Peršo manželstvo sphandľa o Del, o Jehovas a. E Biblija phenel, hoj o Del stvorinďa perša romňa a anďa la paš o rom. O Adam radisaľolas a phenďa: Ada hin koňečňe kokalos mire kokalendar a ťelos mire ťelostar. (1. Mojžišova 2:22, 23) O Jehovas furt kamel, kaj andro manželstvo te avas bachtale.

Te džal vareko andro manželstvo, mišľinel peske, hoj savoro ela nekfeder. Ale čačipen hin, hoj the te pes o rom la romňaha igen kamen, lengero manželstvo na ela bijo problemi. (1. Korinťanom 7:28) Andre kadi brožura hin biblicka zasadi. Te pal lende dživena, tumaro manželstvo šaj el šukar. (Žalm 19:8-11)

SO PHENEL E BIBLIJA: O rom hin o šero la [romňake the le čhavenge]. (Efežanenge 5:23 NZ)

Prekal o rom: O Jehovas kamel, kaj te aves ke romňi ňežno. (1. Petra 3:7) O Del stvorinďa la romňa, kaj tuke te pomožinel. O Del kamel, kaj lake te presikaves e paťiv the e laska. (1. Mojžišova 2:18) Mušines te kamel la romňa avka, kaj oda, so kampel lake, te el prekal tute dvoležiteder sar oda, so kampel tuke. (Efezanom 5:25-29)

Prekal e romňi: O Jehovas kamel, hoj te presikaves paťiv peskere romeske a te pomožines leske, kaj te el lačho rom. (1. Korinťanom 11:3; Efezanom 5:33) Te o rom phenel, hoj pes mušinel vareso te kerel, podporin les andre ada! Rado leha ker savoro! (Kolosanom 3:18) Avka aveha šukar andre leskere the le Jehovaskere jakha. (1. Petra 3:1-6)

SO ŠAJ KERES:

• Phuč, sar šaj aves feder romňi abo rom! Šun mište a ker savoro, so hin andre tiri zor, kaj te aves feder

• Av trpezlivo! Kampel pre ada časos, kaj e romňi the o rom te sikhľon te dživel jekhetane a kaj len te el šukar manželstvo

SO PHENEL E BIBLIJA: Mišľin pre ada, so tira romňake, le romeske kampel. (Filipanom 2:3, 4) Sar Jehovaskero služobňikos mušines te el ke sakoneste jemno, thiš ajso mušines te el ke romňi, ko rom. (2. Timotejovi 2:24) E Biblija phenel: O lava bijo jilo hine sar dukhade rani, so kerel e šabľa, ale goďaver čhib sasťarel (uzdravinel). Vašoda mište kide avri tire lava. (Príslovia 12:18) Le Jehovaskero duchos tuke pomožinela te kidel avri jileskere the šukar lava. (Galaťanom 5:22, 23; Kolosanom 4:6)

SO ŠAJ KERES:

• Te kames te phenel vareso, so džanes, hoj la abo les ada choľarela, modľin tut, kaj ada te phenes pokojňe a ma av zacato

• Mište premišľin, so pheneha a sar ada pheneha

SO PHENEL E BIBLIJA: Andro manželstvo, ačhes la romňaha, le romeha jekh ťelos. (Matúš 19:5) Ale the avka san duj manuša a možno dikhen varesave veci inakšes. Vašoda sikhľuv, sar mišľinel a sar hin tira romňake, romeske. (Filipanom 2:2) Ajsi jednota tumenge pomožinela, sar keren varesavo rozhodnuťje. E Biblija phenel: Te pes mangel goďi jekh avrestar, o plani pes podarinena. (Príslovia 20:18) Mukhen tumen te ľidžal le biblicke zasadenca, te keren jekhetane važna rozhodnuťja. (Príslovia 8:32, 33)

SO ŠAJ KEREN:

• Vaker čiže de duma tira romňaha, le romeha na ča pal varesave informaciji the nazori, ale the pal ada, sar tuke hin pro jilo.

• Sigeder, sar varekaske vareso sľubines, phuč tira romňatar, le romestar, so peske pal ada mišľinel.