LEKCIJA 1
Biblija – hiňi the predal tute?
But manuša na džanen, soske cerpinen, soske meren a so lenca ela. Keren peske šero sar sako ďives te predživel, či len ela andro kher dos love. E Biblija na ča sikavel sar ada hin, aľe tiš del goďi sar te dživel imar akanastar feder. So phenes, hiňi Biblija the predal tute?
1) Pre soste amenge e Biblija odphenel?
Andal e Biblija tut dodžanes: Khatar pes iľa o dživipen pre phuv? Soske dživas? Soske lačhe manuša cerpinen? So amenca hin, sar meras? Soske nane o smirom pro svetos? So pes ačhela la phuvaha? But manuša pes andal e Biblija imar dodžanle, sar ada hin. Te geneha e Biblija, arakheha o čačipen pre oda, so phučes.
2) Sar amenge e Biblija šaj pomožinel sako ďives?
E Biblija amen del lačhi goďi andro dživipen. Sikavel amenge, sar šaj avas andre fameľija čačes bachtale. Phenel, so kampel te kerel, te hin amenge phares. A tiš, sar šaj radisaľuvas la buťatar, savi keras. Prekal adi kňižka šaj jekhetane rodas, so pal ada phenel e Biblija. Paľis the tu šaj phenes, hoj „savoro, so hin pisimen andro Devleskero lav ... hino pre chasna.“ (2. Timotejovi 3:16)
Adi kňižka, andal savi sikhľos, nane Biblija. Pomožinela tuke sar te arakhel andre Biblija sa, so kames te džanel. Av ajso lačho, pregen tuke savore biblicka teksti andre dojekh lekcija. Paľis rozmišľin, sar ala lava andal e Biblija bešen oleha, so sikhľos.
DODŽAN TUT BUTER
Sar e Biblija imar pomožinďa aver manušenge? So šaj keres, kaj tut o jilo te cirdel te genel e Biblija? Soske hin mište, kaj tuke vareko te pomožinel te achaľol la Biblijake?
3) E Biblija sikavel o drom
E Biblija hiňi sar zoralo švetlos. Sikavel amenge o drom, sar kampel te dživel. Tiš amenge sikavel, so lačho amen užarel.
Pregen Žalm 119:105 a vakeren jekhetane:
-
So peske pal e Biblija mišľinelas oda murš, so pisinďa ala lava?
-
Tu sar dikhes pre Biblija?
4) E Biblija tuke šaj odphenel pre oda, so phučes
Jekha džuvľijake e Biblija odphenďa pre oda, so la but berša trapinelas. Mukh o VIDEJO a paľis vakeren jekhetane.
-
So trapinelas la džuvľa andro videjo?
-
Sar lake pomožinďa, hoj sikhľolas la Biblijatar?
E Biblija amenge phenel, kaj te na daras te phučel. Pregen Matúš 7:7 a vakeren jekhetane:
-
So kames tu te phučel? E Biblija tuke šaj pre kada odphenel.
5) So šaj keres, kaj rado te genes e Biblija
But manuša rado genen e Biblija a hin len olestar bari chasna. Mukh o VIDEJO a paľis vakeren jekhetane.
-
So o terne phenenas, sar majinde te genel e Biblija?
-
Soske akana rado genen e Biblija?
Lava andal e Biblija amenge den goďi, hin amenge feder pro jilo a džanas, so šukar amen užarel. Pregen Rimanom 15:4 a paľis vakeren jekhetane:
-
Kames te džanel, so šukar amen užarel?
6) Aver tuke rade pomožinena feder te achaľol la Biblijake
Hin igen šukares, hoj imar genes e Biblija. A mek bareder chasna tut ela akor, te tuke vareko pomožinela lake te achaľol. Pregen Skutky 8:26–31 a paľis vakeren jekhetane:
-
Sar šaj achaľuvas la Biblijake – dikh o teksti 30, 31.
Le Etijopčanoske pomožinde, kaj te achaľol oleske, so genelas. The adaďives but manuša feder achaľile la Biblijake, bo lenge vareko oleha pomožinďa.
VAREKO ŠAJ PHENEL: „So man ela olestar, hoj sikhľuvava andal e Biblija.“
-
So phenďalas pre ada? Soske?
SO SIKHĽIĽAM
E Biblija amen del goďi andre amaro dživipen, odphenel amenge pre oda, so amen trapinel a sikavel amenge, so šukar amen užarel.
So bi phenehas
-
Andre soste tuke e Biblija pomožinel?
-
Pre soste amenge e Biblija odphenel?
-
So tu kames te džanel andal e Biblija?
DIKH TUKE BUTER
E Biblija amenge the adaďives pomožinel andro dživipen.
Dikh sar e Biblija pomožinďa jekhe muršeske, so pes cikňavarbatar marelas oleha, so predživelas.
Pregen tuke goďaver lava, so šaj pomožinen tira fameľijake.
Dodžan tut andal e Biblija, ko čačes ľidžal ada svetos.
Dikh the pre ada
SO O MANUŠA KAMEN TE DŽANEL
So oda hin te sikhľol la Biblijatar?
Te kavka sikhľona la Biblijatar le Jehovaskere svedkenca, šaj genen andal e Biblija, savi tumen kamen. Šaj vičinen la fajta, le kamaraten abo kas kamen.
