О Обединета нацие (ОН) поттикнинена са е манушен те соработинен машкар песте, те поштујнен о манушикане правија хем те трудинен пе те заштитинен амари планета. Соске? Адалеске со ко списание UN Chronicle о Махер Насер пишинѓа: „О климатска промене, о организиримо криминал, о акошибе машкар о мануша, о несогласувања, адава со бут селинена пе о мануша, о баро тероризам, о заразна насвалипа хем јавера слична закане влијајнена бут упро мануша хем на чхинавена“.

Јавера геле добором дур со мангле те керен јекх светско влада. Машкар ленде сине о италијанско филозофи, поети хем државнико о Данте Алигери (1265-1321) хем исто о физичари Алберт Ајнштајн (1879-1955). О Данте мислинѓа кај нашти те овел мир засекогаш ко свето колесте со нон-стоп иси политичка поделбе. Ов цитиринѓа адава со вакерѓа о Исус Христос: „Секова царство сој поделимо, ка пропадинел“ (Лука 11:17).

Кратко откеда завршинѓа и Дујто светско војна, ки која сине фрдиме дуј атомска бомбе, о Алберт Ајнштајн пишинѓа писмо џи ко Генерално собрание ко ОН. Ов вакерѓа: „О Обединета нацие ваљани сигате те керен са сој потребно баши е манушенгири безбедност аѓаар со ка керен јекх неви светско влада“.

Дали шај те ова сигурна кај о политичарија, кола со би овена дело тари асавки моќно влада, нане те лен мито, нане те мучинен е манушен хем секогаш ка овен способна те владинен е манушенцар? Котар џанаја кај нане те овен лен асавке лошна особине сар со иси бутен џи акана? Акала пучиба сетинкерена амен ко лафија е британско историчарескере о Актон, кова со вакерѓа: „И власт руминела, а и целосно власт целосно руминела“.

Ама ако о мануша мангена те овел лен мир хем слога мора те овен ко јекхипе. Ама сар шај те овел адава? Дали шај те овел нешто асавко? И Библија вакерела кај шај. Адаја цел шај те остваринел пе хем ка овел остварими. Ама сигурно адаја цел нане те остваринел ла несави светско влада ки колате со иси политичарија со лена мито, него адава ка керел ле е Девлескири влада. Уствари, преку лате ов ка владинел са е створиме буќенцар соске иси ле целосно право башо адава. Сави тани адаја влада? И Библија баши лате вакерела кај тани е Девлескоро Царство (Лука 4:43).

О Исус Христос мислинѓа ко е Девлескоро Царство кеда ки пример молитва вакерѓа: „Те авел тло Царство. Те овел тли волја... ки пхув“ (Матеј 6:9, 10). Кеда ка владинел е Девлескоро Царство ка керел пе е Девлескири волја, а на и волја е себично манушенгири кола сој тане алчна баши власт.

Акава Царство исто аѓаар тано пенџардо сар „небесно Царство“ (Матеј 5:3). Соске? Иако ка владинел упри пхув, ов нане те владинел тари пхув, него таро небо. Размислин со значинела акава. Адаја влада нане те родел хем нане те ваљанел лаке нисави материјално хем финансиско поддршка. Тегани ка овел локхо са е манушенге ки пхув.

Адава со баши акаја влада вакераја Девлескоро Царство, сикавела кај керела пе лафи баши јекх влада колате со иси цари. Адава Цари тано о Исус Христос хем ов добинѓа адаја власт таро Девел. Башо Исус и Библија вакерела:

• „И власт тани ко лескере васта... Нане те овел крајо башо адава кобор ка бајрол лескири власт хем кобор ка овел баро мир“ (Исаија 9:6, 7, King James Version).

•   „Леске сине денди власт, чест, хем царство, те служинен леске са о народо, племија хем чхибја. Лескири власт... никогаш нане те накхел“ (Даниел 7:14).

• „И царско власт упро свето акана припадинела амаре господареске [е Девлеске] хем лескере Христосеске“ (Откровение 11:15).

Спрема и пример молитва е Исусескири, е Девлескоро Царство целосно ка керел е Девлескири волја ки пхув. Кеда ка владинел акава Царство, са о мануша ка сикљон сар те грижинен пе е планетаке која со ка овел обновими хем пхерди животоја.

А сој најважно таро са, кеда ка владинел е Девлескоро Царство са о мануша ка овен сикавде башо иста мерилија. Сарине ка овен сложна хем машкар ленде нане те овен поделбе. Ко Исаија 11:9 пишинела: „Повише нане те керел пе лошнипе, хем нане те керел пе штета, соске и пхув ка овел пхерди пенџарибаја башо Јехова, сар о море сој пхердо пањеа“ (Исаија 11:9).

Са о мануша таро цело свето ка овен ко јекхипе хем ка живинен ко мир јекх јекхеа. Баш адава мангле те керен о Обединета нацие авдиве. Ко Псалм 37:11 пишинела: „Ка уживинен ко баро мир“. Времеа о лафија сар сој криминал, загадување, чоролипе хем војне нане те постојнен. Ама кеда ка овел адава? Кеда хем сар е Девлескоро Царство ка владинел упри цели пхув? Хем со шај адава те значинел туке? О одговор ка дикха ле ки јавер статија.