1, 2) Kaj šaj arakhas ochrana adaďives?

PREDSTAVIN tuke, hoj sal avri a avel burka. O ňebos pes zacirdel. Dikhes perumi (bleski). Šunes, sar hrminel. Del baro brišind. Rodes, kaj tut šaj garuves. Sar mište tuke hin pro jilo, sar imar arakhes ajso than!

² Amen tiš rodas, kaj pes šaj garuvas. Andre kada svetos hin furt goreder (horšeder). Možno phučes: „Kaj šaj arakhav ochrana?“ O žalmistas pisinďa: „Phenava le Jehovaske: ‚Ke tute man visarava a paš tute man garuvava, sal miro Del, andre kaste kamav te paťal.‘“ (Žalm 91:2) O Jehovas amenge šaj lel tele pal o jilo o pharipen, so amen hin a andre Biblija amenge sikavel, savo šukar dživipen amen užarel.

3) Sar amenge šaj o Jehovas pomožinel?

³ Sar šaj arakhas ochrana paš o Jehovas? Šaj amen del goďi, so te kerel le problemenca, so amen hin. Ňiko, ko amenge kamel te ubližinel, nane zoraleder sar o Jehovas. O Del amen šaj chraňinel. Te pes amenge akana ačhela vareso nalačho, šaj paťas, hoj o Jehovas prikerela ala škodi. E Biblija phenel: „Ačhen ajse, kaj tumen o Del furt rado te dikhel.“ (Júda 21) Mušinas te avel pašes ko Jehovas, sar predživas varesavo pharipen. Ale sar ada šaj keras?

4, 5) Sar o Jehovas sikaďa peskeri laska sakoneske amendar?

⁴ Kaj te avas lačhe kamarata le Jehovaha,  kampel te achaľol oleske, sar rado amen o Del dikhel. Mišľin pre savoro, so kerel o Jehovas. Diňa amen šukar phuv, šukar kvitki the zvjerata. Tiš amen diňa lačho chaben the čisto paňi. Andre Biblija diňa o Jehovas te pisinel peskero menos the oda, savi hiňi leskeri povaha. Nekbuter amenge presikaďa peskeri laska, sar bičhaďa le Ježiš pre phuv, kaj vaš amenge te merel. (Ján 3:16) Vašoda, hoj o Del diňa peskere Čhas, užarel pre amende igen šukar dživipen.

⁵ O Jehovas diňa mesijašsko kraľišagos – ňebesko vlada, savi so neksigeder odčhivela savoro trapišagos. O kraľišagos kerela pre phuv rajos, kaj savore manuša dživena andro smirom (pokojis) a bachtales pro furt. (Žalm 37:29) O Jehovas sikaďa peskeri laska amenge the avka, hoj amen del radi, sar te dživel so nekfeder imar akana. Kamel, kaj pes te modľinas a hino pripravimen te šunel avri amare modlitbi. O Jehovas sikaďa peskeri bari laska sakoneske amendar.

6) O Jehovas sikaďa, hoj tut kamel, ale so deha tu les?

⁶ O Jehovas sikaďa, hoj tut kamel. So deha tu les? Furt leske paľiker vaš savoro, so kerel. But manuša adaďives na paľikeren vaš ňisoske. Ajse manuša dživenas the andre Ježišoskeri doba. O Ježiš sasťarďa 10 igen nasvale muršen, ale ča jekh leske vaš ada paľikerďa. (Lukáš 17:12–17) Kamas te el ajse sar o murš, so paľikerďa le Ježišoske. Kamas furt te paľikerel le Jehovaske.

7) Sar mušinas te kamel le Jehovas?

⁷ Amen tiš mušinas te sikavel, hoj kamas le Jehovas.  O Ježiš phenďa peskere učeňikenge, kaj te kamen le Jehovas cale jileha, caľa dušaha the caľa goďaha. (Pregen Matúš 22:37.) So ada znameňinel?

8, 9) Sar šaj sikavas le Jehovaske, hoj les kamas?

⁸ Stačinel ča te phenel: „Kamav le Jehovas“? Na. Te kamas le Jehovas cale jileha, caľa dušaha the caľa goďaha, sikavas ada peskere dživipnaha. (Matúš 7:16–20) E Biblija phenel: Ko kamel le Devles, doľikerel leskere zakoni. Hin ada phares? Na, bo „so o Jehovas prikazinel, na kerel amenge pharipen“. (Pregenen 1. Jána 5:3.)

⁹ Te šunaha le Jehovas, avaha bachtale a ela amen šukar dživipen. (Izaiáš 48:17, 18) Ale, so amenge pomožinela te el furt le Devleha? Akana pes pal ada dodžanaha buter.

10) Soske mušines furt te sikhľol pal o Jehovas?

¹⁰ Sar ačhiľal le Jehovaskero kamaratos? Študinehas e Biblija a buter a buter sprindžarehas le Jehovas. Avka bariľa tiro kamaratstvo le Jehovaha. Ada hin sar e jag, so kames, kaj furt te labol. Andre jag furt kampel te čhivkerel kašta, kaj te labol. Podobňe kampel furt te sikhľol pal o Del, kaj te aves feder kamaratos leha. (Príslovia 2:1–5)

11) So tuha kerela, te furt študineha e Biblija?

¹¹ Te na preačheha te študinel e Biblija, furt andre late arakheha vareso, sostar radisaľoha. Všimňin tuke, so phende 2 učeňika, sar lenge o Ježiš višvetľinelas biblicka proroctva: „Či na labonas amare jile, sar amenge dromeha vakerelas a calkom phundravelas o Pisma?“ (Lukáš 24:32)

12, 13) (a) So pes šaj ačhel amara laskaha ko Del? (b) So mušinas te kerel, kaj amari laska ko Del te el furt zoraľi?

 ¹² Avka sar o učeňika radisaľile, hoj achaľile vareso andal le Devleskero lav, avka the tuke hin, sar tut sikaves a achaľos oleske, so hin pisimen andre Biblija. Feder sprindžares le Jehovas a buter les kames. Ňigda ma našav tiri laska ko Jehovas! (Matúš 24:12)

¹³ Te ačhiľal kamaratos le Devleha, chraňin tuke ada kamaratstvo. Mušines furt te sikhľol pal o Jehovas the pal o Ježiš. Premišľin, sar te dživel pal ada, so tut sikaves. (Ján 17:3) Sar genes, abo študines le Devleskero lav, furt phuč tutar: „So man ada sikavel pal o Del Jehovas? Soske mušinav te kamel le Devles andal calo jilo the andal caľi duša?“ (1. Timotejovi 4:15)

14) Sar e modlitba pomožinela, kaj e laska ko Jehovas te barol?

 ¹⁴ Lačhe kamaratoha des duma praviďelňe. Te ada keres, aveha furt leskero kamaratos. The amen, te vakeras le Jehovaha praviďelňe andre modlitba, amari laska ke leste hiňi furt zoraľi. (Pregen 1. Tesaloničanom 5:17.) E modlitba hiňi vzacno daros amare ňebeske Dadestar. Mušinas leha furt te vakerel andal calo jilo. (Žalm 62:8) Našťi das furt odi isto duma andre modlitba, so sikhľiľam sar basňička. Mušinas te premišľinel pal o lava, so phenas le Jehovaske. Te dureder študinaha e Biblija a modľinaha pes andal calo jilo, amari laska ko Jehovas ela furt zoraleder.

15, 16) Sar dikhes pre ada, hoj šaj vakeres avrenca pal o Del?

¹⁵ Te kamas te ačhel le Jehovaskere kamarata, kampel te del duma avrenca pal oda, andre soste paťas. Ada amenge kerel radišagos! (Lukáš 1:74) Adi uloha diňa o Ježiš le prave kresťanen. Mušinas ada te kerel mište! Dojekh amendar mušinel te zvestinel pal le Devleskero kraľišagos. Imar pal ada varekaske phenďal? (Matúš 24:14; 28:19, 20)

¹⁶ Jekh apoštol phenďa, hoj zvestovaťelsko služba hiňi vzacno „barvaľipen“. (2. Korinťanom 4:7) Vaker pal o Del the pal oda, so kamel te kerel! Nekdvoležiteder buťi, so šaj keres, hin oda, hoj služines le Jehovaske. Ov peske ada igen ceňinel. (Hebrejom 6:10) Te deha duma pal o čačipen, ta ada pomožinela tuke, ale tiš olenge, so tut šunen. Tu the ola, so tut šunen, šaj ačhen lačhe kamarata le Jehovaha a šaj chuden večno dživipen. (Pregen 1. Korinťanom 15:58.)  Ňisava aver buťatar tut našťi el ajso radišagos!

17) Soske adaďives kampel, kaj te vakeras pal o čačipen?

¹⁷ Adaďives kampel, kaj te vakeras pal o čačipen avrenge. Te zvestinel mušinas andre lačhi the nalačhi doba. (2. Timotejovi 4:2) Le manušenge kampel te šunel pal le Devleskero kraľišagos. E Biblija phenel: „Le Jehovaskero baro ďives hin pašes! Hin pašes a avela igen sig! O koňec určiťe avela!“ (Sofoniáš 1:14; Habakuk 2:3) So neksigeder o Jehovas zňičinela le Satanoskero nalačho svetos. Mušinas te phenel le manušenge, so len užarel, kaj pes korkore te rozhodňinen, či kamen te služinel le Jehovaske, abo na.

18) Soske mušinas te služinel le Jehovaske jekhetane le prave kresťanenca?

¹⁸ O Del kamel, kaj te služinas jekhetane le prave kresťanenca. E Biblija phenel: „Mušinas te del pozoris jekh pre aver, kaj te pomožinas te presikavel e laska a te kerel lačhe veci; na avka, hoj preačhena te phirel pre amare zhromažďeňa.“ (Hebrejom 10:24, 25) Snažin tut, kaj te aves pre savore zhromažďeňa. Odoj šaj das zor peskere lavenca jekh avres.

19) So amenge pomožinel te kamel kresťanske phralen pheňen?

¹⁹ Te phireha pro zhromažďeňa, arakheha tuke odoj lačhe kamaraten, so tuke pomožinena te služinel le Jehovaske. Arakheha odoj but phralen pheňen, so avka sar the tu kamen te služinel le Jehovaske so nekfeder. The on hine ňedokonala a keren chibi. Te kerena vareso nalačho, av pripravimen lenge te odmukhel. (Pregen Kolosanom 3:13.) Ma dikh ča pro chibi, so keren tire kresťanska phrala pheňa,  ale rode pre lende oda, so hin lačho. Ada tuke pomožinela buter len te kamel a te el pašeder ko Jehovas.

20, 21) So hin „skutočno dživipen“?

²⁰ O Jehovas kamel, kaj savore leskere kamaraten te el so nekfeder dživipen. E Biblija sikavel, hoj amaro dživipen ela calkom aver sar adaďives.

²¹ Na dživaha ča 70, abo 80 berša. „Dživaha večňe“, avaha saste (zdrava), andro smirom (pokojis), dživaha andro šukar rajos. Ada ela „skutočno dživipen“, pal savo pisinel e Biblija. O Jehovas sľubinel, hoj amen dela ajso dživipen, ale mušinas pes te snažinel, kaj ada dživipen te „chudas“. (1. Timotejovi 6:12, 19)

22) Sar šaj „chudas skutočno dživipen“? (b) Soske peske ňiko našťi zaslužinel večno dživipen?

²² Sar šaj „chudas ada skutočno dživipen“? Kampel, kaj te keras „lačhipen“ a te dživas „lačhe skutkenca“ (1. Timotejovi 6:18 NZ) Ada hin, hoj dživas pal ada, so sikhľuvas andal e Biblija. Čačipen hin, hoj ňiko le manušendar peske našťi korkoro kerel ajso dživipen, so amen kamel te del o Jehovas. Amara zoraha našťi chudas večno dživipen. Oda hin baro daros le Jehovastar. Dela les peskere verne služobňiken. O Del hino igen lačho a del le manušen oda, so peske ňiko našťi zaslužinel! (Rimanom 5:15) O ňebesko Dad kamel te del ada daros verne služobňiken.

23) Soske tut mušines te rozhodňinel mište imar akana, so kereha?

²³ Phuč: „Služinav le Devleske avka, sar ov kamel?“ Te tuke kampel vareso andro dživipen te zmeňinel, ker ada so neksigeder. Mukh pro Jehovas, šun les andre savoreste a ov ačhela oda, ke kaste tut šaj garuveha. O Jehovas amen chraňinela andro posledna ďivesa andre ada Satanoskero nalačho svetos. Mušinas  te ačhel verna. Sar ada nalačho svetos o Jehovas odstraňinela, dela amen dživipen andro rajos pro furt avka, sar sľubinďa. Ta so kereha? Te tut rozhodňineha mište imar akana, užarel pre tute skutočno dživipen!