na ela furt loko te kerel le Devleskeri voľa: „Aven andre prekal e cesno [brana]. Bo hin the buchľi [brana] a buchlo drom, savo ľidžal andro [zňičeňe] a but hin ajse, so palal phiren. Ale hin the cesno [brana] the uzko drom, savo ľidžal andro dživipen a frima (čepo) hin ajse, so les arakhen.“ (Matúš 7:13, 14 NZ) Pre „uzko drom“ phiren ola, so služinen le Devleske avka, sar o Del rado dikhel. Ada drom džal ko večno dživipen. Pro „buchlo drom“ hin ola, so na služinen mište le Devleske. Ada drom džal ko meriben. O Jehovas na kamel, kaj vareko te merel. Davkerel savoren šanca, kaj pes te dodžanen čačipen pal leste. (2. Petra 3:9)
SAR MIŠTE TE SLUŽINEL LE DEVLESKE?
5) Sar šaj sprindžaras olen, so mište služinen le Devleske?
5 O Ježiš phenďa, hoj šaj prindžaras le Devleskere služobňiken. Sar? Pal lengero dživipen the pal oda, andre soste paťan. O Ježiš phenďa: „Pal lengero ovocje len prindžarena... Dojekh lačho stromos anel lačhe ovocje.“ (Matúš 7:16, 17 NZ) Ola, so služinen le Devleske, nane dokonala, ale snažinen pes te kerel lačho. Ko hine prava Devleskere služobňika?
6, 7) Soske hin mište te služinel le Devleske avka, sar phenel e Biblija? So amen sikavel le Ježišoskero priklados?
6 Služinas avka, sar hin pisimen andre Biblija. E Biblija phenel: „Calo Pisišagos (e Biblija) avel andral le Devleskero muj a hino lačho pre oda, hoj le manušes te sikavel, te dovakerel (phenel pre goďi) andro dživipen, te karhinel a te bararel les avri, hoj te prindžarel o čačipen.“ (2. Timotejovi 3:16, 17 NZ) O apoštol Pavol pisinďa: „Sar priiľan o lav le Devleskero, so šunďan amendar, na priiľan les sar le manušeskero lav, ale sar le Devleskero lav, bo ajso the čačes hino.“ (1. Tesaloničanom 2:13 NZ) Te kamas mište te služinel le Devleske, doľikeras oda, so hin andre Biblija a na ada, so peske mišľinen o manuša, hoj hin mište, aňi naboženska tradiciji či vareso aver.
7 Savoro, so o Ježiš sikavelas, sas andal le Devleskero lav. (Pregen Ján 17:17.) Furt delas duma pal o biblicka verši. (Matúš 4:4, 7, 10) O prava kresťana napodobňinkeren le Ježiš. Keren savoro avka, sar hin pisimen andre Biblija.
8) So sikavelas o Ježiš pal oda, sar te služinel le Jehovaske?
8 Amaro Del hino o Jehovas. Žalm 83:18 phenel: „Kaj te prindžaren, hoj tu, saves hin o menos Jehovas, tu korkoro sal nekbareder upral e caľi phuv.“ O Ježiš sikavelas pal o Del the pal le Jehovaskero menos. (Pregen Ján 17:6.) O Ježiš phenďa: „Oda hin o Jehovas, tiro Del, leske služineha a leske korkoreske presikaveha svato služba.“ (Matúš 4:10) Amen sar le Devleskere služobňika, napodobňinas le Ježiš. Služinas ča le Jehovaske, použinas leskero menos, sikavas avren, sar pes vičinel o Del a so amenge sľubinel.
9, 10) Sar presikavas e laska avrenge?
9 Mušinel amen te el čačipnaskeri laska jekh ke aver. O Ježiš sikavelas le učeňiken, kaj te kamen jekh avres. (Pregen Ján 13:35.) Na zaležinel pre ada, khatar sam, andal savo narodos amen sam, abo či sam barvale, abo čore. Amari laska jekh ke aver amen sphandel sar phralen pheňen. (Kolosanom 3:14) Na džas andro vojni a na murdaras le manušen. E Biblija phenel: „Le Devleskere čhaven the le Bengeskere (Ďabloskere) čhaven šaj prindžaras pal ada: Ko na kerel oda, so hin spravodlivo, nane le Devlestar, aňi oda manuš, ko na kamel peskere phrales.“ Paľis phenďa: „Majinas te kamel jekh avres; na avka sar o Kajn, so sas ole nalačhestar a murdarďa peskere phrales.“ (1. Jána 3:10–12; 4:20, 21)
10 Das amaro časos, zor the hmotna veci, kaj te pomožinas a te ľikeras jekh avres. (Hebrejom 10:24, 25) „Keras o lačhipen savorenge.“ (Galaťanom 6:10 NZ)
11) Soske prilas le Ježiš sar drom ko Del?
11 Mušinas te šunel le Ježiš, bo ov hino o drom ko Del. E Biblija phenel: „A nane andre ňikaste avreste e zachrana, bo aňi nane aver menos tel o ňebos, savo uľahas (avľahas) dino le manušenge, andre savo avaha zachraňimen.“ (Skutky 4:12) Andre 5 kapitola pes dodžanľam, hoj o Jehovas bičhaďa le Ježiš, kaj te del peskero dživipen sar cena vaš e zachrana vaš o poslušna manuša. (Matúš 20:28) O Jehovas kidňa avri le Ježiš, kaj te vladňinel sar kraľis upral e phuv. Vašoda e Biblija phenel, hoj mušinas te šunel le Ježiš, te kamas te dživel pro furt. (Pregen Ján 3:36.)
12) Soske na keras ňič, so suvisinel la politikaha?
12 Našťi pes zapojinas andre politika. O Ježiš pes na zapojinelas andre politika. Sar sas paš o rimsko vladcas Pilat, phenďa leske: „Miro kraľišagos nane andal kada svetos.“ (Pregen Ján 18:36.) Avka, sar o Ježiš the amen sam verna le Devleskere ňebeske kraľišagoske. Dživas andro všelijaka krajini, ale ňigda na keras ňič, so suvisinel la politikaha. Pre aver sera, mušinas te šunel olen, so len hin „autorita upral amende“. Ada hin napriklad policija, uradi, vlada. (Rimanom 13:1) Amen šunas o zakoni, so hin andre krajina, andre savi dživas. Ale, te amenge ajso zakonos phenel, kaj te keras vareso, so le Devleskero zakonos zakazinel, abo kaj te na keras oda, so prikazinel o Del, akor mušinas te el ajse sar sas o apoštola, so phende: „Mušinas te šunel le Devles sar vladcas buter sar le manušen.“ (Skutky 5:29; Marek 12:17)
13) So zvestinas (das te džanel aver manušenge) pal le Devleskero kraľišagos?
13 Paťas, hoj ča le Devleskero kraľišagos odstraňinela o problemi andro svetos. O Ježiš phenďa, hoj e lačhi sprava pal o kraľišagos šunena o manuša pal calo svetos. (Pregen Matúš 24:14.) Manušengere vladi našťi keren oda, so le Devleskero kraľišagos. (Žalm 146:3) O Ježiš amenge sikaďa te modľinel pes, kaj te avel le Devleskero kraľišagos. Phenďa: „Mi avel tiro kraľišagos. Mi kerel pes oda, so tu kames, sar andro ňebos avka the pre phuv.“ (Matúš 6:10) E Biblija phenel, hoj ada kraľišagos zňičinela savore manušengere vladi a ča „korkoro ačhela pro furt“. (Daniel 2:44)
14) Ko služinel le Devleske avka, sar ov kamel?
14 Akana phuč korkoro tutar: „Ko sikavel oda, so hin andre Biblija? Ko vakerel avrenge pal le Devleskero menos? Ko presikavel čačipnaskeri laska jekh avreske a paťal, hoj o Del bičhaďa le Ježiš, kaj amen te zachraňinel? Ko na kerel ňič la politikaha? Ko phenel pal ada, hoj ča le Devleskero kraľišagos odčhivela amare problemi?“ Oda hine ča le Jehovaskere svedki.
SO KEREHA?
15) So mušinas te kerel, kaj o Del te prilel oda, sar leske služinas?
15 Na stačinel ča te paťal, hoj hin o Del. The o demoni paťan, hoj o Del hin andro ňebos. Ale na šunen les. (Jakub 2:19) Te kamas, kaj o Del te prilel amari služba, mušinas na ča te paťal, hoj hin, ale tiš te kerel oda, so amenge phenel.
16) Soske mušinas te džal avri andal o falošno naboženstvo?
16 Mušinas te džal avri andal o falošno naboženstvo. Ča akor ela amari služba lačhi andre le Devleskere jakha. O prorokos Izajaš pisinďa: „Džan avri odarig, ľikeren tumen olestar, so hin čisto.“ (Izaiáš 52:11; 2. Korinťanom 6:17) Kampel, kaj te preačhas te kerel savoro, so hin andal o falošno naboženstvo.
17, 18) So hin „o Baro Babilon“ a soske hin dvoležito les te omukhel?
17 So hin falošno naboženstvo? O naboženstvo, so na phenel pal o Del oda, so hin pisimen andre Biblija. E Biblija vičinel savore falošna naboženstva: „Baro Babilon.“ (Zjavenie 17:5) Soske? Andro foros Babilon, imar pal e potopa andre Noachoskeri doba, sikavenas falošna naboženska nauki. Ola nauki pes rozľigende všadzik pal caľi phuv. O Babilončana pes modľinenas ke trojica. Adaďives tiš but naboženstva sikaven, hoj o Del hino trojica, ale e Biblija pisinel, hoj hin ča jekh Del, o Jehovas, a o Ježiš hino leskero Čhavo. (Ján 17:3) O Babilončana paťanas, hoj e duša dživel pal o meriben a hoj hin jagalo peklos. Aňi ada nane čačipen. (Dikh o poznamki 14, 17 the 18.)
18 O Del angal phenďa, hoj savore falošna naboženstva ena zňičimen. (Zjavenie 18:8) Imar džanes, soske kampel te džal avri andal o falošno naboženstvo? O Jehovas kamel, kaj ada te keres so neksigeder, kaj te na aves lenca zňičimen. (Zjavenie 18:4)
Služin le Jehovaske leskere ľudoha a pal calo svetos ela tut phrala pheňa
19) Sar tuke pomožinela o Jehovas, te leske kameha te služinel?
19 Te tut rozhodňineha te omukhel o falošno naboženstvo a služinel le Jehovaske, tiri fameľija možno na achaľola, soske ada keres. Možno tuke kerena varesave pharipena andro dživipen. Ale o Jehovas tut na omukhela. Dela tut pal calo svetos ajsi fameľija, andre savi hin milijoni phrala pheňa, so čačes kamen jekh avres. Ela tut dživipen pro furt andro Devleskero nevo svetos. (Marek 10:28–30) Možno varesave olendar, so akana tuke keren pharipena vašoda, hoj služines le Jehovaske, pes paľis šaj rozhodňinen, hoj študinena e Biblija.
20) Soske kampel te služinel le Devleske avka, sar ov kamel?
20 So neksigeder o Del zňičinela savoro nalačhipen a leskero kraľišagos vladňinela la phuvake. (2. Petra 3:9, 13) Ada amenge anela baro radišagos! Savore služinena le Devleske avka, sar ov rado dikhela. Vašoda kampel imar akana te kerel savoro, kaj mište te služines le Devleske.
