1, 2) (a) Soske darčeki na mušinen te mol but love? (b) Soske hino oda, hoj sas obetimen le Ježišoskero dživipen, nekbareder daros le Devlestar?

SAVO nekšukareder darčekos chudňal? Ada darčekos na mušinďa te mol but love. Sas tuke vzacno, bo tuke kerďa radišagos, abo chudňal vareso, so tuke čačes kampelas.

² O Del davkerel but veci, ale jekh daros hin nekbareder. Adi kapitola sikavela, hoj o Del bičhaďa le Ježiš Kristus, kaj amen te dživas večňe. (Pregen Matúš 20:28.) Aleha, hoj sas obetimen le Ježišoskero dživipen, o Del sikaďa, hoj igen rado dikhel le manušen.

3) Soske o manuša meren?

³ Le Ježišoskero dokonalo dživipen sas presňe ajsi cena, so kampelas te poťinel, kaj o manuša te en cinde avri andal o bini (hrjechi) the o meriben. A o Jehovas ada diňa. (Efezanom 1:7) Kaj te achaľuvas, soske ada kampelas, mušinas te džanel, so pes ačhiľa anglo ťisice berša andre zahrada Eden. O Adam la Evaha, zhrešinde a mule. A amen meras, bo lendar zďeďinďam o binos (hrjechos). (Dikh e poznamka 9.)

4) Ko sas o Adam a savo sas?

⁴ O Jehovas stvorinďa le Adam a diňa les vareso vzacno – dokonalo manušengero dživipen, dokonalo  goďi the dokonalo ťelos. O Adam na mušinďa ňigda te el nasvalo, te phurol, aňi te merel. O Jehovas sas sar leskero dad, bo le Adam diňa dživipen. (Lukáš 3:38) O Jehovas sas sako ďives le Adamoha. Phenelas le Adamoske, so mušinel te kerel a diňa les šukar buťi. (1. Mojžišova 1:28–30; 2:16, 17)

5) Sar achaľos biblicke veršoske, hoj o Adam „šaj presikavelas ajse vlastnosťi, save hin le Devles“?

⁵ O Adam sas stvorimen avka, hoj „šaj presikavelas ajse vlastnosťi, save hin le Devles“. (1. Mojžišova 1:27) Napriklad, laska, goďi, spravodlivosť the zor. O Del diňa le Adam slobodno voľa. O Adam na sas robotos. O Del les stvorinďa avka, kaj peske te zvoľinel, či kerela oda, so hin lačho, abo so hin nalačho. Te furt kerďahas oda, so kamelas o Del, šaj džiďiľahas pro furt andro rajos.

6) So našaďa o Adam, sar na sas poslušno le Devleske? Soske the amen dživas andro trapišagos?

⁶ O Adam na šunďa le Devles a sas odsudzimen, kaj te merel. Vaš peskero binos (hrjechos) mušinďa te poťinel bari cena. O Jehovas imar na sas leskero kamaratos. Našaďa o dokonalo dživipen. Imar našťi dživelas andro rajos. (1. Mojžišova 3:17–19) Vašoda, hoj pes rozhodňinde o Adam la Evaha te na šunel le Devles, ňič lačho len na užarelas. O Adam hino vinovato, hoj „avľa pro svetos o binos (hrjechos) a o meriben avľa le binoha (hrjechoha), avka pes o meriben rozľigenďa pre savore manuša, bo savore zhrešinde“. (Rimanom 5:12) Sar o Adam zhrešinďa, „bikenďa“ pes korkores, ale the amen savoren andro otroctvos le binoske (hrjechoske) the meribnaske. (Rimanom 7:14) Užarel amen vareso lačho?

7, 8) Ko amenge šaj pomožinel, kaj te avas oslobodzimen andal o hrjechos the o meriben?

 ⁷ O Jehovas arakhľa o drom, sar te zachraňinel le manušen. Oda, so amen diňa o Del, amen 1) oslobodzinel, čiže cinel avri pre sloboda podobňe sar zaile slugaďen andre vojna, vaš save vareko poťinďa cena, savi žadinenas o ňeprjaťeľa. 2) Podobňe, sar pes poťinel vaš škodi, napriklad, te o manuš zaviňinďa ňehoda a mušinel te poťinel presňe ajci but love, keci molas oda, so zňičinďa, o Del poťinďa ajci cena vaš amenge.

⁸ Ňisavo manuš našťi poťinel vaš savore škodi, so o Adam kerďa, sar zhrešinďa a anďa o meriben pre amende. Ale o Jehovas arakhľa o drom, sar amen te oslobodzinel andal o binos (hrjechos) the o meriben. Sar oda kerďa? Savo užitkos ada anela?

9) Savi cena kampelas te poťinel, kaj o manuša te chuden pale dokonalo dživipen?

⁹ Ňiko amendar našťi poťinas ajsi cena, kaj te chudas pale dokonalo dživipen, savo našaďa o Adam. Soske? Bo sam ňedokonala. (Žalm 49:7, 8) Kampelas te del aver dokonalo manušengero dživipen. Ada sas „presňe ajsi cena, keci kampelas te poťinel“. (1. Timotejovi 2:6) Vaš dokonalo dživipen, so Adam našaďa, kampelas te poťinel aver dokonale dživipnaha.

10) So kerďa o Jehovas, kaj te avas zachraňimen?

¹⁰ So kerďa o Del, kaj te avas zachraňimen? Bičhaďa pre phuv peskere čhas, saves nekbuter kamelas, le Ježiš. (1. Jána 4:9, 10) O Ježiš sas ochotno te omukhel peskere ňebeske Dades a te oddžal andal o ňebos, kaj leske sas mište. O Jehovas le Ježiš preľigenďa pre phuv a o Ježiš pes naroďinďa sar dokonalo manuš bijo binos (hrjechos). (Lukáš 1:35)

11) Sar šaj jekh manuš zachraňinel savore manušen?

¹¹ O Adam na sas poslušno. Našaďa dokonalo dživipen. Vašoda aňi  leskere potomki na dživen večňe. Sas vareko, ko šaj odstraňinďa o meriben savore le Adamoskere potomkendar? (Pregen Rimanom 5:19.) O Ježiš na sas hrješno a diňa vaš amenge peskero dokonalo dživipen. (1. Korinťanom 15:45) O meriben šaj el odstraňimen savore le Adamoskere potomkendar, bo o Ježiš obetinďa peskero dokonalo dživipen. (1. Korinťanom 15:21, 22)

12) Soske pes mušinďa o Ježiš avka te trapinel angle peskero meriben?

¹² O Ježiš zadživelas baro trapišagos anglo meriben. Marenas les avka, hoj lestar o rat čuľalas. Primarde les pro drukos. Merelas polokes a igen les ada dukhalas. (Ján 19:1, 16–18, 30) Soske mušinďa te zadživel ajso trapišagos? O Satan phenďa, hoj ňisavo manuš na ačhela verno le Devleske, te predživela trapišagos. O Ježiš merelas dukhatar, savi peske aver manuša aňi na džanen te predstavinel. Ačhiľa verno. Sikaďa, hoj le Satan na sas čačipen. O Del thovel baripen andro Ježiš! (Príslovia 27:11; Dikh e poznamka 15.)

13) Sar sas poťimen vaš amari zachrana?

¹³ Sar sas poťimen vaš o manuša? O Ježiš pes arakhľa peskere Dadeha a vzdiňa pes te dživel pale sar dokonalo manuš pre phuv. Andro berš 33, pal o židoviko kalendaris 14 Nisan, murdarde le Ježiš. (Hebrejom 10:10) Pregele 3 ďivesa. O Del les vzkrjesinďa. O Ježiš imar na sas o manuš, sas vzkrjesimen sar duchovno osoba, so šaj dživel andro ňebos. The avka les sas furt pravo te dživel sar dokonalo manuš pre phuv. Ale sar avľa pale andro ňebos, o Ježiš pes pro furt vzdiňa te dživel sar dokonalo manuš a o Del ada pravo pro dokonalo dživipen diňa savore le Adamoskere potomken. (Hebrejom 9:24) Avka sas poťimen a amen šaj avas oslobodzimen andal o binos (hrjechos) the meriben. (Pregen Rimanom 3:23, 24.)

14, 15) So mušinas te kerel, kaj te en odmukhle amare hrjechi?

¹⁴ So lačho amen hin le Devleskere nekbareder darostar imar akana? So amenge ada mekča anela?

¹⁵ Amare bini (hrjechi) hine odmukhle. Furt keras chibi andre ada, so phenas, abo so keras. (Kolosanom 1:13, 14) Sar amenge šaj el odmukhlo? Mušinas cale jileha te bajinel oda, hoj kerďam nalačho a pokorňe te mangel le Jehovas a ov ela ochotno amenge te odmukhel. (1. Jána 1:8, 9)

16) So mušinas te kerel, kaj amen te el čisto svedomje?

¹⁶ Čisto svedomje. Sar amenge o jilo phenel, hoj kerďam vareso nalačho, ta pes ciťinas vinovata, hin amenge phares, abo rovas. Ale našťi pes vzdas! Te mangaha, kaj amenge o Del te odmukhel, šaj paťas, hoj amen šunela a odmukhela amenge. (Hebrejom 9:13, 14) Kamel, kaj leske te phenas savoro, so amen hin andro jilo. (Hebrejom 4:14–16) Avka maškar o Del the amende ela smirom (pokojis).

17) So amen šaj el olestar, hoj o Ježiš muľa vaš amenge?

¹⁷ Šaj dživas pro furt. „Vaš o binos (hrjechos) hin o meriben, ale o Del diňa peskero lačhipnaskero daros, o večno dživipen andro Ježiš Kristus, amaro Raj.“ (Rimanom 6:23 NZ) O Ježiš muľa vaš amenge, kaj te dživas pro furt a kaj te avas furt saste. (Zjavenie 21:3, 4) So mušinas te kerel, kaj amen ada te el?

18) Sar džanas, hoj amen o Jehovas kamel?

¹⁸ Te tut del vareko šukar darčekos, radisaľos. Ada, hoj o Jehovas obetinďa le Ježiš vaš amenge, hin nekšukareder daros savorendar. Igen vaš ada paľikeras le Jehovaske. Ján 3:16 phenel: „O Del avka igen kamelas o svetos, hoj diňa peskere jekhe (jeďine) splodzimen Čhas.“ O Jehovas amen avka igen rado dikhel, hoj diňa amenge le Ježiš. Džanas, hoj o Ježiš amen tiš kamel, bo sas ochotno te merel vaš amenge. (Ján 15:13) Oda, so kerde o Jehovas the o Ježiš, sikavel, hoj amen igen kamen. (Galaťanom 2:20)

19, 20) (a) Sar šaj aves le Jehovaskero kamaratos? (b) Sar šaj sikaves, hoj tuke ceňines le Ježišoskeri obeť?

¹⁹ So phenes, bari laska hin le Devles, na? Sar šaj aves leskero kamaratos? Nane loko te kamel varekas, kas na prindžares. Ján 17:3 phenel, hoj šaj džanas furt buter pal o Jehovas. Sikhľuv pal leste buter a kameha les buter. Dživ avka, sar ov kamel a aveha leskero kamaratos. Furt študin e Biblija. (1. Jána 5:3)

²⁰ Ceňin tuke le Ježišoskeri obeť. E Biblija phenel: „Oda, ko sikavel, hoj les hin vjera andro Čhavo, oles ela večno dživipen.“ (Ján 3:36) Sar sikaves, hoj tut hin vjera? Te keres oda, so amen sikaďa o Ježiš. (Ján 13:15) Na stačinel ča te phenel, hoj paťas le Ježiš. Te kamas te el zachraňimen, kampel te kerel skutki. Andro Jakub 2:26 genas: „E vjera bijo skutki hiňi muľi“.

21, 22) (a) Soske te avel sako berš pre slavnosť „Spomjenka le Ježišoskere meribnaske“? (b) So pes dodžanaha andre kapitola 6 the 7?

 ²¹ Aven pro leperiben (spomjenka) le Ježišoskere meribnaske. Raťi angle ada, sar o Ježiš muľa, phenďa, kaj peske te leperas pre leskero meriben. Amen ada keras sako berš a vičinas ada „Leperiben le Ježišoskere meribnaske“. (Matúš 26:26–28) O Ježiš kamel, kaj peske te leperas pre oda, hoj diňa dokonalo manušengero dživipen, kaj amen te zachraňinel. Phenďa: „Furt ada keren pre miro leperiben.“ (Pregen Lukáš 22:19.) Te aveha pre slavnosť „Leperiben le Ježišoskere meribnaske“, sikaveha, hoj pametines, so kerďa o Jehovas the o Ježiš a sar tut igen rado dikhen. (Dikh e poznamka 16.)

²² O Del Jehovas obetinďa vaš amenge le Ježiš, ada hin nekbareder daros, so lestar chudňam. (2. Korinťanom 9:14, 15) Ada anela lačho the milijoni manušenge, so mule. Kapitoli 6 the 7 amenge phenena pal ada buter.