Amaro stvoriťeľis hino godžaveder sar amen. Starinel pes pal amende sar lačhejileskro dad. Bije leste amen našťi avel bachtalo dživipen. (Jeremiáš 10:23) Avka, sar le čhavenge kampel la da the le dades the amenge kampel le Devles. Andre Biblija hine zasadi, save amenge andro amaro dživipen pomožinen. Ada hin igen baro daros le Devlestar. Pregenen 2. Timotejovi 3:16.

Jehovaskre zakoni the zasadi amenge sikaven, sar imar akana te dživel mište a paľis te chudel dživipen pro furt. O Jehovas peske zaslužinel, hoj les te šunas. Pregenen Žalmy 19:7, 11; Zjavenie 4:11.

Biblicka zasadi vakeren čačipen pal ada, so le Devleske pre dzeka a ada čačipen pes šoha na zmeňinla. Biblicka zakoni phenen presnones, so mušinas te kerel a beršenca pes šaj zmeňinen. (5. Mojžišova 22:8) Biblicka zasadi mušinas te achaľol, hoj te džanas, sar pal ada te dživel. (Príslovia 2:10–12) E Biblija napriklad sikavel, hoj o dživipen hino daros le Devlestar. Ada čačipen čiže zasada amenge šaj pomožinel khere, andre buči vaj te džas varekhaj motoriha, hoj te chraňinas peskro dživipen the dživipena avrengre. Pregenen Skutky 17:28.

Pal o duj nekbareder zasadi vakerlas o Ježiš. Peršo sikavel, so hin andro amaro dživipen  nekbareder — te prindžarel le Devles, te kamel les andal calo jilo the avka leske te služinel. Pre kadi zasada gondoľinen furt, te vareso kamen te kerel. (Príslovia 3:6) Ko kadi zasada peske lel kijo jilo, šaj avel Devleskro prijaťeľis. Akana šaj el bachtalo the šaj dochudel dživipen pro furt. Pregenen Matúš 22:36–38.

Dujto nekbareder zasada amenge pomožinel te avel lačhe avre manušenca. (1. Korinťanom 13:4–7) Ko doľikerel adi zasada, napodobňinel le Devles, sar ov kerel le manušenca. Pregenen Matúš 7:12; 22:39, 40.

Biblicka zasadi pomožinen la dake le dadeske the lengre čhavenge, hoj pes jekhetane rado te dikhen. (Kolosanom 3:12–14) E Biblija len sikavel, hoj o rom la romňaha mušinen te dživel jekhetane, ča avka len šaj el bachtaľi fameľija. Pregenen 1. Mojžišova 2:24.

Biblicka zasadi den amen godži, sar mište pes te starinel pal peste the pal amari fameľija. Pomožinen, hoj amenge te el mište pro jilo. O raja, so den buči, rado dikhen ajse manušen, so dživen pal o biblicka zasadi, bo na čoren the keren buči nekfeder, sar džanen. (Príslovia 10:4, 26; Hebrejom 13:18) E Biblija amen thiš sikavel, sar amenge šaj avel mište the te na sam barvale. Te dživel prekal o Del hin feder, sar te dživel prekal o love. Pregenen Matúš 6:24, 25, 33; 1. Timotejovi 6:8–10.

Šaj avas sasteder čiže zdrava. (Príslovia 14:30; 22:24, 25) Napriklad, te doľikeras Devleskro zakonos, so zakazinel te mačol, chraňinel ajse nasvaľibnastar vaj ajse nalačhipnastar, so ľidžan kijo meriben. (Príslovia 23:20) O Jehovas na zakazinel te pijel alkohol, ale mušinas godžaverones te džanel keci. (Žalmy 104:15; 1. Korinťanom 6:10) Mušinas thiš te del pozoris pre soste mišľinas. (Žalmy 119:97–100) Čačikane kresťana dživen pal o biblicka zasadi na ča angle ada, hoj len hin alestar chasna, ale the angle ada, hoj aleha den le Jehovaske chvala. Pregenen Matúš 5:14–16.