1. Соске и Спомен-свеченост тано о најважно диве ко берш? (Лука 22:19, 20).

 Е ЈЕХОВАСКЕРЕ народоске и Спомен-свеченост башо е Христосескоро мерибе тано о најважно диве ко берш. Акава тано о единствено настан кова со о Исус конкретно заповединѓа пле следбениконге те икерен ле. (Читин Лука 22:19, 20.) Таро повише причине едвај аџикераја и Спомен-свеченост. Те дикха некобор лендар.

2. Кола тане несаве причине соске едвај аџикераја и Спомен-свеченост?

² И Спомен-свеченост поможинела аменге те размислина башо адава кобор тани важно и откупнина хем те дикха ко саве начинија шај те сикава амари благодарност баши е Исусескири жртва (2. Кор. 5:14, 15). Исто аѓаар дела амен прилика „заедно те охрабрина амен“ амаре пхраленцар хем пхењенцар (Рим. 1:12). Секова берш, бут џене сој тане неактивна авена ки Спомен-свеченост. Несаве лендар чак тане поттикниме те иранен пе ко Јехова адалеске со о јавера љубезно доџакерена лен. А бут џене тане воодушевиме таро адава со дикхена хем шунена ки Спомен хем адалеске мангена те проучинен и Библија. Са акава керела и Спомен-свеченост те овел аменге јекх посебно настан!

3. Сар и Спомен керела те ова ко јекхипе ко цело свето? (Дикх хем и слика.)

³ Исто аѓаар, размислин ко саво начин и Спомен-свеченост керела те ова ко јекхипе амаре пхраленцар хем пхењенцар ко цело свето. Џикоте ко различна делија таро свето о кхам похари перела, е Јеховаскере сведокија кхедена пе те шај те икерен акава настан. Хем сарине амен шунаја о исто говор  коте сој истакнимо кобор тани важно и откупнина. Гиљаваја дуј фалбена гиља, накхаваја таро вас ко вас о маро хем и мол хем таро вило вакераја „амин“ ко штар молитве. Ко периоди таро 24 саатија, са о собранија керена о иста буќа. Шај ли замислинеа туке кобор бут радујнена пе о Јехова хем о Исус кеда сарине амен ки цели пхув фалинаја лен ко асавко начин?

4. Башо со ка кера лафи ки акаја статија?

⁴ Ки акаја статија, ка кера лафи башо акала пучиба: Сар шај те спремина амаро вило баши Спомен-свеченост? Сар шај те поможина е јаверенге те овел лен корист таро акава настан? Хем сар шај те поможина околенге со нане активна? О одговорија ко акала пучиба ка поможинен аменге те ова спремна башо акава свето настан?

САР ШАЈ ТЕ СПРЕМИНА АМАРО ВИЛО?

5. а) Соске ваљани те размислина кобор врединела и откупнина? (Псалм 49:7, 8). б) Со сиклиљан таро видеоклипи Соске муло о Исус?

⁵ Јекх таро најважна начинија сар шај те спремина амаро вило тано аѓаар со ка размислина кобор врединела е Исусескири откупно жртва. Амен коркори никогаш нашти сине те ослободина амен таро грево хем о мерибе. (Читин Псалм 49:7, 8; дикх хем о видеоклипи Соске муло о Исус?) a Адалеске о Јехова бичхалѓа е Исусе те дел пло живото аменге. Иако адава коштинѓа ле бут хем лескере мангле Чхаве (Рим. 6:23). Кобор повише размислинаја баши жртва со керѓа аменге о Јехова хем о Исус добором повише ка ценина и откупнина. Те размислина само башо некобор буќа кола со сикавена кобор коштинѓа и откупнина е Јехова хем е Исусе. Прво, те дикха сој тано вклучимо ки откупнина.

6. Со сине вклучимо ки откупнина?

⁶ Откупнина тани цена со платинела пе те шај те иранел пе нешто. Кеда сине створимо о прво мануш, о Адам, сине ле совршено живото. Ама кеда грешинѓа, ов нашавѓа и прилика те живинел вечно на само ов него хем лескере чхаве да. Те шај те иранел адава со Адам нашавѓа, о Исус денѓа пло совршено живото сар жртва. Џикоте сине ки пхув, о Исус „на керѓа ни јекх грево, а ни на иклило несаво ховајбе таро лескоро муј“ (1. Пет. 2:22). Ов џи ко пло мерибе ачхило совршено, исто сар со сине о Адам англедер те грешинел. Адалеске, адалеа со жртвујнѓа пло живото, о Исус шај сине те платинел и цена башо живото со нашавѓа о Адам (1. Кор. 15:45; 1. Тим. 2:6).

7. Саве предизвикија сине е Исусе џикоте сине теле ки пхув?

⁷ Џикоте сине ки пхув, о Исус сине послушно е Јеховаске ко са, чак кеда сине испитими лескири вера. Сар чхаво, о Исус мора сине те овел послушно пле несовршено родителенге иако ов бијандило совршено (Лука 2:51). Сар тинејџери ов ваљани сине те боринел пе против о притисок таро јавера кола со шај мангле те овел непослушно пле родителенге или те на ачхол верно е Јеховаске. А сар возрасно, о Исус ваљани сине те ачхол цврсто кеда о Сатана искушинѓа ле, па чак кеда директно вакерѓа леске те откажинел пе тари пли верност спрема о Девел (Мат. 4:1-11). О Сатана сине одлучно те чхивел е Исусе те грешинел хем аѓаар те нашти те платинел и откупнина.

8. Кола јавера пхарипа ваљани сине о Исус те издржинел?

⁸ Џикоте трајнела сине лескири служба теле ки пхув, о Исус мора сине те истрајнел ко јавера да неволје. Лескере душмања прогонинена ле сине хем мангле те мударен ле (Лука 4:28, 29; 13:31). Мора сине те трпинел  о слабостија пле следбениконгере . Џикоте трајнела сине о судибе башо лескоро живото, бут сине малтретиримо хем асана сине леске. Пало адава, сине мудардо ко јекх понижувачко начин хем трпинѓа бари дукх (Евр. 12:1-3). Кеда сине ко стубо мучибаске, ов мора сине коркори те трпинел баре дукха, бизи е Јеховаскири заштита b (Мат. 27:46).

9. Сар осетинаја амен кеда размислинаја баши е Исусескири жртва? (1. Петарескоро 1:8).

⁹ Акалестар шај јасно те дикха кај о Исус платинѓа бари цена баши откупнина. Кеда размислинаја башо жртве со о Исус сине спремно те керел аменге, амаро мангипе бајрола панда повише спрема лесте. (Читин 1. Петарескоро 1:8.)

10. Со сине спремно те трпинел о Јехова те шај те дел и откупнина?

¹⁰ А со сине спремно те жртвујнел о Јехова те шај о Исус те платинел и откупнина? Е Јехова хем е Исусе иси лен о најпаше однос со шај те постојнел машкар јекх дад хем чхаво (Изр. 8:30). Адалеске, замислин само сар осетинѓа пе о Јехова џикоте дикхела сине сар о Исус мора те истрајнел ко са адала неволје со сине ле ки пхув. Сигурно бут дукхандило ле со дикхља сар малтретиринена лескере Чхаве хем сар мучинела пе.

11. Вакер пример кова со сикавела сар веројатно осетинѓа пе о Јехова кеда о Исус сине мудардо.

¹¹ Секова родители кастар со муло чхаво бут шукар џанела кобор бут дукхала адава. Амен иси амен силно вера ко воскресение, ама адава на цидела и дукх со иси амен кеда мерела амендар некој со мангаја ле. Акава пример поможинела аменге те хаљова сар о Јехова веројатно осетинѓа пе кеда ко 33 берш а.е. c дикхља сар лескоро мангло Чхаво мучинела пе хем мерела (Мат. 3:17).

12. Со шај те кера о курке англедер и Спомен?

¹² Шај те трудине тут таро акава периоди, па џи ки Спомен ки тли лично студија или ки Фамилијарно рат те проучине нешто повише баши откупнина. Шај те користине о Прирачнико истражибаске е Јеховаскере сведоконгоро или јавера публикацие те шај те дознајне повише деталија баши откупнина. d Исто аѓаар, трудин тут те икере тут ко распоред читибаске и Библија баши Спомен-свеченост со аракхљола ко Амаро живото хем служба сар христијања — листија  спремибаске. Хем ко диве кеда икерела пе и Спомен, ма бистре те дикхе и посебно сабалутни програма. Кеда спреминаја амаро вило баши Спомен-свеченост, тегани ка шај те поможина е јаверенге да те овел лен корист таро адава (Езра 7:10).

ПОМОЖИН Е ЈАВЕРЕНГЕ ТЕ ОВЕЛ ЛЕН КОРИСТ

13. Која тани и прво бути те шај те поможине е јаверен те овел лен корист тари Спомен?

¹³ Сар шај те поможина е јаверенге те овел лен корист тари Спомен-свеченост? Џанѓола пе, најангле ваљани те канина лен. Освен со канинаја е манушен ки служба, шај исто аѓаар те кера списако те шај те канина околен со пенџараја. На пример, некас тари фамилија, колеген, соученикон хем јаверен. Чак ако нане амен доволно печатиме покане, шај те бичхала ленге електронско покана преку линк. Шај ка авен повише џене таро адава со очекујнѓем (Проп. 11:6).

14. Вакер пример со сикавела кобор тано важно лично те канина некас.

¹⁴ Ма бистре кај бут тано важно лично те канине некас ки Спомен-свеченост. Јекх пхен, колакоро ром нане Сведоко, сине изненадими кеда вакерѓа лаке кај ка џал лаја ки Спомен. Соске сине изненадими? Адалеске со ој бершенцар англедер бут пути поттикнинѓа ле те авел ки Спомен, ама ов никогаш на ало. Соске лакоро ром акава пути одлучинѓа те авел? Ов вакерѓа: „Добинѓум покана“, објаснинѓа кај јекх старешина коле со џанела ле денѓа ле покана. Хем ов на само адава берш, него бут берша пало адава сине присутно ки Спомен-свеченост.

15. Со на ваљани те бистра кеда канинаја е манушен ки Спомен?

¹⁵ Ма бистре кај околен со канинаја лен шај ка овел лен пучиба — посебно ако никогаш на сине ко амаре состанокија. Адалеске шукар ка овел те размислина хем те спремина амен башо пучиба со шај ка пучен амен (Кол. 4:6). На пример, несаве шај пучена пе: „Со ка случинел пе атхе? Кобор ка трајнел? Сар ваљани те урава амен? Дали ваљани те платинав нешто англедер те кхував? Дали кхедела пе паре?“ Кеда канинаја некас ки Спомен, шај те  пуча ле: „Дали иси ле несаве пучиба?“ хем тегани ка шај те одговорина леске. Шај исто аѓаар те сикава леске о видеоклипија Сетин тут ко е Исусескоро мерибе хем Со керела пе ки е Јеховаскере сведоконгири дворана? Аѓаар ка шај те поможина леске те хаљовел со керела пе ко амаре состанокија. А ки 28 лекција таро лил Ов бахтало засекогаш, иси бут шуже точке баши коленде со шај те кера лафи.

16. Со јавер шај те пучен окола со авена ки Спомен?

¹⁶ Откеда ка завршинел и Спомен-свеченост, е невен шај ка овел лен јавера да пучиба. Шај те пучен пе, соске никој на лела таро симболија, или соске само некобор џене керѓе адава. Исто аѓаар, шај ка пучен пе кобор пути икераја и Спомен. Или шај те пучен пе дали са амаре состанокија икерена пе ко исто начин. Иако башо бут таро акала буќа керела пе лафи ко говор со икерела пе ки Спомен, е невенге шај ка ваљани те објаснинел пе нешто повише. И статија тари амари интернет-страница jw.org Соске е Јеховаскере сведокија икерена е Господарескири вечера појавер таро јавера религие? шај те поможинел аменге те одговорина ко несаве таро ленгере пучиба. Мангаја те да амендар са те шај англедер и Спомен-свеченост, џикоте трајнела хем пали лате, те поможина околенге со иси лен „исправно стави“ те овел лен корист таро акава настан (Апо. 13:48).

ПОМОЖИН ОКОЛЕНГЕ СОЈ НЕАКТИВНА

17. Сар шај о старешине те поможинен околенге сој неактивна? (Езекиел 34:12, 16).

¹⁷ Сар шај о старешине те поможинен околенге сој неактивна ко периоди кеда икерела пе и Спомен-свеченост? Сикав кај грижинеа тут ленге. (Читин Езекиел 34: 13, 16.) Англедер и Спомен, трудин тут те јавин тут кобор со шај повише џененге. Уверин лен кај мангеа лен хем кај мангеа те поможине ленге ко било саво начин. Канин лен ки Спомен-свеченост хем ако авена, љубезно доџакер лен. Пали Спомен, продолжин те посетине акале мангле пхрален хем пхењен или те јавине тут ленге. Хем поможин ленге ко духовно поглед те шај те иранен пе ко Јехова (1. Пет. 2:25).

18. Сар шај сарине те поможина околенге сој неактивна? (Римјања 12:10).

 ¹⁸ Сарине таро собрание шај те поможинен е неактивнонге со ка авен ки Спомен. Сар? Аѓаар со ка сикавен ленге мангипе, ка овен ленцар љубезна хем ка поштујнен лен. (Читин Римјања 12:10.) Ма бистре кај акале бакхренге шај на сине локхо те авен ко состанок. Шај дарана сине таро адава со ка вакерен о пхраља хем о пхења. e Адалеске, ма пуч лен нешто колеа со ка чхиве лен ки незгодно ситуација, или ма вакер нешто колеа со ка повредине лен (1. Сол. 5:11). Ола тане амаре пхраља хем пхења. Радујнаја амен со шај палем заедно ленцар те служина! (Пс. 119:176; Апо. 20:35).

19. Саве користија иси амен ако сетинаја амен ко е Исусескоро мерибе?

¹⁹ Благодарна сием со о Исус вакерѓа аменге те сетина амен ко лескоро мерибе секова берш. Хем хаљоваја соске адава тано важно. Кеда сием присутна ки Спомен-свеченост адава користинела хем аменге хем е јаверенге ко бут начинија (Иса. 48:17, 18). Амаро мангипе спрема о Јехова хем о Исус бајрола. Сикаваја кобор ценинаја са адава со керѓе аменге. Оваја попаше амаре пхраленцар хем пхењенцар. Хем шај те поможина е јаверенге те дикхен сар шај те уживинен ко благословија со авена тари откупнина. Адалеске, те кера са со шај те ова спремна баши Спомен-свеченост — о најважно диве ко берш!