Некобор тинејџерија сине обвиниме кај силујнѓе јекхе тинејџере џикоте сине ки екскурзија тари школа. Сарине учинена сине заедно ки јекх пенџарди школа ки Канада. Поврзимо акалеа о новинари Ленард Стерн пишинѓа акава ко веснико ки Канада: „Адава со несаво терно чхаво тано интелегентно, учимо или барвало на дела гаранција кај нане те керел лошна буќа“ (Ottawa Citizen).

О Стерн понадари вакерѓа: „Прво таро родителија аџикерела пе те сикавен пумаре чхавен сој тано шукар а сој лошно. Ама жално тано кај ко реално живото повише родителенге тано важно ленгере чхавен те овел лен шукар оценке хем те аракхен шукар бути те шај те овен барвале“.

О образование чаче тано бут важно. Ама чак о најшукар световно образование нашти те поможинел амен те борина амен против о погрешна желбе хем особине. Тегани, со шај те поможинел амен те џана сој тано шукар а сој лошно?

И Библија тани сар ајна. Кеда читинаја ла панда појасно дикхаја амаре слабостија хем кај сием ограничиме (Јаков 1:23-25). Ама, освен со поможинела амен те дикха амен ој поможинела амен те кера о промене со ваљани — те стекнина особине со ка поможинен амен те живина ко мир хем те сложина амен е јаверенцар. Несаве лендар тане шукарипе, љубезност, стрпливост, самоконтрола хем мангипе. И Библија вакерела кај о мангипе совршено поврзинела амен (Колошања 3:14). Соске акаја особина тани посебно? Приметин со вакерела и Библија баши лате.

• „О мангипе тано стрпливо хем љубезно. О мангипе нане љубоморно, на фалинела пе, на ваздела пе, на понашинела пе непристојно, на родела пли корист, на хољанела локхесте, на памтинела о лошнипе. Са поднесинела... са трпинела. О мангипе никогаш на чхинавѓола“ (1. Коринќања 13:4-8).

• „О мангипе на керела лошнипе пле пашутнеске“ (Римјања 13:10).

• „А најангле, нека овел тумен баро мангипе јекх јекхеске, соске о мангипе учхарела бут гревија“ (1. Петарескоро 4:8).

Сар осетинеа тут кеда сиан узо мануша со мангена тут? Сигурно осетинеа тут безбедно, осетинеа мир хем сиан опуштимо. Џанеа кај ола мислинена туке о најшукар хем кај нане никогаш намерно те дукхавен тут.

О мангипе исто аѓаар шај те поттикнинел амен те кера жртве, па чак те менина о начин сар живинаја ако адава користинела е јаверенге.  На пример кеда уло папо, јекх мануш со ка викина ле Џорџ бут мангља те накхавел време пле унукоја. Ама, сине јекх проблеми. Ов пушинела сине бут, а о џамутро лескоро на мангела сине ов те пушинел кеда ка овел узо чхаво. Со керѓа акава папо? Иако пушинѓа 50 берш, ов откажинѓа пе тари акаја штетно навика пле унукоскоро себепи. О мангипе тано чаче бут силно!

О мангипе тани особина со сикљола пе. Е родителен иси лен важно улога башо акава. Ола ваљани те сикавен пумаре чхавен сар те сикавен мангипе. Сар керена адава? Аѓаар со парварена лен хем заштитинена лен, хем грижинена пе ленге кеда насваљона или кеда поврединена пе. О шукар родителија керена лафи пумаре чхавенцар хем сикавена лен. Џикоте воспитинена лен ола поможинена ленге те хаљон сој тано шукар а сој лошно. Освен адава, о шукар родителија сикавена пумаре чхавен аѓаар со дена лен пример.

Жално тано со несаве родителија на керена сар со ваљани пумари одговорност. Дали акава значинела кај ленгере чхаве никогаш нане те овен шукар мануша? Ни најхари! Чак хем баро број попхуре мануша, машкар коленде со сине асавке да со бариле ко проблематична фамилие, успејнѓе те керен баре промене ко пумаро живото хем те овен грижлива хем одговорна мануша. Ки јавер статија ка дикха сар, чак адала со јавера мислинѓе кај лендар нане те овел ништо, успејнѓе те менинен пе корендан.