ЛЕКЦИЈА 15
Кој тано о Исус?
О Исус тано јекх таро најпенџарде мануша ки историја. Бут џене џанена само лескоро анав, ама на џанена јавера буќа баши лесте. Исто аѓаар, бут мануша иси лен различно мислење башо адава кој чаче тано о Исус. Со вакерела и Библија баши лесте?
1. Кој тано о Исус?
О Исус тано моќно ангели кова со живинела ко небо. О Јехова створинѓа ле англедер те керел са о јавера буќа. Адалеске ки Библија пишинела баши лесте кај ов тано „првобијамо таро са сој тано кердо“ (Колошаните 1:15). Исто аѓаар, и Библија вакерела кај о Исус тано е Девлескоро единствено бијамо Чхаво a соске ов сине о единствено со сине створимо директно таро Јехова (Јован 3:16). О Исус керѓа бути пле Дадеа е Јеховаја, аѓаар со поможинѓа леске те створинел са о јавера буќа. (Читин Изреки 8:30.) О Исус понадари да тано бут паше е Јеховаја. Ов верно вакерела е јаверенге е Девлескере лафија хем упатствија хем адалеске баши лесте вакерела пе кај тано „о Лафи“ (Јован 1:14).
2. Соске о Исус ало ки Пхув?
Англедер околу 2.000 берша о Јехова керѓа јекх чудо. Ов користинѓа пло свети дух хем леља е Исусескоро живото таро небо хем чхивѓа ле ко воги јекхе чхајаке со викинела пе сине Марија. Аѓаар о Исус бијандило сар мануш. (Читин Лука 1:34, 35.) О Јехова бичхалѓа е Исусе ки Пхув те овел о ветимо Месија, или Христос, хем те спасинел е манушен. b Са о пророштвија со денѓа о Јехова те овен пишиме ки Библија башо Месија исполнинѓе пе упро Исус. Адава поможинѓа е манушенге те џанен кај о Исус сине „о Христос, о Чхаво е џивде Девлескоро“ (Матеј 16:16).
3. Коте тано о Исус акана?
Откеда о Исус муло сар мануш, о Девел воскреснинѓа ле сар ангели хем иранѓа ле ко небо. Адатхе о Девел денѓа ле јекх бут бари положба (Филипјаните 2:9). Акана, о Исус тано јекх бут моќно ангели. Само о Јехова тано помоќно таро Исус.
ДОЗНАЈН ПОВИШЕ
Сикљов повише башо Исус хем соске тано важно пошукар те запознајне ле.
4. О Исус нане о Семоќно Девел
И Библија сикавела кај о Исус, иако тано моќно ангели ко небо, подложно тано е Јеховаске, кова сој лескоро Девел хем Дад. Котар џанаја адава? Дикх о ВИДЕОКЛИПИ кова со сикавела со вакерела и Библија башо адава кој тано о Исус хем саво однос иси ле е Семоќно Девлеа.
О стихија сој тане денде потеле поможинена аменге те хаљова о однос хем и разлика машкар о Јехова хем о Исус. Читинен секова стихо, а пало адава керен лафи башо акала пучиба:
Читин Лука 1:30-32.
-
Спрема адава со вакерѓа о ангели, сој тано о Исус е Јеховаске, е Најбареске?
Читин Матеј 3:16, 17.
-
Со вакерѓа о гласо таро небо кеда крстинѓа пе о Исус?
-
Со мислинеа, каскоро гласо сине адава?
Читин Јован 14:28.
-
Кој тано попхуро хем иси ле побаро авторитети — о дад или о чхаво?
-
Со сикљоваја таро адава со о Исус вакерѓа кај о Јехова тано лескоро Дад?
Читин Јован 12:49.
-
Со мислинеа, дали о Исус мислинѓа кај ов хем лескоро Дад тане јекх личност?
5. Доказија со сикавена кај о Исус сине о Месија
Ки Библија иси бут пророштвија кола со ваљанѓе те поможинен е манушенге те пенџарен е Месија. Дикх о ВИДЕОКЛИПИ те шај те дикхе несаве пророштвија кола со о Исус исполнинѓа лен кеда ало ки Пхув.
Читин о библиска пророштвија, а пало адава керен лафи башо акала пучиба:
Читин Михеј 5:2 те шај те дознајне коте о Месија ваљанѓа те бијанѓовел. c
-
Дали акава исполнинѓа пе упро Исус? (Матеј 2:1)
Читин Псалм 34:20 хем Захарија 12:10 те шај те дикхе несаве деталија кола со сине пророкујме башо е Месијаскоро мерибе.
-
Дали исполнинѓе пе акала пророштвија? (Јован 19:33-37)
-
Со мислинеа, дали о Исус шај сине те влијајнел упро адава те исполнинен пе акала пророштвија?
-
Со сикавела аменге акава башо Исус?
6. Соске тано важно те запознајне е Исусе?
И Библија сикавела кај тано бут важно те сикљова башо Исус хем баши лескири улога. Читин Јован 14:6 хем 17:3, а пало адава керен лафи башо акава пучибе:
-
Соске тано бут важно те сикљове башо Исус?
О Исус пхравѓа о друмо те шај те ова е Девлескере амала. Ов сикавѓа о чачипе башо Јехова хем преку лесте шај те добина вечно живото
НЕСАВЕ ШАЈ ВАКЕРЕНА: „Е Јеховаскере сведокија верујнена кај о Исус тано е Девлескоро Чхаво. Ама, е Девле нашти те овен ле чхаве“.
-
Сар ка одговорине?
СО СИКЛИЛЕМ
О Исус тано моќно ангели. Ов тано е Девлескоро Чхаво хем о Месија.
Сар ка одговорине?
-
Соске вакерела пе е Исусеске кај ов тано „првобијамо таро са сој тано кердо“?
-
Со керѓа о Исус англедер те авел ки Пхув?
-
Котар џанаја кај о Исус тано о Месија?
ИСТРАЖИН
Дознајн панда јавера буќа со сикавена кај о Исус сине о Месија.
„Дали о пророштвија башо Месија докажинена кај о Исус сине о Месија?“ (интернет статија)
Со значинела адава со о Исус тано е Девлескоро Чхаво? Дали о Девел добинела чхаве ко исто начин сар со добинена о мануша?
„Соске е Исусеске вакерела пе кај тано е Девлескоро Чхаво?“ (интернет статија)
Дикх соске о тројство нане библиско сикљојбе.
Читин сар јекхе џувљакоро живото менинѓа пе, откеда истражинѓа со вакерела и Библија башо е Исусескоро живото.
„Еврејка објаснува зошто решила да ги преиспита своите верувања“ (Разбудете се! таро мај 2013)
Шај исто ка интересинел тут
НАЈЧЕСТА ПУЧИБА
Сар изглединела о библиско курси со нудинена е Јеховаскере сведокија?
Џикоте икерела пе о бесплатно библиско курси, шај те користине било кова превод тари Библија. Ко курси шај те канине некас тари тли фамилија или несаве амале.
