1. Со шунѓем ко е бершескоро состанок башо 2023 берш?

 КО Е БЕРШЕСКОРО состанок башо 2023 берш, a добинѓем важна појаснувања башо несаве таро амаре верувања хем шунѓем несаве интересна известувања баши амари служба. На пример, дознајнѓем кај несаве манушен шај ка овел лен прилика те овен дело таро е Јеховаскоро народо чак откеда ка овел уништимо о Баро Вавилон. Исто аѓаар дознајнѓем кај почминдор таро ноември 2023 берш, нане више те ваљанел те да извештај башо са адава со кераја ки служба. Дали акала промене сикавена кај амари служба нане више добором важно, сар со сине англедер? Сигурно кај на!

2. Соске амари служба секова диве овела са поитно? (Марко 13:10).

² Сар со накхела секова диве, амари служба овела са поитно. Соске? Адалеске со ачхило амен панда хари време англедер о крајо. Размислин со пророкујнѓа о Исус башо проповедибе ко последна диве. (Читин Марко 13:10.) Спрема о паралелно извештај таро Матеј, о Исус вакерѓа кај о шукар хабери ка проповединел пе ко цело свето англедер те авел о „крајо“ (Мат. 24:14). Акале лафеа мислинела пе ко целосно крајо е Сатанаскере светоске. О Јехова одрединѓа „диве хем саати“ башо буќа со панда хари ка случинен пе (Мат. 24:36; 25:13; Апо. 1:7). Секова диве амен сием са попаше ко адава време (Рим. 13:11). Ама џи тегани амен мора понадари да те проповедина са џикоте на авела о крајо.

3. Со поттикнинела амен те проповедина?

 ³ Кеда керела пе лафи баши амари служба, шукар тано те размислина башо акава пучибе: Соске проповединаја о шукар хабери? Адалеске со иси амен мангипе. Кеда проповединаја, амен сикаваја амаро мангипе — мангипе спрема о шукар хабери, спрема о мануша хем најважно, спрема о Јехова хем лескоро анав. Те дикха акала буќа јекх по јекх.

ПРОПОВЕДИНАЈА СОСКЕ МАНГАЈА О ШУКАР ХАБЕРИ

4. Со кераја кеда шунаја несаво шукар хабери?

⁴ Сетинеа ли тут сар осетинѓан тут кеда шунѓан несаво шукар хабери? Шај некој тари тли фамилија добинѓа чхаво или шај кхувѓан ки бути баш кеда највише ваљанѓа туке? Сигурно едвај аџикерѓан те вакере адава шукар хабери те фамилијаке хем те амаленге. Дали нешто слично случинѓа пе туке кеда шунѓан о најшукар хабери со постојнела — о шукар хабери башо е Девлескоро Царство?

5. Сар осетинѓан тут кеда прво пути шунѓан о чачипе таро е Девлескоро Лафи? (Дикх хем о слике.)

⁵ Сетин тут сар осетинѓан тут кеда прво пути шунѓан о чачипе таро е Девлескоро Лафи. Дознајнѓан кај тло небесно Дад мангела тут, кај ов мангела те ове дело тари лескири фамилија, кај ветинела живото бизи дукх хем бизо мукхе, кај шај те овел тут надеж кај ка дикхе палем тле манглен со муле кеда ка воскреснинен ко нево свето хем панда бут јавера буќа (Мар. 10:29, 30; Јован 5:28, 29; Рим. 8:38, 39; Отк. 21:3, 4). Акала чачипа керѓе тут бут радосно (Лука 24:32). Добором бут замангљан лен со нашти икерѓан лен само ки туте него мангљан те вакере лен сариненге! (Споредин Еремија 20:9.)

6. Со сикљовеа таро Ернест хем тари Роза?

⁶ Размислин башо акава искуство. Јекх пхрал со викинела пе Ернест b сине ле околу деш берш кеда о дад лескоро муло. О Ернест  вакерела: „Пучава ман сине, дали тано ко небо? Дали на постојнела више? Љубоморно сиум сине е чхавенге со сине лен дад“. О Ернест бершенцар џала сине ко гробија, бешела сине ко кочака англо пле дадескоро гробо хем молинела пе сине: „Девла молинава тут, вакер манге кај тано мо дад“. Околу 17 берш откеда муло лескоро дад, почминѓа те проучинел и Библија. Ов сине воодушевимо кеда дознајнѓа кај о муле нане свесна башо ништо, сар те пхене хор совена хем кај и Библија ветинела кај ка овел воскресение (Проп. 9:5, 10; Апо. 24:15). Конечно, ов аракхља о одговорија ко пучиба кола со добором бут време мучинена ле сине! О Ернест сине бут среќно башо чачипа со дознајнела лен сине тари Библија. Лескири ромни и Роза, исто аѓаар почминѓа те проучинел и Библија хем замангља о хабери башо Царство. Ола крстинѓе пе ко 1978 берш. Ола ревно проповединена сине пумаре фамилијаке, амаленге хем јаверенге башо скапоцена чачипа со сиклиле лен. Адалеске ола шај сине те поможинен повише таро 70 манушенге те запознајнен е Јехова хем те крстинен пе.

7. Со случинела пе кеда ко амаро вило ка бајрол мангипе башо библиско чачипе? (Лука 6:45).

⁷ Јасно тано кај кеда ко амаро вило ка бајрол мангипе башо библиско чачипе, тегани амен нашти те чутина. (Читин Лука 6:45.) Осетинаја амен исто сар е Исусескере ученикија таро прво веко кола со вакерѓе: „Амен нашти те на кера лафи башо адава со дикхлем хем шунѓем“ (Апо. 4:20). Иси амен добором баро мангипе башо чачипе со мангаја те вакера ле со шај повише манушенге.

ПРОПОВЕДИНАЈА СОСКЕ МАНГАЈА Е МАНУШЕН

8. Со поттикнинела амен те вакера е јаверенге о шукар хабери? (Дикх и рамка „Манг е манушен — кер ученикија“.) (Дикх хем и слика.)

⁸ Исто сар о Јехова хем лескоро Чхаво, амен да мангаја е манушен (Изр. 8:31; Јован 3:16). Иси амен баро сочувство околенге сој „бизо Девел“ хем „бизи надеж“ (Еф. 2:12). Ола тасавѓовена ко проблемија е животоскере, а амен иси амен о појас спасибаске со ваљани ленге — о шукар хабери башо е Девлескоро Царство. Адалеске со мангаја лен хем иси амен сочувство спрема ленде, поттикниме сием те да амендар са те шај те вакера ленге о шукар хабери. Акава скапоцено хабери шај те дел лен надеж, те поможинел ленге панда авдиве те овел лен шужо живото хем те дел лен прилика те добинен о „чачутно живото“ — вечно живото ко е Девлескоро нево свето (1. Тим. 6:19).

9. Башо со предупрединаја е манушен, хем соске? (Езекиел 33:7, 8).

⁹ Амаро мангипе башо мануша исто аѓаар поттикнинела амен те вакера ленге кај о крајо  акале лошно светоскоро тано паше. (Читин Езекиел 33:7, 8.) Аменге тано жал башо са о мануша машкар коленде сој окола тари амари фамилија кола со на служинена е Јеховаске. Бут џене живинена пумаро живото бизо те овен свесна башо адава со аџикерела амен — бари неволја сави со на сине таро почеток е светоскоро џи акана, а ни нане те овел више (Мат. 24:21). Амен мангаја ола те џанен со ка случинел пе ко време кеда о Јехова ка судинел. Прво ка овел уништими и ховавни религија, а пало адава ко Армагедон ка овел уништимо акава лошно свето (Отк. 16:14, 16; 17:16, 17; 19:11, 19, 20). Амен молинаја амен со шај повише мануша те шунен адава со вакераја ленге хем те одлучинен те служинен е Јеховаске заедно аменцар панда авдиве. Ама, сар тано околенцар кола со ко моменти на шунена акава предупредување машкар коленде сој хем амари фамилија колен со бут мангаја лен?

10. Соске тано важно понадари да те предупредина е манушен?

¹⁰ Сар со сине објаснимо ки англуни статија, о Јехова шај ка мангел те спасинел несавен кола со ка почминен те верујнен ки лесте кеда ка дикхен кај о Баро Вавилон тано уништимо. Ако тано адава аѓаар, тегани тано панда поважно понадари да те вакера ленге акава предупредување акана. Размислин башо акава: Адава со вакераја ленге акана шај те дел лен нешто ко со ка сетинен пе тегани. (Споредин Езекиел 33:33.) Ола шај ка сетинен пе ко предупредувања со вакерѓем ленге хем шај ка овен поттикниме заедно аменцар те обожавинен е Јехова англедер те овел касно. Исто сар о чувари таро затвор ко Филипи кова со почминѓа те верујнел ко Јехова чак пало „баро земјотрес“, аѓаар шај несаве кола со акана на шунена о предупредување ка почминен те верујнен откеда таро јекх пути ка овел уништимо о Баро Вавилон (Апо. 16:25-34).

ПРОПОВЕДИНАЈА СОСКЕ МАНГАЈА Е ЈЕХОВА ХЕМ ЛЕСКОРО АНАВ

11. Сар даја е Јеховаске слава, чест хем моќ? (Откровение 4:11; дикх хем о слике).

¹¹ И најважно причина соске проповединаја о шукар хабери тано адава со мангаја е Јехова хем лескоро анав. Ки амари служба дикхаја сар начин колеа со шај те фалина е Девле коле со мангаја ле. (Читин Откровение 4:11.) Цело вилеа согласинаја амен кај о Јехова заслужинела те добинел и слава и чест хем и моќ, таро пле верна слуге. Амен славинаја хем даја чест е Девлеске кеда вакераја е јаверенге уверлива доказија кај ов створинѓа са хем кај амен постојнаја адалеске со ов денѓа амен живото. Амен даја ле моќ, јавере лафенцар даја ле амари моќ кеда  користинаја амаро време, сила хем о буќа со иси амен те шај кобор со шај повише те користина амаре околностија те џа ки служба (Мат. 6:33; Лука 13:24; Кол. 3:23). Едноставно, амен уживинаја те кера лафи е јаверенцар башо Девел коле со мангаја ле. Исто аѓаар, амен сиен поттикниме те кера лафи е јаверенцар башо лескоро анав хем башо адава саво Девел тано ов. Соске?

12. Сар славинаја е Јеховаскоро анав ки служба?

¹² О мангипе спрема о Јехова поттикнинела амен те славина лескоро анав (Мат. 6:9). Акава значинела кај амен мангаја те вакера е јаверенге кај о лошна буќа со вакерѓа лен о Сатана башо Јехова нане точна (1. Мој. 3:1-5; Јов 2:4; Јован 8:44). Кеда проповединаја, амен иси амен бари желба те вакера сариненге со шунена амен кој тано о Јехова хем саво чаче тано. Мангаја сарине те џанен кај лескири најбари особина тано о мангипе, кај лескоро начин сар владинела тано праведно хем исправно хем кај лескоро Царство панда хари ка анел крајо е мукенге хем кај ка анел мир хем радост са е манушенге (Пс. 37:10, 11, 29; 1. Јов. 4:8). Кеда вакераја акала буќа е манушенге башо Јехова амен славинаја лескоро анав. Исто аѓаар, амен сием радосна адалеске со џанаја кај кераја адава со ваљани те кера сар е Јеховаскере сведокија. Соске вакераја адава?

13. Соске тани бари чест аменге со сием викиме е Јеховаскере сведокија? (Исаија 43:10-12).

¹³ О Јехова биринѓа амен те ова лескере „сведокија“. (Читин Исаија 43:10-12.) Англедер некобор берша, ко јекх писмо таро Водечко тело пишинела сине: „Најбари чест со шај некас те овел ле тани те овел викимо е Јеховаскоро сведоко“. c Соске вакераја акава? Размислин баши акаја споредба. Замислин туке кај вакерена кај керѓан нешто погрешно.  Адалеске, ка ваљани туке некој со ка вакерел е јаверенге кај адава нане точно хем кај ту сиан шукар мануш кова со никогаш на би керела нешто асавко. Кас би биринеа те овел туке сведоко? Сигурно, некас со џанеа хем касте со иси тут доверба хем кас со иси шукар анав англо јавера те шај те верујнен леске. Адава со о Јехова биринѓа амен те ова лескере Сведокија, сикавела кај ов шукар пенџарела амен хем кај иси ле доверба ки аменде кај ка сведочина кај ов тано о единствено чачутно Девел. Аменге тани добором бари чест те ова лескере Сведокија со користинаја секоја прилика те шај те вакера е јаверенге башо лескоро анав хем те вакера кај са о ховајба со сине вакерде баши лесте нане точна. Аѓаар, живинаја ко склад е анавеа кова со гордо пхираваја ле — е Јеховаскере сведокија (Пс. 83:18; Рим. 10:13-15).

ПОНАДАРИ ДА КА ПРОПОВЕДИНА СА ЏИ КО КРАЈО

14. Саве интересна настанија аџикерена амен?

¹⁴ Аџикерена амен бут интересна настанија! Адалеске со о Јехова дела пло благослов, надинаја амен кај панда бут јавера мануша ка прифатинен о чачипе англедер те почминел и бари неволја. Исто аѓаар, воодушевинела амен адава со џанаја кај чак хем ко најпхаро периоди тари манушикани историја — џикоте трајнела и бари неволја — шај ка дикха сар јавера да икљовена таро свето е Сатанаскоро хем почминена заедно аменцар те славинен е Јехова (Апо. 13:48).

15-16. Со ка кера понадари да, хем џи кеда?

¹⁵ Ама, џикоте авела адава време амен иси амен јекх важно задача те кера — задача која со никогаш палем нане те кера ла. Иси амен чест те проповедина о шукар хабери башо е Девлескоро Царство ки цели пхув. А ко исто време, амен мора понадари да те предупредина е манушен башо адава со панда хари ка случинел пе. О мануша мора те џанен кај сигате авела о крајо акале светоскоро. Тегани кеда ка авел о време башо судо, ола ка џанен кај о хабери со проповединѓем сине таро Девел, о Јехова (Езек. 38:23).

¹⁶ Адалеске, со сием одлучна те кера? Поттикниме таро мангипе — мангипе спрема о шукар хабери, спрема о мануша хем најважно, спрема о Јехова хем лескоро анав — амен понадари да ка проповедина ревно хем итно, са џикоте о Јехова на вакерела: „Доволно тано!“