1. Спрема Псалм 18:46, солеа спорединѓа о Давид е Јехова?

 ЖИВИНАЈА ко свето коте со таро јекх пути шај те овен амен проблемија кола со шај те керен аменге пхаро о живото или целосно те менинен ле. Бут сием благодарна со шај те рода помош таро Јехова! Ки англуни статија дикхлем кај о Јехова тано џивдо Девел хем кај ов секогаш тано спремно те поможинел аменге. Кеда дикхаја сар ов поможинела аменге адава уверинела амен кај о Јехова тано џивдо Девел, баш сар со вакерѓа о Давид. (Читин Псалм 18:46.) Ама, откеда вакерѓа адава, о Давид спорединѓа ле нештолеа со нане џивдо. Ов башо Јехова вакерѓа „мли Карпа“. Со значинела адава?

2. Со ка дикха ки акаја статија?

² Ки акаја статија, ка дикха соске башо Јехова вакерела пе кај тано сар карпа хем со сикавела амен акаја споредба баши лесте. Исто аѓаар, ка дознајна сар шај те дикха ки лесте сар амари Карпа. Ко крајо ка дикха сар шај те сикава е Јеховаскере особине кола со керена ле те овел сар карпа.

СОСКЕ О ЈЕХОВА ТАНО САР КАРПА?

3. Соске бут пути ки Библија користинела пе о лафи „карпа“? (Дикх хем и слика)

³ И Библија спорединела е Јехова карпаја те шај те поможинел аменге пошукар те хаљова таро несаве лескере особине. Акава лафи бут пути појавинела пе ки Библија ко тхана коте со лескере слуге фалинена ле сар Девел кова со никој јавер нане сар лесте. Ки 5. Мојсеева 32:4 прво пути башо Јехова вакерела пе кај тано „Карпа“. И Ана ки молитва вакерѓа: „Нане карпа сар сој амаро Девел“ (1. Сам. 2:2). О Авакум башо Јехова вакерѓа „мли Карпа“ (Авак. 1:12). О псалмисти таро 73-то Псалм башо Девел вакерѓа: „И карпа мле вилескири“ (Пс. 73:26). Чак о Јехова коркори песке вакерѓа кај тано „Карпа“ (Иса. 44:8). Те дикха  трин особине башо кола со о Јехова споредимо карпаја хем те дикха сар шај ов те овел „амари Карпа“ (5. Мој. 32:31).

4. Ки сави смисла о Јехова тано тхан гарајбаске? (Псалм 94:22).

⁴ О Јехова тано тхан гарајбаске. Исто сар со јекх бари карпа шај те заштитинел некас тари бура, аѓаар о Јехова аракхела амен кеда накхаја таро пхаре ситуацие. (Читин Псалм 94:22.) Ов поможинела амен те аракха амаро амалипе леа хем уверинела амен кај са адава пхарипе со иси амен авдиве нане те керел аменге трајно штета. Исто аѓаар, ов ветинела аменге кај ка цидел са о буќа со секиринена амен хем со анена аменге муке (Езек. 34:25, 26).

5. Сар шај о Јехова те овел амаро тхан гарајбаске сар зорали карпа?

⁵ Јекх начин сар родаја е Јеховаскири заштита тано аѓаар со молинаја амен леске. Кеда молинаја амен леске, о Јехова дела амен пло мир кова со аракхела амаро вило хем амаре мисле (Фил. 4:6, 7). Размислин башо искуство е пхралескоро Артем, кова со сине пханло баши пли вера. Џикоте сине ко затвор јекх лошно инспектори нон стоп испитинела ле сине, керела леске сине притисок хем понижинела ле сине. О Артем вакерѓа: „Секова пути кеда о инспектори испитинела ман сине, сине ман баро стрес... Адалеске секогаш молинава ман сине е Јеховаске. Молинава ле сине те дел ман мир хем мудрост. Е инспекторескере тактике на успејнѓе ки манде... Адалеске со о Јехова поможинѓа манге, осетинѓум сар те пхене англи манде иси јекх баро ѕидо“.

6. Соске шај секогаш те овел амен доверба ко Јехова? (Исаија 26:3, 4).

⁶ О Јехова заслужинела и доверба. Исто сар јекх бари карпа која со секогаш тани ко пло тхан, аѓаар о Јехова секогаш тано акате аменге. Шај те овел амен доверба ки лесте адалеске со ов тано „вечно Карпа“. (Читин Исаија 26:3, 4.) Ов секогаш ка исполнинел пле ветувања, ка шунел амаре молитве хем ка дел амен и помош со ваљани аменге. Исто аѓаар, шај те овел амен доверба ко Јехова адалеске со ов тано верно околенге со служинена леске (2. Сам. 22:26). Ов никогаш нане те бистрел адава со кераја хем секогаш ка наградинел амен (Евр. 6:10; 11:6).

7. Сар ка влијајнел упри аменде адава со ка овел амен доверба ко Јехова? (Дикх хем и слика.)

⁷ Сикаваја кај о Јехова тано амари Карпа аѓаар со иси амен целосно доверба ки лесте. Асавки доверба поможинела амен те ова леске послушна чак ко пхаре времија, соске џанаја кај адава тано амаре шукарипаске (Иса. 48:17, 18). Секова пути кеда дикхаја кај о Јехова поможинела амен, амари доверба ки лесте бајрола. Адава керела те ова панда поувериме кај само о Јехова шај те поможинел амен ки било сави пхари неволја колате со ка аракхљова. Ко ситуацие коте со никој нашти те поможинел аменге, бут пути хаљоваја кај секогаш шај те овел амен доверба ко Јехова. Јекх пхрал со викинела пе Владимир, вакерѓа: „Џикоте сиум сине ко затвор, осетинѓум ман најпаше е Јеховаја. Сиклиљум те овел ман побари доверба ко Јехова адалеске со сиум сине скроз коркори хем на сине ман нисави контрола упри ситуација“.

8. а) Соске шај те вакера кај о Јехова тано стабилно? б) Сар користинела аменге адава со о Девел тано амари Карпа? (Псалм 62:6, 7).

 ⁸ О Јехова тано стабилно. Слично сар јекх бари карпа о Јехова тано цврсто хем стабилно. Лескири личност хем лескири намера никогаш на менинена пе (Мал. 3:6). Кеда о Адам хем и Ева бунинѓе пе против лесте, о Јехова на менинѓа пли намера е манушенцар. Сар со пишинѓа о апостол Павле, о Јехова „нашти те откажинел пе коркори пестар“ (2. Тим. 2:13). Акава значинела кај бизи разлика со случинела пе или со керена о јавера, о Јехова никогаш нане те менинел пле особине, пли намера хем пле мерилија. Адалеске со о Девел тано стабилно, шај те ова увериме кај ов ка поможинел аменге кеда ка аракхљова ко пхаре ситуацие хем кај ка исполнинел пле ветувања баши иднина. (Читин Псалм 62:6, 7.)

9. Со сикљовеа тари Татјана?

⁹ О Јехова ка овел амари Карпа ако никогаш на бистраја лескере особине хем лескири намера. Адава ка поможинел аменге те ачхова стабилна ко емоционално поглед џикоте накхаја тари несави неволја (Пс. 16:8). Акава сине случај јекхе пхењаја со викинела пе Татјана, која со сине пханли ко јекх кхер баши пли вера. Ој вакерела: „Сиум сине скроз коркори, ко почеток сине манге бут пхаро. Бут пути осетинава ман сине обесхрабрими“. Пало адава, кеда почминѓа те размислинел башо адава сар лакири неволја тани поврзими е Јеховаја хем лескере намераја, халили кобор тано важно те истрајнел. Адава поможинѓа лаке те осетинел пе посмирено хем денѓа ла сила те ачховел верно. Ој вакерела: „Адава со размислинава сине кај са акава случинела пе манге башо Јехова, поможинѓа ман те на концентриринав ман бут ки манде“.

10. Сар шај те сикава кај о Јехова тано амари Карпа авдиве?

¹⁰ Панда хари, ка аракхљова ко бут пхаре времија. Адалеске ка ваљани те сикава доверба ко Јехова сар никогаш англедер. Акана тано време те бајрара амари доверба кај ов ка дел амен са адава со ваљани аменге те шај те истрајна хем те ачхова леске верна. Сар шај те кера адава? Читин библиска извештаија хем искуствија башо е Јеховаскере слуге таро амаро време. Приметин сар о Девел сикавѓа кај тано Карпа пле слугенге. Хор размислин башо акала извештаија. Аѓаар ка сикаве кај о Јехова тано тли Карпа.

ЏА ПАЛО Е ЈЕХОВАСКОРО ПРИМЕР

11. Соске мангаја те сикава о особине баши кола со о Јехова тано споредимо сар карпа? (Дикх хем и рамка „ Цел е терне пхраленге“.)

¹¹ Џи акана дикхлем кола особине сикавена кај о Јехова тано сар карпа аменге. Акана ка дикха сар шај амен те сикава адала особине. Кобор повише сикаваја адала особине добором повише ка шај те охрабрина амаре пхрален хем пхењен. На пример, о Исус чхивѓа е Симонеске о анав Кифа (преведимо сар „Петар“), со значинела „карпа“ (Јован 1:42, фус.). О Исус мангља те вакерел кај о Петар ка утешинел е пхрален хем е пхењен хем кај ка поможинел  о собрание те овел стабилно. О старешине ко собрание тане опишиме сар „сенка тари бари карпа“. Акава сикавела кај ола ка заштитинен е јаверен ко собрание (Иса. 32:2). Џанѓола пе, сарине амен шај те охрабрина е јаверен хем те сикава о особине баши кола со о Јехова тано споредимо сар карпа (Еф. 5:1).

12. Ко саве начинија шај те ова тхан гарајбаске јаверенге?

¹² Ов тхан гарајбаске. Понекогаш, амаре пхраленге хем пхењенге шај те ова дословно тхан гарајбаске аѓаар со ка викина лен ко амаро кхер кеда иси несави природно катастрофа, граѓанско немирија или војна. Сар со ка овен полошна о условија ко акала „последна диве“, сигурно ка овел амен повише прилике те поможина амен јекх јекхеа (2. Тим. 3:1). Исто аѓаар, шај те утешина хем те сикава мангипе амаре пхраленге хем пхењенге. Јекх начин сар шај те кера адава тано аѓаар со ка кера те осетинен пе шукар кеда авена ко амаре состанокија хем ка кера те овел шукар атмосфера ко собрание. Живинаја ко свето коте со о мануша понашинена пе грубо хем шудресте хем адава керела аменге стрес. Адалеске, кеда сием ко амаре состанокија, мангаја те кера са со шај те шај амаре пхраља хем пхења те осетинен пе мангле, освежиме хем безбедна.

13. Сар шај посебно о старешине те овен тхан гарајбаске? (Дикх хем и слика.)

¹³ О старешине шај те овен тхан гарајбаске е пхраленге хем е пхењенге со доживинена дословна или симболична буре. Кеда иси несави природно катастрофа или несаво итно медицинско случај, о старешине сигате керена нешто те шај практично те поможинен. Исто аѓаар, ола користинена и Библија те шај те ден водство хем те охрабринен. О пхраља хем о пхења ка осетинен пе послободна те роден помош таро несаво старешина ако џанена кај ов ка керел ленцар лафи љубезно, ка шунел лен хем ка трудинел пе те хаљовел сар осетинена пе. Асавке особине поможинена е јаверенге те  осетинен пе мангле хем те овел ленге полокхо те применинен било кова библиско совет со шај о старешине те ден лен (1. Сол. 2:7, 8, 11).

14. Сар шај те сикава кај заслужинаја е јаверенгири доверба?

¹⁴ Заслужин е јаверенгири доверба. Амен мангаја о јавера те џанен кај шај те овел лен доверба ки аменде, посебно „ко пхаре диве“ (Изр. 17:17). Со шај те кера те шај е јаверен те овел лен доверба ки аменде? Шај те трудина амен секова диве те сикава о особине е Јеховаскере, сар на пример, те ачхова ко амаро лафи хем те ова точна (Мат. 5:37). Исто аѓаар, шај те поможина практично околен кас со иси потреба. Освен адава, трудинаја амен о задаче со иси амен ко собрание те кера лен спрема о упатствија со добинаја лен.

15. Сави корист иси е собрание кеда о јавера шај те овел лен доверба ко старешине?

¹⁵ Сави корист иси е собрание кеда о старешине сикавена кај е јаверен шај те овел лен доверба ки ленде? О објавителија осетинена пе посигурна кеда џанена кај шај те јавинен пе е старешиненге ко било кова време кеда ка ваљани ленге помош, сар на пример, е надгледникоске тари ленгири група башо проповедибе. Исто аѓаар, о објавителија осетинена пе мангле кеда џанена кај о старешине тане спремна те поможинен ленге. Кеда о старешине дена советија кола со темелинена пе ки  Библија хем ко публикацие таро верно хем мудро робо, наместо ко пло лично мислење, е објавителен иси лен доверба ки ленде. Исто аѓаар, е пхрален хем е пхењен иси лен доверба ко окола старешине со на вакерена е јаверенге лична буќа со сине ленге вакерде хем кола со ачхона ко пло лафи.

16. Сар адава со сием стабилна користинела хем аменге хем е јаверенге?

¹⁶ Ов стабилно. Шај те влијајна шукар упро јавера ако сием одлучна те ова послушна е Јеховаске ко са хем ако анаја одлуке кола со темелинена пе ко библиска начелија. Ако проучинаја е Девлескоро Лафи хем ако бајрараја амари вера ко Јехова, тегани панда повише ка икера амен ко чачипе. Нане те ова неодлучна, нестабилна хем упри аменде нане те влијајнен о ховавне сикљојба хем о размислиба е манушенгоро таро акава свето (Еф. 4:14; Јак. 1:6-8). Амари вера ко Јехова хем ко лескере ветувања поможинена амен те ачхова урамнотежена кеда шунаја лошна хаберија (Пс. 112:7, 8). Исто аѓаар, ка шај те поможина околенге со иси лен неволје (1. Сол. 3:2, 3).

17. Сар шај о старешине те поможинен е јаверенге ко собрание те ачховен стабилна?

¹⁷ О старешине ваљани те овен урамнотежена ко са, те овен мудра, те живинен уредно хем те овен разумна. Акала пхраља поможинена е јаверенге ко собрание те ачхон стабилна хем охрабринена лен аѓаар со икерена пе „ко лафија коленге со шај те верујнел пе“ (Тит 1:9; 1. Тим. 3:1-3). Пле примереа хем адалеа со грижинена пе сар пастирија, о старешине поможинена е објавителенге редовно те џан ко состанокија, ки служба хем редовно те проучинен. Кеда е пхрален хем е пхењен иси лен проблемија кола со анена ленге секирацие, о старешине шај бут те керен аѓаар со ка поттикнинен лен понадари да те концентриринен пе ко Јехова хем ки лескири намера.

18. Соске мангаја те фалина е Јехова хем те ова са попаше леа? (Дикх хем и рамка „ Сар шај те ове попаше е Јеховаја“.)

¹⁸ Откеда дикхлем е Јеховаскере бут шуже особине, шај те вакера о исто со вакерѓа о цари о Давид: „Нека овел фалимо о Јехова, мли Карпа“ (Пс. 144:1). Амен секогаш шај те овел амен доверба ко Јехова. Ко цело амаро живото, па чак хем ко попхуре берша шај те овел амен доверба кај ов понадари да ка поможинел амен те ачхова паше леа. Чаче иси амен бут причине те вакера: „Ов тано мли Карпа“ (Пс. 92:14, 15).