Savore pes rado šukares uras. Sar dikhel o Jehovas pre oda, so pre peste uras a sar pes uchanas? Save lava andal e Biblija amenge pomožinen, kaj the amare uravibnaha furt te ašaras le Jehovas?

1) Save lava andal e Biblija amen ľidžan, te pes uras abo uchanas?

E Biblija phenel, hoj pes kampel „te urel šukares, nabarikanes a tiš goďaverones“. Te furt dičhuvas avri žužes, sikavas, hoj „kamas le Devles“. (1. Timotejovi 2:9, 10) Akana rozkidaha, so oda hin: (1) Te urel pes šukares. Le Jehovaskero ľudos hin pal calo svetos. Vaš oda lengero uraviben hin všadzik aver. Dojekh lendar rado dikhel aver farbi, aver pes uchanel. Aľe ňigda na bisteren, hoj oleha sar dičhon avri, sikaven, hoj lengero Del hino o Jehovas. (2) Te urel pes nabarikanes. Oda hin, hoj pes na presikavas upre. A tiš na uras pre peste vipasimen, charne abo hoj amenge sa dičhol avri. (3) Ko pes urel a uchanel goďaverones? Koda, ko na dikhel ča pre oda, so pes nekbuter urel andro svetos abo pre soste o svetos phenel, hoj hin šukar. (4) Aleha, so pre peste uras a sar pes uchanas, kamas te sikavel, hoj rado dikhas le Devles. A tiš avrenge šaj sikavas, hoj služinas čačikane Devleske. (1. Korinťanom 10:31)

2) So šaj kerel amaro uraviben le phralenca the le pheňenca?

Sako amendar peske šaj urel, so kamel. Aľe so oda kerela le phralenca the le pheňenca, te dikhena sar sam urde? Na kamas, kaj peske te phenen: „Dikh, oda pes na ladžal avka pes te urel?“ Sar phenel e Biblija, kamas, kaj pes aver te ciťinen mište a kaj len te zoraľaras. (Pregen Rimanom 15:1, 2)

3) Sar šaj pricirdel amaro uraviben le manušen kijo Jehovas?

Či džas te bavinel o fotbaľis, abo džas pro foros, furt peske kamas mište te kidel avri, so uraha. Aľe nekbareder hin oda, sar sam urde pro zhromažďeňe the andre služba. Te sam andre služba šukares urde, o manuša sigeder kamena te šunel oda, so lenge kamas te phenel pal o Jehovas. Kamas te šukaľarel o sikhľariben pal o Del. (Títovi 2:10)

 DODŽAN TUT BUTER

4) Peskere uravibnaha sikavas, savo hino amaro Del

Soske kamas te dičhol avri so nekfeder? Pregen Žalm 47:2 a paľis vakeren jekhetane:

• Sar kamas te dičhol avri, kaj o manuša te vakeren pal o Jehovas šukares?

• So mišľines, čačes kampel fest te rozmišľinel, so pre peste uraha a sar pes uchanaha pro zhromažďeňe abo andre služba? Soske?

 5) Šukares tut uri the uchan

Mukh o VIDEJO.

Na džal pal oda, keci love das vaš o uraviben. Aľe mi avas žuže a urde avka sar kampel odoj, kaj džas. Pregen 1. Korinťanom 10:24 the 1. Timotejovi 2:9, 10. Paľis vakeren jekhetane, soske na kamas pre peste te urel, so hin...

• melalo, rozčhingerdo abo ajso, hoj paľis savore pre amende čhiven o jakha.

• fest vipasimen abo so sikavel sa avri.

Le Mojžišoskero zakonos na sas pisimen le kresťanenge. Aľe but lestar sikhľuvas pal o Jehovas. Pregen 5. Mojžišova 22:5 a paľis vakeren jekhetane:

• Soske pes o džuvľija našťi uren the uchanen sar murša a o murša sar džuvľija?

Pregen 1. Korinťanom 10:32, 33 the 1. Jána 2:15, 16 a paľis vakeren jekhetane:

• O manuša odoj, kaj bešas the andro zboros dikhen sar dičhuvas avri. Soske vaš oda nane jekh, sar sam urde the uchande?

• So o manuša pre peste uren a sar pes uchanen odoj, kaj džives?

• A so phenes, oda sar pes on uren, amen pes tiš avka šaj uras? Soske?

 SO SIKHĽIĽAM

Na keraha ladž le Jehovaske aňi avrenge, te pes uras the uchanas avka sar kampel.

So bi phenehas

• Soske le Jehovaske nane jekh, sar dičhuvas avri?

• Save lava andal e Biblija amen ľidžan, te pes uras the uchanas?

• Sar kamas te dičhol avri, kaj o manuša te vakeren pal o Jehovas šukares?