„Ни јекх генерација на напредујнѓа добором шукар ко технолошко, научно хем финансиско поглед, сар акаја... Ама веројатно акаја тани хем и прво генерација со анѓа о свето џи ки [политичко, економско хем еколошко] катастрофа“ (Глобално извештај башо ризикија 2018, Светско економско форум).

СОСКЕ БУТ МАНУША ТАНЕ СЕКИРИМЕ БАШИ ИДНИНА Е МАНУШЕНГИРИ ХЕМ Е ПХУВЈАКИРИ? ТЕ ДИКХА САМО НЕСАВЕ ТАРО ПРОБЛЕМИЈА СО ИСИ КО СВЕТО.

• КРИМИНАЛ КО ИНТЕРНЕТ: Спрема јекх австралиско веснико, о интернет овела са поопасно. Ов тано рај е педофиленге, манушенге со мангена те малтретиринен хем те провоциринен е јаверен хем е хакеренге со чорена или уништинена информацие. „Јекх таро најбаро криминал тано о чорибе податокија. О интернет дела прилика е манушенге те сикавен пле најлошна особине сар сој и злоба хем и суровост (The Australian).

• ФИНАНСИСКО РАЗЛИКА: Според јекх извештај тари јекх организација со поможинела е чороленге, офто најбарвале мануша ко свето иси лен барвалипа кобор со иси екваш манушен ко цело свето. Ко адава извештај вакерела: „Адалеске со иси неправедно економско разлика о барвале добинена бут паре, а о најчороле мучинена пе башо адава, кола со повише лендар тане џувља“. Несаве дарана кај ако понадари да бајрола акаја разлика шај те керел о јавера те бунинен пе.

• ВОЈНЕ ХЕМ БРКИБЕ: Ко јекх извештај башо 2018 берш, и Агенција башо избеглице таро Обединета нацие вакерела: „Никогаш англедер на сине добором мануша со селинена пе“. Повише таро 68 милиоња мануша мора сине те мукхен пумаре кхера адалеске со сине војне или сине бркиме. „Скоро ко секола дуј секундија јекх мануш мора те мукхел пло кхер“, пишинела ко акава извештај.

• ЗАГАДИМИ ОКОЛИНА: Ко Глобално извештај башо ризикија башо 2018 берш пишинела: „Са повише растенија хем животне похари нашавѓовена, освен адава штета керела е манушескере састипаске о загадимо воздух хем о загадиме морија“. Исто аѓаар, ко бут пхувја иси са похари инсектија. Адалеске со ола поможинена те бајрон неве растенија, о научникија вакерена кај е пхувјаке заканинела пе „еколошко Армагедон“. О коралија да тане ки опасност те мерен. О научникија мислинена кај ко последна 30 берш, муле околу екваш таро коралија ко свето.

Дали шај те кера о потребна промене те шај амаро свето те овел пошужо хем посигурно тхан живибаске? Несаве мислинена кај шај те кера адава само ако џанаја повише буќа. Ама со ваљани чаче те џана те шај те менина о начин сар о мануша размислинена хем постапинена? Ки следно статија ка овен одговориме акала пучиба.