Rado phires olenca, so hine lačhe a na klaminen? The o Jehovas užarel olendar, so hine leha lačhe, hoj na klaminena. Aľe oda nane loko, bo but manuša khatar amende hine avrimarde. So lačho amen ela olestar, hoj sam andre savoreste paťivale?

1) Kaske keraha nekbareder baripen, te sam paťivale andre savoreste?

Te avrenge phenas čačipen a sam ke lende paťivale, presikavas le Jehovaske paťiv the kamiben. Le tuke. O Jehovas džanel savoro, so amenge mišľinas a so keras. (Hebrejom 4:13) Kana amenge kidas avri, hoj avaha andre savoreste paťivale, keras leske baripen. Andre Biblija hin: „Bo le Jehovaske džungľol o napaťivalo manuš, aľe rado dikhel olen, so keren paťivales.“ (Príslovia 3:32)

2) Sar sikavas andro dživipen, hoj keras paťivales?

O Jehovas kamel, kaj te vakeras čačipen. (Zachariáš 8:16, 17) So oda hin? Na klaminas aňi na vakeras ča jepaš olestar, so hin čačo andre amari fajta, andre buťi, le phralenge the le pheňenge andro zboros, abo sar phiras pal o uradi. Paťivalo manuš na čorel a aňi ňikas ňisoha na občorel! (Pregen Príslovia 24:28 the Efezanom 4:28) Tiš poťinel vaš savoro, so lestar užarel o štatos. (Rimanom 13:5–7) Andre kada the andre „chočsoste, so keraha, kamas te el paťivale.“ (Hebrejom 13:18)

3) So lačho amen hin olestar, te sam andre savoreste paťivale?

Hin amen lačho menos a aver amenge paťan. O zboros ela sar lačhi fameľija, kaj pes ňiko na darala, hoj les vareko občorela abo hoj leha thovela avri. Smiroha sovas, bo amen o jilo na danderel. Sar sam andre savoreste paťivale, šaj oda pricirdel aver manušen kijo Del, bo oleha „[šukaľaras] o sikaviben pal o Del, amaro Zachrancas.“ (Títovi 2:10)

 DODŽAN TUT BUTER

5) Furt ker paťivales!

 6) Te sam paťivale, aver amenge paťan

Oda, hoj na kamas te klaminel, šaj amenge kerel pharipen. Aľe ma dara, dikheha, hoj oda hin furt nekfeder, te na klamines. Pregen Žalm 34:12–16 a paľis vakeren jekhetane:

• Soske ela tiro dživipen feder, te ňigda na klamineha, aľe furt pheneha a kereha oda, so hin čačo?

1. Te o rom the e romňi keren sa paťivales, lengero manželstvo ela zoralo

2. Te o robotňikos kerel sa paťivales, leskero veducis leske paťal

3. Te o dženo paťivales doľikerel o zakoni, na mušinel te daral le uradňikendar the le žandarendar

 SO SIKHĽIĽAM

O Jehovas užarel olendar, so hine leha lačhe, hoj ena paťivale andre savoreste, so phenen a so keren.

So bi phenehas

• Sar šaj sikavas, hoj čačes sam andre savoreste paťivale?

• Soske peske našťi mišľinas, hoj anglo Jehovas pes del vareso te garuvel?

• Soske kames tu te el andre savoreste paťivalo?