Na savore manuša dikhen pro alkohoľis avka isto. Vareko peske varekana del kapkica le kamaratenca. Vareko peske phenďa, hoj na pijela aňi kapkica. A varesave pijen, kaj te maťon. So phenel e Biblija pal o alkohoľis?

1) Čačes našťi pijas o alkohoľis?

E Biblija na phenel, hoj našťi pijas o alkohoľis. Hin odoj, hoj „e mol kerel o radišagos andro jilo“. (Žalm 104:14, 15 NZ) Olestar dičhol, hoj o Del amen diňa tiš o alkohoľis, kaj te radisaľuvas. Varesave verna murša the džuvľija, pal save pes pisinel andre Biblija, pijenas o alkohoľis. (1. Timotejovi 5:23)

2) Savi goďi amen del e Biblija, te pijas o alkohoľis?

Le Jehovaske džungľol, te vareko maťol abo te pijel but, choč pre leste na dičhol, hoj hino mato. (Galaťanom 5:21) Devleskero lav phenel: „Ma ľiker tut le pijakenca, so pijen but mol.“ (Príslovia 23:20 NZ) Te peske phenaha, hoj pijaha, či korkore abo varekaha, našťi pijas ajci, hoj na džanaha, so keras, so vakeras. Našťi amenge oda zdiliňarel e goďi a te mosarel o sasťipen. A te na džanas, kana hin amen dos, hin feder aňi te na chudel te pijel.

3) Sar dikhas pre aver, te džal pal o alkohoľis?

Sako peske musaj korkoro te phenel, či pijela abo na. Na kamas te dikhel banges pre ola, so peske phende, hoj kapkica pijena. Tiš na kamas varekas te ispidel, kaj te pijel, te ov na kamel te pijel. (Rimanom 14:10) Vareko peske phenďa: „Te varekaske na ela mište olestar, hoj me pijava, ta feder ela, te mange na dava aňi jekh.“ (Pregen Rimanom 14:21) Na kamas te „dikhel [ča] pre peskero, ale sako pre oda, so hin avreskero.“ (Pregen 1. Korinťanom 10:23, 24 NZ)

 DODŽAN TUT BUTER

4) Phen tuke či pijeha

Sar o Ježiš dikhelas pro alkohoľis? Feder oleske achaľuvaha, te peske pregenaha pal o peršo zazrakos, so kerďa. Pregen Ján 2:1–11 a paľis vakeren jekhetane:

• So amenge kada zazrakos sikavel pal oda, sar o Ježiš dikhelas pro alkohoľis the pre ola manuša, so les pijenas?

• O Ježiš na dikhelas namištes pro alkohoľis. Sar kampel, kaj o kresťana te dikhen pre ola, so peske phende, hoj kapka pijena?

Hin čačipen, hoj o kresťana šaj pijen, aľe musaj te den pozoris, kana pijen. Pregen Príslovia 22:3 a rozmišľin či hin mištes te pijel:

• te džas le motoriha abo keres buťi paš varesavo strojos.

• te sal khabňi (phari).

• te tuke o dochtoris phenďa, kaj te na pijes.

• te na džanes, kana tuke dos.

• te tuke oda o zakonos na domukhel.

• te sal varekaha, ko našťi pijel, kaj pale te na chudel te pijel.

Te keres bijav abo varekas vičines ke peste khere, šaj lenge čhives o alkohoľis? Kaj te džanes, so te kerel, mukh o VIDEJO.

Pregen Rimanom 13:13 the 1. Korinťanom 10:31, 32. Pal dojekh veršos vakeren jekhetane:

• Sar tuke kala lava pomožinen te kerel avka, kaj o Jehovas olestar te radisaľol?

 5) Phen tuke keci pijeha

Te pijeha, ma bister pre kada: O Jehovas na phenel, hoj našťi pijas, aľe džungľol leske te vareko pijel but. Soske? Pregen Ozeáš 4:11, 18 a paľis vakeren jekhetane:

• So pes šaj ačhel, te o manuš pijel igen but?

So amenge pomožinela, kaj te na pijas but? Te peske imar phenďam, keci pijaha, ľikeraha amen olestar a na keraha pestar, hoj birinaha the buter. Pregen Príslovia 11:2 a paľis vakeren jekhetane:

• Soske hin lačho, te tuke anglal pheneha, keci tuke des?

6) Del pes te preačhel te maťuvkerel

 SO SIKHĽIĽAM

O alkohoľis hino daros le Jehovastar pre amari chasna. Le Jehovaske džungľol, te pijas but abo te maťuvkeras.

So bi phenehas

• So phenel e Biblija pal o alkohoľis?

• So amenca uľahas, te but piľamas?

• Sar dikhas pre kola, so kamen kapka te pijel a pre kola, so na kamen aňi kapka?