О Јехова a керѓа о прво брако. И Библија вакерела аменге кај о Девел керѓа е прво џувља хем анѓа ла е Адамеске. О Адам сине бут бахтало хем вакерѓа: „Аке кокало таро ме кокала хем мас таро мо мас“ (1. Мојсеева 2:22, 23). О Јехова мангела о мануша со и ко брако те овен бахтале. Ки акаја брошура, кеда спомнинела пе брако мислинела пе башо ром хем ромни со и венчиме.

Кеда прандинеа ту, шај мислинеа кај са ка овел најшукар. Ама кобор те манген пе о ром хем и ромни, палем ка овел лен несаве проблемија (1. Коринќаните 7:28). Ки акаја брошура, ка аракхе советија тари Библија. Ако икереа лен ка шај то брако хем ти фамилија те овен бахтале (Псалм 19:8-11).

СО ВАКЕРЕЛА И БИБЛИЈА: О ром тано поглавари ки фамилија (Ефешаните 5:23).

О Јехова, тутар сар ром, аџикерела те грижине ту те ромњаке хем те ове нежно лаја (1. Петрово 3:7). О Девел керѓа ла те поможинел ту хем ов мангела те сикаве лаке кај мангеа ла хем поштујнеа ла (1. Мојсеева 2:18). Мора добором бут те манге те ромња со ка ове спремно лакере потребе те чхиве англедер тле (Ефешаните 5:25-29).

О Јехова, тутар сар ромни, аџикерела таро вило те поштујне те роме хем те поможине ле те керел адава со родела лестар о Девел (1. Коринќаните 11:3; Ефешаните 5:33). Терѓов пали лесте ко лескере одлуке хем таро вило поможин ле (Колошаните 3:18). Ако кереа адава, ка ове бут вредно англо те ромескере јаќха хем англо Јехова (1. Петрово 3:1-6).

СО ШАЈ ТЕ КЕРЕ:

• Пуч те брачно партнере сар шај те ове пошукар ром или ромни. Шун со ка вакерел хем трудин ту те кере о буќа пошукар.

• Ов стрпливо. Ка ваљани туменге време те сикљовен сар те керен јекх јекхе бахтале.

СО ВАКЕРЕЛА И БИБЛИЈА: Мислин ко адава сар осетинела пе ти ромни или то ром (Филипјаните 2:3, 4). Понашин ту лаја или леа сар нешто со и бут вредно, хем ма бистре кај о Јехова родела пе слугендар те овен љубезна сариненцар (2. Тимотеј 2:24). „Адава со керела лафи бизо те мислинел, те пхене посавела мачеа, а е гоѓаверенгири чхиб тани иљачи“ (Изреки 12:18). Адалеске пазин сар кереа лафи. О Јехова ка поможинел ту те лафија те овен љубезна хем те вакере лен мангипаја (Галатите 5:22, 23; Колошаните 4:6).

СО ШАЈ ТЕ КЕРЕ:

• Англедер те керен лафи баши несави важно бути, молин ту те ачхове смиримо хем те ове спремно те шуне со мислинела о јавер.

• Шукар размислин со ка вакере хем сар ка вакере адава.

СО ВАКЕРЕЛА И БИБЛИЈА: Кеда лена пе, о ром хем и ромни овена јекх (Матеј 19:5). Ама ко брако, понадари да сиен дуј џене кола со шај ка размисинен јавер чхане башо несаве буќа. Адалеске, ваљани те сикљон те овен јекх ко мисле хем ко адава со осетинена (Филипјаните 2:2). Адава тано бут важно кеда ваљани те анен одлуке. И Библија вакерела: „Кеда родеа совет, о планија ка успејнен“ (Изреки 20:18). Мукх о советија тари Библија те водинен тумен кеда заедно анена важна одлуке (Изреки 8:32, 33).

СО ШАЈ ТЕ КЕРЕ:

• Вакер те ромњаке или ромеске сар осетинеа ту, а на само сар дикхеа ко буќа.

• Англедер те ане несави одлука, кер лафи те ромњаја или те ромеа.