Ко 23 мај 2023 берш, јекх претставнико тари влада башо здравство кова сој тано таро САД предупрединѓа е манушен кај о социјална мреже на влијајнена шукар упро бут терне.

•   „Иако о социјална мреже шај те користинен несаве чхавенге хем тинејџеренге, иси бут буќа со сикавена кај ола шај те влијајнен бут лошно упро емоционално хем физичко састипе е чхавенгоро хем е тинејџеренгоро“ (Social Media and Youth Mental Health: The U.S. Surgeon General’s Advisory, 2023).

 О претставнико тари влада башо здравство керѓа истражувања со сикавена кај иси причина те ова секириме.

•   Ко чхаве со иси лен таро 12 џи ко 15 берш „кола со накхена повише тари трин саатија ко диве ко социјална мреже, иси побаро ризик те овел лен емоционална проблемија сар сој симптомија баши депресија хем анксиозност“.

•   О тинејџерија со иси лен околу 14 берш хем „накхавѓе бут време ко социјална мреже, бут пути сине лен проблемија сојбаја, сине малтретириме преку интернет, на сине задоволна адалеа сар изглединена, мислинена сине кај на врединена хем сине лен симптомија баши депресија. Акава повише пути овела сине ко џувља него ко мурша“.

 Сар шај о родителија те аракхен пумаре чхавен таро асавке опасностија? Ки Библија иси практична советија.

 Овен ко тек. Сар родителија, размислинен саве шај те овен о опасностија хем одлучинен дали тумаро чхаво ка користинел социјална мреже или на.

•   Библиско начело: „Сикав е чхаве спрема о друмо колесте со ваљани те џал“ (Изреки 22:6).

•   Те шај те дознајнен нешто повише, читинен и статија „Да ли моје дете треба да користи друштвене мреже?“.

 Ако мукхена тумаре чхаве те користинел социјална мреже, овен свесна саве шај те овен о опасностија хем овен ко тек адалеа со керела тумаро чхаво ко интернет. Сар шај те поможинен леске?

 Аракхен тумаре чхаве таро лошна содржине. Сикавен тумаре чхаве сар те пенџарел хем те избегинел о лошна содржине.

•   Библиско начело: „Блуд хем секова мелалипе или алчност ни ма те спомнинел пе машкар туменде... а исто аѓаар безобразно понашибе, лафија сој вакерде бизо те мислинел пе, хем безобразна шале“ (Ефешања 5:3, 4).

•   Шај те аракхен практична советија ки статија „Помозите тинејџеру да паметно користи друштвене мреже“.

 Чхивен границе. На пример, чхивен правилија башо адава кеда хем кобор време тумаро чхаво шај те користинел социјална мреже.

•   Библиско начело: „Шукар пазинен сар живинена — на сар окола со нане мудра, него сар окола сој мудра. Шукар користинен тумаро време“ (Ефешања 5:15, 16).

•   Користинен и поучно анимација Паметно користин о социјална мреже те шај те поможинен тумаре чхавеске те хаљол соске тано важно те чхивен пе границе.