Prindžaren le Jehovaskere svedken? Možno dživen pašes paš tumende, phiren tumenca andre buťi abo andre škola. Možno imar tumenge vareso phende pal e Biblija. Save manuša sam? Soske phenas le manušenge pal ada, andre soste paťas?

Sam ajse, sar the tumen. Baruvahas avri andro čore abo barvale fameľiji. Varekana phirahas andre khangeri abo aňi na paťahas andro Del. Ale sako amendar peršo, sar ačhiľa svedkos, pes mušinďa cale jileha te sikavel o biblicko čačipen. (Skutky 17:11) Sas amenge pre dzeka te dživel pal e Biblija a amaro jilo amenge phenďa, hoj kamas te služinel le Jehovaske, amare Devleske.

Hin amen užitkos, hoj pes sikavas andal e Biblija. Amen zadživas o pharipena avka, sar aver manuša a the amen o jilo cirdel pro nalačho drom. Ale amen kamas te dživel pal o biblicka zasadi a dikhas, hoj amaro dživipen džal ko feder. (Žalm 128:1, 2) Cirdel amen amaro jilo te phenel avre manušenge pal o lačhe veci, so pes dodžanľam andal e Biblija.

Dživas pal e Devleskeri goďi. Hin amenge alestar mište pro jilo, presikavas paťiv avrenge, na klaminas a sam jileskere. Averdžene dikhen pre amende sar pro lačhe manuša. Kamas, kaj o fameľiji te ľikeren jekhetane a o manuša te dživen slušňe. Paťas, hoj o Del na dikhel, sar o manuš dičhol avral, ale savo les hin o jilo. Vašoda amen hin but kresťanska phrala the pheňa pal calo svetos. Na dikhas, savi farba len hin a khatar hine. Na sam viňimočna manuša, ale jekhetane sam šukar ľudos. (Skutky 4:13; 10:34, 35)

• Andre soste hine le Jehovaskere svedki ajse sar tumen?

• Save zasadi pes sikaven le Jehovaskere svedki andal e Biblija?